SUD – HUQUQ TIZIMINI ISLOH QILISh INSON MANFAATLARIGA XIZMAT QILADI
Sud-huquq tizimini yanada demokratlashtirish va erkinlashtirish, sud, huquqni muhofaza qiluvchi va nazorat organlari faoliyati samaradorligini, aholining odil sudlovga boʻlgan ishonchini oshirish, jamiyatda qonun ustuvorligini taʼminlash va qonuniylikni mustahkamlash maqsadida 2016-yil 21 oktyabrda Respublikamiz Prezidentining "Sud-huquq tizimini yanada isloh qilish, fuqarolarning huquq va erkinliklarini ishonchli himoya qilish kafolatlarini kuchaytirish chora-tadbirlari toʻgʻrisida”gi Farmoni qabul qilindi.
Farmonda sud hokimiyatining chinakam mustaqilligi, fuqarolar huquq va erkinliklarining ishonchli himoyasini taʼminlash, shuningdek odil sudlovga erishish darajasini oshirish sud-huquq tizimini yanada isloh qilish sohasida davlat siyosatining asosiy ustuvor yoʻnalishlari etib belgilandi.
Mazkur Farmonga asosan 2017-yilning 1-aprelidan boshlab, ozodlikdan mahrum qilish bilan bogʻliq boʻlmagan muqobil jazo turlarini qoʻllashni kengaytirish orqali qamoq tariqasidagi jinoiy jazoni qoʻllash tugatiladi.
Oʻzbekiston Respublikasi Jinoyat-protsessual kodeksining 220-moddasida jinoyatni sodir etishda gumon qilinayotgan shaxsni uning jinoiy faoliyat bilan shugʻullanishiga barham berish, qochib ketishining, dalillarni yashirishi yoki yoʻq qilib yuborishining oldini olish maqsadida ushlab turish mumkinligi qayd etilgan. Ushlab turish jinoyat ishi qoʻzgʻatilgunga qadar ham, ish qoʻzgʻatilganidan keyin ham amalga oshirilishi mumkin.
Ushlab turish surishtiruvchi, tergovchi yoki prokurorning qaroriga binoan amalga oshiriladi.
Oʻzbekiston Respublikasi Jinoyat-protsessual kodeksining 226-moddasida shaxsni 72 soat muddat ichida ushlab turish mumkinligi bayon etilgan. Shundan soʻng ushlab turilgan shaxsni ehtiyot chorasi sifatida qamoqqa olish qoʻllaniladi yoki ozod qilinishi mumkin. Yangi Farmonga binoan 2017-yilning 1 aprelidan boshlab, bu muddat 72 soatdan 48 soatga qisqartiriladi.
Jinoyat-protsessual kodeksiga asosan qamokda saqlab turish va uy qamogʻi tarzidagi ehtiyot choralarining muddati uch oyni tashkil qiladi, lekin shu muddat ichida tergov tamomlanmagan boʻlsa, viloyat va unga tenglashtirilgan prokurorlarning iltimosnomalari asosida ushbu muddat 5 oygacha, respublika Bosh prokurori oʻrinbosarining iltimosnomasi asosida 9 oygacha, alohida hollarda esa respublika Bosh prokurorining iltimosnomasi asosida sud tomonidan bir yilgacha muddatga uzaytirilishi mumkinligi belgilangan.
Farmonda 2017-yilning 1-aprelidan boshlab, qamoqqa olish va uy qamogʻi tarzidagi ehtiyot choralarini qoʻllashning, shuningdek, dastlabki tergovning eng koʻp muddatini 1-yildan 7 oyga qisqartirish lozimligi belgilandi.
Qayd etilgan asosiy vazifalar va yangi normalarning hayotga tatbiq etilishi uchun ushbu Farmon bilan sud-huquq tizimini rivojlantirish borasida 8 ta eng ustuvor soha boʻyicha aniq tadbirlarni amalga oshirishni nazarda tutuvchi kompleks chora-tadbirlar dasturi tasdiqlangan boʻlib, ayni paytda bu borada keng qamrovli ishlar boshlab yuborildi.
Xullas, ushbu Farmonning qabul qilinishi mamlakatimizda sud-huquq tizimi faoliyatini sifat jihatidan yangi bosqichga olib chiqish, fuqarolarning huquqlari, erkinliklari hamda qonuniy manfaatlari himoya qilinishini taʼminlash, xalqimizning odil sudlovga boʻlgan ishonchini yanada mustahkamlash imkonini beradi.
A.Qurbonov,
Shimoli-Gʻarbiy harbiy okrug
harbiy prokurorining yordamchisi, adliya mayori.
(Foto - http://turkistonpress.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
