“TIL BILGAN YOʻLDA QOLMAS”

Mustaqillikning dastlabki yillaridanoq mamlakatimizda taʼlim tizimini tubdan isloh qilishga kirishildi. Chunki sobiq ittifoq davridagi qotib qolgan, oʻzgarmas taʼlim dasturlari yangilangan tuzum talablariga umuman mos kelmas edi. Har yili 1 sentyabr bir xil dars oʻtish bilan kutib olinardi. Yaʼni, "xalqlar dohiysi”ga bagʻishlangan dars bilan yangi oʻquv yili boshlanar, eng achinarli tomoni – har galgi 1-sinflarda avvalgi yillardagi 1-sinflar uchun yaratilgan dastur asosida dars mashgʻulotlari oʻtilardi. Hozirgiday izlanish yoʻq, tajriba almashish, innovatsion loyihalar yoʻq edi.

Endilikda yosh avlod tarbiyasi sohasida qobiliyatimni namoyon etaman, degan oʻqituvchining qoʻllari uzun, tillari burro. Mustaqil davlatimizda taʼlim tizimi tubdan isloh qilindi.  9 yillik umumiy taʼlimdan soʻng umumtaʼlim maktablarining bitiruvchilari akademik litsey va kasb-hunar kollejlarida oʻqishlari, ham ilm, ham kasb-kor oʻrganishlari uchun 12 yillik bepul uzluksiz taʼlim tizimi joriy etildi. Tizimga har yili yangi-yangi innovatsion gʻoyalar, texnologiyalarning joriy etilishi, yosh avlod tarbiyasiga davlatimizning cheksiz gʻamxoʻrligi bois, soha jahon standartlari darajasida bellasha oladigan mutaxassis kadrlar bilan boyidi. Natijada taʼlim-tarbiya sohasida katta yutuqlarga erishilmoqda.

Bizning 22-sonli umumtaʼlim maktabimiz tumanimizdagi tayanch ilm maskanlaridan hisoblanadi. Yillar davomida bu bilim dargohini bitirgan ming-minglab sobiq oʻquvchilar orasida yuzlab malakali shifokorlar, muhandis va pedagoglar, shoir-u yozuvchilar, ilm-fan namoyondalari yetishib chiqdi. Mustaqillik davrida maktabimiz tamoman yangilangan ilm dargohiga aylandi. Yangi, zamonaviy maktab binosida oʻquvchilarning fan asoslarini oʻzlashtirishlari uchun yetarli shart-sharoitlar yaratilgan. Ayniqsa, chet tillarini puxta oʻrganishlariga alohida eʼtibor qaratilayotgani bois, maktabimiz oʻquvchilari orasida har yili chet tillari boʻyicha fan olimpiadalari gʻoliblari yetishib chiqmoqda.

Prezidentimiz I.A.Karimovning 2012-yil 10-dekabrdagi "Chet tillarni oʻrganish tizimini yanada takomillashtirish chora-tadbirlari toʻgʻrisida”gi qarori maktabimiz chet tillari fan oʻqituvchilari uchun yanada keng imkon eshiklarini ochib berdi. Chunki ingliz va frantsuz tillarida dars oʻtiladigan sinflarda har xil bayram sanalari munosabati bilan oʻtkaziladigan tadbirlar, musiqiy kechalar ingliz, frantsuz va rus tillarda oʻtkazilishiga alohida eʼtibor berildi. Maktab oʻquv-ilmiy ishlari boʻyicha direktor muovini Madamin Rahimov chet tillari fan xonalarini koʻrgazmali qurollar bilan bezatishda fan oʻqituvchilariga yaqindan yordam koʻrsatishi esa muvaffaqiyatlar garovi boʻldi. Sinflararo bellashuvlarda oʻquvchilar ingliz, frantsuz va rus tillarida savol-javoblar qilib, oʻzaro muloqotga kirishishni qisqa fursatda oʻzlashtirib oldilar. Maktabimizning 8-sinf oʻquvchisi Oʻgʻiljon Bekmurodova esa yaqinda frantsuz tili boʻyicha bilimlar bellashuvining Qoraqalpogʻiston Respublikasi bosqichida faxrli 1-oʻrinni egallab, bellashuvning Oʻzbekiston miqyosidagi bosqichiga yoʻllanma oldi.

Xalqimizda: bola - boshidan, degan ibora bor. Bu – bolaga goʻdak, deb emas, balki bir hamsuhbat doʻst deb qarash va uning fikrlari bilan qiziqish, uni qoʻllab-quvvatlash, bola qalbidagi orzulari gul ochishiga yordam berish degani. Qolaversa, bola tashqi taʼsirga tez moslasha oladi, yaxshimi, yomonmi, har qanday holatni oʻziga osonlik bilan yuqtiradi. Shu bois, uni juda erta tushunib olishimiz, bola dunyosi ichida yashab, uning toʻgʻri tarbiya olishi uchun harakat qilishimiz kerak. Ayniqsa, chet tillarini oʻrgatish jarayonida biz murabbiylar bolaning har bir savoliga, qiziqishlariga toʻgʻri munosabat bildira olsak, uning til oʻrganishga boʻlgan ishtiyoqini yanada rivojlantirgan boʻlamiz.

Roza Yoʻldosheva,

22-sonli maktabning chet tili fani oʻqituvchisi.

(Foto - http://fikr.uz)