“Obod turmush yili“ yangiliklari

Farovonlikka hissa

1998-yilda tashkil etilgan "Boʻzyop” ovul fuqarolar yigʻinida 4800 nafardan ziyod oʻzbek, qozoq, qoraqalpoq, turkman, tatar kabi turli millat vakillari ahil inoq yashashmoqda. Ovul aholisi asosan qishloq xoʻjaligida, taʼlim va tibbiyot muassasalarida mehnat qilishadi.

Keyingi yillarda uy mehnati va kasanachilikni rivojlantirish, ayollarning oilasi bagʻridan ajralmay ijtimoiy foydali mehnat bilan shugʻullanishlariga keng imkoniyatlar yaratib berishga ulkan eʼtibor berilayotgani bois, ovulning 98 nafar ayoli uy mehnati bilan band boʻlib, daromad topmoqda. Bu oʻz navbatida mazkur oilalar farovonligiga xizmat qilishi shubhasiz.

Aholi xizmatida

"Boʻzyop” ovulida 6 ta xususiy doʻkonlar va 1 ta goʻsht doʻkoni mavjud boʻlib, aholining kundalik ehtiyoj mollariga boʻlgan talabini toʻla qoplashayapti. Tuman markazidan olisda joylashgan hudud aholisi uchun sifatli va arzon mollar bilan toʻla mavjud doʻkonlar faoliyati ayni muddaodir.

Tomorqa – koni foyda

Bugungi kunda tomorqa yerlar xonadonlarning oʻz oilasi ehtiyojlariga yarasha turli meva poliz va sabzavot ekinlari yetishtirib, ortganini bozorga sotib, iqtisodiga ijobiy taʼsir etadigan foydali manba ekinligini barcha anglab yetdi va undan unumli foydalanishayotir.

"Bobur” ovulidagi mavjud 647 ta xonadonning deyarli barchasi tomorqa yerlariga ega boʻlib ayni kunda turli ekinlar yetilib turibdi. Shuningdek, 40 ta dehqon xoʻjaligi ixtiyoridagi 14 gektar yerda ham ayni pishiqchilik.

Namunali QVPlar

Istiqlol yillarida aholi salomatligini yaxshilashga, barkamol avlodni shakllantirishga, oilada tibbiy madaniyatni oshirishga, sogʻlom turmush tarzini targʻib qilishga berilayotgan eʼtibor natijasida tumanimiz aholisining salomatlik koʻrsatkichlari sezilarli darajada yaxshilandi.

Tumandagi barcha qishloq vrachlik punktlari qoshida dorixona shoxobchalari va fitobarlar tashkil qilindi.

Namunali qishloq vrachlik punktini yaratish boʻyicha tumanda keng koʻlamli ishlar olib borilmoqda. Jumladan Berdaq, Oxunboboyev, Toʻlqin, Qipchoq, Madaniyat, Oʻrta qalʼa va Xitoy qishloq vrachlik punktlari namunali QVPlarga aylantirildi.

"Oq oltin” va "Y.Oʻrozboyev” QVPlarini ham shunday davolash muassasalariga aylantirish maqsadida ularda kapital taʼmirlash ishlari amalga oshirilmoqda.

Shu kungacha "Oq oltin” QVPni taʼmirlashga 40 mln. soʻm, "Y. Oʻrozboyev” QVPni taʼmirlashga 30 mln. soʻm mablagʻ sarflandi.

 "Qoraqalpogʻiston” sistemasi qayta tiklanmoqda

Uzunligi 170 km. boʻlgan "Qoraqalpogʻiston” kollektor tarmogʻini taʼmirlab, qayta tiklash maqsadida 1219 million soʻm pul mablagʻi ajratilgan edi. Ayni kunda bu obʼektda 4 ta ekskavator va 1 ta buldozer yordamida sistemani taʼmirlash ishlari qizgʻin olib borilmoqda.

Joriy yilning 1-avgust holatiga "Qoraqalpogʻiston” sistemasining 113 kilometrida jami 775 million soʻmlik taʼmirlash-tiklash ishlari amalga oshirildi.