GʻAMXOʻRLIKDAN MINNATDORMIZ

Jami aholisining 60 foizidan koʻprogʻini yoshlar tashkil etadigan bizning mamlakatimizda ularning tarbiyasiga, bilim olishlariga va baxtli hayot kechirishlariga alohida eʼtibor beriladi. Shu boisdan ham yoshlar mustaqil Oʻzbekistonimizning gullab-yashnashi yoʻlida fidoyilik namunalarini koʻrsatmoqdalar. Yoshlarga bildirilayotgan ishonch ularni har bir sohada olib borilayotgan islohotlarni jadallashtirishda gʻayrat-shijoat koʻrsatishga daʼvat etmoqda.

Birinchi Prezidentimiz Islom Karimov katta yigʻinlarda soʻzlagan nutqlarida doimo yoshlarga "Vatani, xalqi uchun kurashga bel bogʻlagan, sofdil, irodasi mustahkam, koʻzlari yonib turadigan yoshlar” deya taʼrif berishdan charchamas edilar. Muhtaram Prezidentimizning yoshlarga nisbatan shunday gaplarni aytishi ularga qanot bagʻishlardi goʻyo.

Oʻzbekiston Respublikasining mustaqilligini mustahkamlash yoʻlida harakat qilayotgan yoshlar orasida amudaryolik yoshlarning ham alohida oʻrni bor. Bizning yoshlarimiz ham barcha sohalarda amalga oshirilayotgan islohotlarni jadallashtirishga oʻzlarining munosib hissalarini qoʻshmoqdalar.

Oʻzbekiston Respublikasi Prezidenti Shavkat Mirziyoyev Oʻzbekiston Respublikasi Konstitutsiyasi qabul qilinganining 24-yilligiga bagʻishlangan tantanali marosimda qilgan "Qonun ustuvorligi va inson manfaatlarini taʼminlash – yurt taraqqiyoti va xalq farovonligining garovi” nomli maʼruzalarida hozirgi vaqtda yoshlar tarbiyasi oʻz dolzarbligi va ahamiyatini hech qachon yoʻqotmaydigan masala boʻlib qolayotganligini, bugungi tez oʻzgarayotgan dunyo insoniyat oldida, yoshlar oldida yangi-yangi buyuk imkoniyatlar eshiklarini ochayotganini taʼkidlab, shu bilan birga ularni ilgari koʻrilmagan turli yovuz xavf-xatarlarga ham duchor qilayotganini, gʻarazli kuchlar sodda, gʻoʻr bolalarni oʻz ota-onasiga, oʻz yurtiga qarshi qayrab  ularning hayotiga, umriga zomin boʻlayotganini afsuslanib gapirdilar. Muhtaram Prezidentimiz Sh.Mirziyoyev oʻz nutqlarida bunday keskin va tahlikali sharoitda ota-onalar, ustoz-murabbiylar, jamoatchilik, mahalla-koʻy bu masalada xushyorlik va ogohlikni yanada oshirishi kerakligini, yoshlar bilan koʻproq gaplashib, ularning qalbiga quloq solish, dardini bilish, muammolarini yechish uchun amaliy koʻmak berish kerakligini, bu borada uyushmagan yoshlar bilan alohida ish olib borish zarurligini uqtirdilar.

Biz Prezidentimiz nutqlarini eshitar ekanmiz, ushbu vazifalarni amalga oshirishda asrlar mobaynida shakllangan milliy anʼanalarimizga, ajdodlarimizning boy merosiga tayanib, yoshlarning, ayniqsa, qiz bolalarning zamonaviy bilim va kasb-hunarlarni, horijiy tillarni egallashlari, har tomonlama sogʻlom va barkamol boʻlib, hayotdan munosib oʻrin topishlari uchun barcha imkoniyatlar yaratilishini chuqur his qildik.

- "Bizning navqiron avlodimiz manfaatlarini taʼminlash borasidagi faoliyatimiz yaqinda qabul qilingan "Yoshlarga oid davlat siyosati toʻgʻrisida”gi qonun asosida qatʼiy davom ettiriladi, – dedilar Prezidentimiz Sh.Mirziyoyev oʻz maʼruzalarida. – "Kamolot” yoshlar ijtimoiy harakati barcha yoshlarimiz intiladigan, ularning qobiliyat va iqtidorini roʻyobga chiqaradigan va manfaatlarini haqiqiy himoya qiladigan tashkilotga aylanishi uchun barcha choralarni koʻramiz”.

Biz buni Prezidentimizning yoshlarga nisbatan gʻamxoʻrligi, ularni birlashtiradigan tashkilotga boʻlgan ishonchi deb bilamiz.

Ayni kunda tumanimiz yoshlari muhtaram Prezidentimizning "Qonun ustuvorligi va inson manfaatlarini taʼminlash – yurt taraqqiyoti va xalq farovonligining garovi” nomli maʼruzasini oʻqib-oʻrganishda davom etmoqdalar. Yoshlarimizning bugungi niyatlari – ona Vatanga sodiq farzand boʻlib, Prezidentimizning ishonchlarini toʻla oqlashdan iborat.

Mansur OʻROZBOYeV, "Kamolot” YoIH tuman Kengashi raisi.

(Foto - http://farishta.uz)