30-iyun – Yoshlar kuni munosabati bilan Amudaryo tumani hokimi Sultonboy Yoʻldashevning amudaryolik yoshlarga bayram tabrigi

Aziz yoshlar, qadrli yurtdoshlar!

Avvalambor, Siz azizlarni, Sizning timsolingizda tumanimizning barcha yoshlarini “Yangi Oʻzbekiston yoshlari – birlashaylik!” shiori ostida nishonlanayotgan Yoshlar kuni bayrami bilan chin dildan muborakbod etaman! 

Hurmatli Prezidentimizning, davlatimiz va hukumatimizning beqiyos gʻamxoʻrligi, eʼtibori tufayli keyingi yillarda mamlakatimizda Yoshlarga oid davlat siyosatining yangi bosqichi boshlanib, bugun Oʻzbekiston yoshlari hayotidagi tub burilishlar davri keldi, desam aslo mubolagʻa boʻlmaydi.

Prezidentimiz tashabbuslari bilan 2017 yilda 30 iyun sanasi Yoshlar kuni bayrami sifatida belgilanib, mustaqil vatanimiz solnomasidan munosib oʻrin egallagani nafaqat yoshlarimiz, balki butun xalqimiz hayotida tarixiy voqea boʻlgan edi.

Bugun hayotimizning qaysi soha va tarmogʻini olmaylik, yoshlarga eʼtibor va gʻamxoʻrlik asosiy oʻringa koʻtarilib, ularga zarur sharoit va imkoniyatlar yaratib berilmoqda.

Bu yil tumanimizda 2 704 nafar oʻquvchi yoshlar maktablarning 11-sinflarini, 361 nafar yoshlar kasb hunar maktablarini, 56 nafar muxandistlik texnikuminilarini tamomlamoqda. Hech shubhasiz, oʻz bilim va isteʼdodini yurtimiz va xalqimizga munosib farzand boʻlishdek olijanob maqsadlarga sarflashga chogʻlanib turgan sizdek tirishqoq va intiluvchan farzandlarimiz bizning tayanchimiz va suyanchimiz, Yangi Oʻzbekistonning bebaho xazinasidir.

Bugun maktabni tamomlayotgan har bir oʻquvchi uchun hayotidagi yana bir muhim eshiklardan biri ochilmoqda. Bu – katta hayotga yoʻl demakdir! Ushbu yoʻlda toʻgʻri tanlov qilib, oʻzingiz uchun sevimli va kerakli kasbni egallashingizga, barcha muvaffaqiyatsizlik, toʻsiqlarni chetlab oʻtib, yuksak marralarni zabt etishingizga tilakdoshmiz!

2022-2023 oʻquv yili yakuni boʻyicha mana shunday tirishqoq va iqtidorli oʻquvchi yoshlarimizning 36 nafari umumtaʼlim maktablarida fanlarni aʼlo baholarga oʻzlashtirib, oltin medal, 11 nafari esa kumush medal sohib va sohibalari boʻlishdi. Bundan tashqari 49 nafar yoshlarimiz ingliz tili boʻyicha xalqaro V2 va 5 nafar S1 sertifikatini qoʻlga kiritgan.

3 nafar bitruvchi yoshlarimiz muddatidan oldin oliy taʼlim muassasalariga imtihonlarsiz kirish boʻyicha sertifikat bilan taqdirlanib, talabalar qatoridan joy olishdi.

Qadrli yoshlar!

Xabaringiz bor, keyingi paytlarda kelajagimiz egalari boʻlgan oʻgʻil-qizlarimiz bilan ishlashning mutlaqo yangi tizimi – “Yoshlar daftari” va “Yoshlar dasturi” hamda Yoshlar platformasi hayotga keng tatbiq etildi.

Olib borilgan amaliy ishlar natijasida oʻtgan 6 oy mobaynida “Yoshlar daftari”ga kirgan 805 nafar yigit-qizlarning muammolarini hal etish uchun “Yoshlar jamgʻarmasi” 1 mlrd 557,6 mln soʻm mablagʻ ajratildi. Ushbu mablagʻlar hisobidan “Temir daftar”dagi oilalar farzandlari boʻlgan 244 nafar talabalarning 560,8 mln soʻmlik kontrakt puli toʻlab berildi. Tadbirkorlik bilan shugʻullanmoqchi yoki oʻzini oʻzi band qilish faoliyatini boshlamoqchi boʻlgan 140 nafar yoshlarga jami 565 mln soʻmlik asbob-uskunalar olib berildi. 208 nafar yoshlarimizga 235 mln soʻmlik turli xil ijtimoiy-iqtisodiy yordamlar turlari koʻrsatildi.

Bundan tashqari, 581 nafar yoshlarimiz tijorat banklari tomonidan 8 mlrd 325 mln soʻm imtiyozli kredit mablagʻlari ajratish orqali, 357 nafar yoshlarimiz 30-yil muddatga 285,6 ga yer maydonlarini ijaraga olish orqali, 157 nafar yoshlarimiz esa korxona va tashkilotlarga doimiy ishlarga joylashish orqali doimiy daromad manbaiga ega boʻldilar.

Hurmatli yurtdoshlar, aziz yoshlar!

Yoshlar bilan ishlashni samarali tashkil etish, ularning madaniyat, sanʼat, adabiyot, sport, axborot texnologiyalari, kitob oʻqishga qiziqishini oshirish boʻyicha Prezidentimizning 5 ta muhim tashabbusi orzu va intilishlaringizga chinakam qanot boʻlmoqda desak, aslo mubolagʻa boʻlmaydi.

Bu borada tumanimiz yoshlarining boʻsh vaqtlarini mazmunli oʻtkazish hamda sogʻlom turmush tarzini targʻib qilish, kelajagimiz egalari bulmish yoshlarning ijtimoiy faolligini oshirish maqsadida “mahalla-sektor-tuman” yoʻnalishi boʻyicha “Besh tashabbus olimpiadasi” tadbirlari oʻtkazildi.

2022-2023-yillarda “Besh tashabbus olimpiadasi”ning Oʻzbekiston Respublikasi bosqichida 17 nafar tumanimiz yoshlari gʻoliblikni qoʻlga kiritgan boʻlib, ulardan 6 nafari 1- oʻrin, 6 nafari 2-oʻrin va 5 nafari 3-oʻrinlarni egallashdi. Gʻolib boʻlgan sportchilarimizning mahallasiga sport maydonchalari qurib beriladi.

Shuningdek, “Yosh kitobxon oila” yoʻnalishida Respublika bosqichida Oʻrinboyevlar oilasi faxrli 1-oʻrinni egallab, “Spark” avtomobili sohibi boʻlishdi.

Aziz yoshlar!

Tuman rahbari sifatida, tuman hokimligi Sizni har doim qoʻllab-quvvatlashga tayyor ekanini, yoshlarning iqtidor va salohiyatlarini yuzaga chiqarishga doir ezgu ishlarimiz bundan keyin ham bardavom boʻlishini alohida taʼkidlamoqchiman.

Ishonamanki, Sizday shijoatli, gʻayratli, vatanparvar yoshlarimiz bor ekan, yukimiz hech qachon yerda qolmaydi. Koʻzlagan yuksak marralarimizni dadillik bilan zabt etaveramiz!

Qadrli yoshlar!

Sizlarni yana bir bor bugungi bayram – Yoshlik, Shijoat, Kuch-qudrat va Matonat ayyomi bilan chin qalbimdan muborakbod etib, oʻqish va ishlaringizda, oilaviy hayotingizda ulkan muvaffaqiyatlar tilayman!

Yana bir bor bayramlaringiz muborak boʻlsin!