Раҳмат ва мағфират ойи
Бисмиллаҳир роҳманир роҳийм!
Аллоҳ таоло Рамазони-шариф ойида кишиларни ҳидоят сари бошловчи, инсониятга бахт-саодат йўлларини кўрсатувчи Қуръони каримни нозил қилган. Шунинг учун бу кунларни кечалари тоат-ибодатда, кундузлари рўзадор бўлиш билан ўтказамиз.
Рамазон рўзаси Қуръон ва ҳадис орқали мусулмонларга фарз бўлган амаллардандир. Бу ҳақда Аллоҳ таоло Қуръони каримда: «Эй имон келтирганлар! Сизлардан олдинги (уммат)ларга фарз қилингани каби сизларга ҳам рўза тутиш фарз қилинди, шояд (у сабабли) тақволи бўлсангиз» («Бақара» сураси, 183-оят). Пайғамбаримиз Муҳаммад алайҳиссалом: «Кимки Рамазон ойида рўзанинг фарзлигига ишонган ва Аллоҳ таолонинг розилигини истаган ҳолда рўза тутса, унинг ўтган гуноҳлари кечирилади», - дедилар.
Рўзанинг мукаммал бўлиши учун рўзадор ёлғон сўзлаш, иғво ва бўҳтон қилиш, нолойиқ сўзлар билан ўзгалар дилини оғритиш каби иллатлардан ўзини сақлаши лозим. Бу борада Пайғамбаримиз Муҳаммад (с.а.в)нинг муборак ҳадисларида: «Қайси бир рўзадор ёлғон гапириш ва унга амал қилиш каби гуноҳларини тарк этмаса, ундай кишининг фақат еб-ичишини тарк этиб юришига Аллоҳ муҳтож эмас»,- деб марҳамат қилдилар.
Рамазони-шариф тоат-ибодат, қут-барака, бахт-саодат ойидир. Шунинг билан бирга, бу ойда гуноҳлар мағфират этилиб, тавба-тазаррулар, чин ихлос ва эътиқод ила қилинган дуолар мустажоб бўлиб, қалблар таскин топади, қилинган хайрли ишлар савоби бир неча бор зиёда қилинган ҳолда қабул қилинади. Пайғамбаримиз Муҳаммад (с.а.в) ҳадисларида: «Агар умматларим рамазондаги фазилатларни билганларида эди, йилнинг ҳаммаси рамазон бўлишини орзу қилардилар», - деганлар. Чунки рамазондаги тоат-ибодатлар мақбул, дуолар мустажоб, гуноҳлар мағфират, жаннат рўзадорларга муштоқ бўладиган ойдир.
Бу ойда меҳр-мурувват, саховат, олийҳимматлик кўпроқ қилинади, гина-кудуратли инсонлар ҳам бир-бирларига қучоқ очадилар, ўзаро узр сўрашадилар. Биламизки, кечиримли ва меҳр-шафқатли бўлиш ҳар бир мусулмон учун ҳам қарз, ҳам фарздир.
Бу ойда мусулмонлар улкан савоблар умидида энг эзгу ишларни амалга оширадилар. Аллоҳ таолонинг яхши ишлар учун ажру мукофотларни бир неча баробар кўпайтириб ато этадиган бу кунларни ғанимат билиб, гуноҳлардан покланишга, хайрли ишларни кўпайтиришга шошилмоғимиз лозим. Рўзадор киши ўзини турли ножоиз амаллардан ва шаҳватга чорловчи ҳолатлардан эҳтиёт қилиб асраса, азиз ва ҳурматли инсонга айланади. У ўзининг одамийлигини ва майлига тобе ҳайвонлардан фарқли эканини сезади. Шунингдек, рўза рўзадорни бошқаларга раҳмдил ва меҳрибон бўлишга ўргатади. Инсон рўза орқали ўз қадрини билади ва заиф эканини ҳам хис қилади. Ким ўз қадрини яхши билса, унга яхшиликлар эшиги очилади ва тўғри йўлда бўлади. Рўзадор қачон ўзида очлик ва чанқоқликни сезса, ўзи каби очлик ва чанқоқлик азобини тортаётган камбағал ва бечораларга яхшилик этишга ҳаракат қилади. Инсонларга яхшилик қилиш, уларга эҳсон ва ёрдам бериш рўзанинг энг улуғ белгиларидан экани намоён бўлади.
Рўза ўзининг мана шундай сифат ва кўринишлари билан барча мусулмонларни ҳаётда ўзаро яхшилик йўлида ҳамкорлик қилишга, имон, холислик ва самимийлик билан яхши амалларни қилишга тарғиб ва ташвиқ қилади. Кўнгли ва қўлини очиб, феълини кенглик ва саховатпешалик ҳамда яхшилик фазилатлари ила безаб, рўзадор бўлган ҳамюртларимизнинг Аллоҳ йўлидаги барча амалларини Яратганнинг ўзи қўллаб, улуғ Рамазон ойининг барча савобларига мушарраф этсин.
Ассалому алайкум ва раҳматуллоҳи ва барокатуҳ.
А.МАТСАФОЕВ,
"Юсуф Эшон бобо” жомеъ масжиди имом-хатиби.
(Фото - http://muslim.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
