Kunlardan bir kun Oʻrozali Reyimov...

Dilkash, hazilkash va quvnoq inson, ustozimiz Oʻrozali Reyimov har doim davralarga fayz kiritib, atrofidagilarga kulgu, tabassum «yuqtirib» yuradi. Oʻzi quvnoq boʻlganidanmi, hayotda u bilan bogʻliq juda koʻp kulguli voqealar sodir boʻlib turadi. Quyida ulardan baʼzilarini Sizning eʼtiboringizga havola qilmoqchimiz.

Oʻrozali Reyimov «Amudaryo haqiqati» gazetasi tahririyatiga ishga yangi kirgan kunlarning birida navbatchilik ham uning «chekiga» tushdi. Boz ustiga, qandaydir mavzuda tanqidiy maqolani boshlab qoʻygan edi, shosha-pisha tugatib, terishga berdi.

Ertasiga ertalab hamkasblaridan biri boshini quyi solib oʻtirgan Oʻrozali ogʻaga:

– Ha, Oʻrozali ogʻa, navbatchilik qiyin ekanmi? – dedi hazillashib.

– Yoʻq, nega unday deysan?

– Shunda nega «mulgib» oʻtiribsiz, ichgan odamday?

– «Bang»ning («Nasha», demoqchi. Tahr.) kuchi, – dedi Oʻrozali ogʻa jiddiy ohangda va hamkasbining qoʻliga yangi chop qilingan gazetani tutqazdi.

Hayron boʻlgan hamkasbi, Oʻrozali ogʻaning maqolasi ustidagi sarlavhani oʻqib, gap nimadaligini tushundi va kulib yubordi.

Tanqidiy maqolaning «Muxbirimiz bong uradi» degan rukni xatolik tufayli «Muxbirimiz bang uradi» boʻlib ketgan ekan...

* * *

Oʻrozali Reyimov Qoraqalpogʻiston televideniyesida ishlab yurgan kezlari qishloq xoʻjaligi korxonalarida shoʻr yuvish ishlarining borishi haqida lavha tayyorlab, «Xabar» dasturiga joʻnatdi.

Lavha efirga ketgach, zum oʻtmay, rahbardan qoʻngʻiroq boʻldi:

– «Amudaryo tumani dehqonlari yerlarni suv bilan sugʻormoqda» degan jumlani qanday tushunsak boʻladi? – dedi rahbar salomalikdan keyin.

– Toʻgʻri-ku, tumanda sugʻorish ishlari allaqachon boshlab yuborildi, yakunlanay deb qoldi, – dedi yosh muxbir boshliqning maqsadiga tushunmay.

– Shunda ne, Amudaryodan boshqa tumanlarda yerni suv bilan emas, kerosin bilan sugʻorishadimi?..

Yosh muxbir yana bir marta shu kabi «qovun tushirdi».

– «Falon maktabda uzunlikka yugurish boʻyicha musobaqa oʻtkazildi, debsiz? – «Yuqoridan» qoʻngʻiroq qilgan kishi kulib, ushbu jumladan hayronligini bildirdi: – Nima, odatda kesasiga yugurisharmidi?

* * *

Bir kuni Qoraqalpogʻiston telekanali xodimlarini Toshkentdan kelgan mutaxassislar attestatsiyadan oʻtkazadigan boʻlishdi.

– 3 ta savol beradi. Savollari qiyin, lekin hech boʻlmasa bittasiga javob bersangiz, oʻz vazifangizda qolasiz, – dedi attestatsiyaga masʼul xodim.

Navbat yetib, Oʻrozali ogʻa ichkariga kirdi.

– Familiyangiz?

– Reyimov, – dedi Oʻrozali ogʻa kulib.

– Nimaga kulasiz, kulguli ish boʻldimi? – dedi qovogʻi soliq hayʼat raisi.

– Uch savoldan bittasini bilgan ham attestatsiyadan oʻtadi, deyishgandi. Oʻtganimga xursand boʻlib kulyapman...

Xonadagilarning hammasi, shu jumladan, koʻrinishidan ancha jiddiy, bir necha odamni «qulatgan» hayʼat raisi ham kulib yubordi.

– Bu bolaga gap yoʻq, uni imtihon qilishning ham keragi yoʻq, attestatsiyadan oʻtding, – dedi kulgidan oʻzini toʻxtata olmayotgan rais.

* * *

Bir kuni Oʻrozali Reyimov tumanda oʻtkazilgan «Navroʻz» bayramidan lavha tayyorlab, Nukusga yoʻl oldi. Shoshib borsa, «Xabar» tahririyati xonasida 7-8 nafar hamkasblari navbat kutib oʻtirgan ekan.

– Bilaman, hamma muxbir tumanidagi bayramni bugun, birinchi boʻlib efirga uzatgisi keladi. Lekin vaqt oʻlchangan. Bor-yoʻgʻi 3 ta tumanning reportajini bugun efirga uzata olamiz. Qolganlari ham navbat bilan shu hafta ichida chiqadi, – dedi tahririyatda ishlovchi masʼul muharrir.

Muxbirlar shu «uchtalik»ka kirish uchun gap talashib ketishdi. Kimdir tumanidagi bayramga Respublika rahbariyati vakillari qatnashganini aytsa, yana kimdir navbatga birinchi boʻlib turganini pesh qildi.

– Oʻrtoqlar, dedi Oʻrozali Reyimov. Kap-katta odamlar, buncha tortishasizlar? Menda bir taklif bor, hammaga tenglik boʻlsin. Keling, bayram qaysi tumanda boʻlgan boʻlsa, alifbo tartibida oʻsha tumanning bayrami efirga ketsin. Avval Amudaryo, soʻng Beruniy... Nima dedingiz?..