Gʻamxoʻrlikdan minnatdormiz

Bizning "Mangʻit matbaasi” xususiy korxonamiz 2007-yildan buyon faoliyat koʻrsatib kelmoqda. Asosan matbaachilik ishlarini bajarishga moʻljallangan korxonamizda  tumanimizda chiqadigan "Taraqqiyot koʻzgusi” gazetasini chop qilish, korxona va tashkilotlar uchun ish qogʻozlarini tayyorash, buxgalterlik xujjatlarini muqovalash va shunga oʻxshash bir qancha ishlar amalga oshiriladi.

Korxonamizda 6 kishi mehnat qiladi. Biz oʻz xodimlarimizning mehnat qilishlari, dam olishlari va ularning ijtimoiy himoyasini yaxshilash boʻyicha doimo gʻamxoʻrlik qilib kelmoqdamiz.

Shu sababdan ham korxonamizda ish unumdorligi sezilarli darajada oshib bormoqda. Bunday holat albatta korxonamizda belgilangan rejalarning oʻz vaqtida bajarilishiga samarali taʼsir koʻrsatmoqda.

Biz tadbirkorlar hamisha Prezidentimiz va hukumatimiz gʻamxoʻrliklaridan minnatdorlik tuygʻusi bilan yashamoqdamiz. Chunki Prezidentimiz va hukumatimiz tomonidan tez-tez qabul qilinayotgan Farmon va Qarorlarda doimo tadbirkorlik faoliyatini rivojlantirish va qoʻllab-quvvatlash masalalariga eʼtibor berilmoqda.

Muhtaram Prezidentimizning 2015-yil 15-maydagi "Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora-tadbirlari toʻgʻrisida”gi Farmoni bizni yangi marralar sari ruhlantirib yuboradi.

Bugungi milliy qonunchiligimiz tadbirkorlarning erkin faoliyat yuritishlarini kafolatlaydi. Endi tadbirkorlik subʼektlari faoliyatiga hadeb aralashish, xohlagan vaqtida tekshirishlar oʻtkazish huquqi har qanday tashkilot yoki mansabdor shaxsga berilavermaydi. Prezidentimiz Farmoniga koʻra, rejali tekshirishlarning yagona tartibi va davriyligi belgilanib, barcha rejali tekshirishlar moliyaviy xoʻjalik faoliyati boʻyicha oʻtkaziladigan tekshirishlar kabi kichik biznes subʼektlarida 4-yilda bir marta, boshqa subʼektlarda esa 3-yilda bir marta oʻtkaziladi.

Biz tadbirkorlar uchun yaratilayotgan bunday gʻamxoʻrliklardan cheksiz minnatdormiz.

Poʻlat XOʻJABOYeV,

"Mangʻit matbaasi” xususiy korxonasi rahbari.

Maqola Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan loyiha doirasida tayyorlandi.