Rahmat va magʻfirat oyi
Bismillahir rohmanir rohiym!
Alloh taolo Ramazoni-sharif oyida kishilarni hidoyat sari boshlovchi, insoniyatga baxt-saodat yoʻllarini koʻrsatuvchi Qurʼoni karimni nozil qilgan. Shuning uchun bu kunlarni kechalari toat-ibodatda, kunduzlari roʻzador boʻlish bilan oʻtkazamiz.
Ramazon roʻzasi Qurʼon va hadis orqali musulmonlarga farz boʻlgan amallardandir. Bu haqda Alloh taolo Qurʼoni karimda: «Ey imon keltirganlar! Sizlardan oldingi (ummat)larga farz qilingani kabi sizlarga ham roʻza tutish farz qilindi, shoyad (u sababli) taqvoli boʻlsangiz» («Baqara» surasi, 183-oyat). Paygʻambarimiz Muhammad alayhissalom: «Kimki Ramazon oyida roʻzaning farzligiga ishongan va Alloh taoloning roziligini istagan holda roʻza tutsa, uning oʻtgan gunohlari kechiriladi», - dedilar.
Roʻzaning mukammal boʻlishi uchun roʻzador yolgʻon soʻzlash, igʻvo va boʻhton qilish, noloyiq soʻzlar bilan oʻzgalar dilini ogʻritish kabi illatlardan oʻzini saqlashi lozim. Bu borada Paygʻambarimiz Muhammad (s.a.v)ning muborak hadislarida: «Qaysi bir roʻzador yolgʻon gapirish va unga amal qilish kabi gunohlarini tark etmasa, unday kishining faqat yeb-ichishini tark etib yurishiga Alloh muhtoj emas»,- deb marhamat qildilar.
Ramazoni-sharif toat-ibodat, qut-baraka, baxt-saodat oyidir. Shuning bilan birga, bu oyda gunohlar magʻfirat etilib, tavba-tazarrular, chin ixlos va eʼtiqod ila qilingan duolar mustajob boʻlib, qalblar taskin topadi, qilingan xayrli ishlar savobi bir necha bor ziyoda qilingan holda qabul qilinadi. Paygʻambarimiz Muhammad (s.a.v) hadislarida: «Agar ummatlarim ramazondagi fazilatlarni bilganlarida edi, yilning hammasi ramazon boʻlishini orzu qilardilar», - deganlar. Chunki ramazondagi toat-ibodatlar maqbul, duolar mustajob, gunohlar magʻfirat, jannat roʻzadorlarga mushtoq boʻladigan oydir.
Bu oyda mehr-muruvvat, saxovat, oliyhimmatlik koʻproq qilinadi, gina-kuduratli insonlar ham bir-birlariga quchoq ochadilar, oʻzaro uzr soʻrashadilar. Bilamizki, kechirimli va mehr-shafqatli boʻlish har bir musulmon uchun ham qarz, ham farzdir.
Bu oyda musulmonlar ulkan savoblar umidida eng ezgu ishlarni amalga oshiradilar. Alloh taoloning yaxshi ishlar uchun ajru mukofotlarni bir necha barobar koʻpaytirib ato etadigan bu kunlarni gʻanimat bilib, gunohlardan poklanishga, xayrli ishlarni koʻpaytirishga shoshilmogʻimiz lozim. Roʻzador kishi oʻzini turli nojoiz amallardan va shahvatga chorlovchi holatlardan ehtiyot qilib asrasa, aziz va hurmatli insonga aylanadi. U oʻzining odamiyligini va mayliga tobe hayvonlardan farqli ekanini sezadi. Shuningdek, roʻza roʻzadorni boshqalarga rahmdil va mehribon boʻlishga oʻrgatadi. Inson roʻza orqali oʻz qadrini biladi va zaif ekanini ham xis qiladi. Kim oʻz qadrini yaxshi bilsa, unga yaxshiliklar eshigi ochiladi va toʻgʻri yoʻlda boʻladi. Roʻzador qachon oʻzida ochlik va chanqoqlikni sezsa, oʻzi kabi ochlik va chanqoqlik azobini tortayotgan kambagʻal va bechoralarga yaxshilik etishga harakat qiladi. Insonlarga yaxshilik qilish, ularga ehson va yordam berish roʻzaning eng ulugʻ belgilaridan ekani namoyon boʻladi.
Roʻza oʻzining mana shunday sifat va koʻrinishlari bilan barcha musulmonlarni hayotda oʻzaro yaxshilik yoʻlida hamkorlik qilishga, imon, xolislik va samimiylik bilan yaxshi amallarni qilishga targʻib va tashviq qiladi. Koʻngli va qoʻlini ochib, feʼlini kenglik va saxovatpeshalik hamda yaxshilik fazilatlari ila bezab, roʻzador boʻlgan hamyurtlarimizning Alloh yoʻlidagi barcha amallarini Yaratganning oʻzi qoʻllab, ulugʻ Ramazon oyining barcha savoblariga musharraf etsin.
Assalomu alaykum va rahmatullohi va barokatuh.
A.MATSAFOYeV,
"Yusuf Eshon bobo” jomeʼ masjidi imom-xatibi.
(Foto - http://muslim.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
