BOʻSh ISh OʻRINLARINI YaShIRISh HUQUQBUZARLIKDIR

Hozirgi kunda yurtimizda yangidan yangi boʻsh ish oʻrinlari yaratilib, fuqarolarning ish bilan bandlik darajasi oshmoqda. Boʻsh ish oʻrinlarini xalqqa tanishtirishda mahalliy Bandlikka koʻmaklashish markazlarining oʻrni katta. Bu borada mahalliy mehnat organlari aholini ish bilan taʼminlash sohasidagi davlat siyosatining bir nechta printsiplariga asoslanadi.

Korxona va tashkilotlarning aholini ish bilan taʼminlash sohasidagi davlat siyosatini amalga oshirishdagi ishtiroki ham katta ahamiyatga ega.

Korxona va tashkilotlar ish bilan taʼminlash sohasidagi davlat siyosatini amalga oshirishga mehnatga oid munosabatlarni tartibga soluvchi shartnoma va kelishuvlar shartlarini bajarishi, boʻsh ish joylari (vakant lavozimlar) bor-yoʻqligi toʻgʻrisidagi maʼlumotlarni oldindan (kamida ikki oy oldin) mahalliy mehnat organiga moʻljallanayotgan ishdan ozod qilishlar toʻgʻrisidagi axborotlarni boʻshab qoladigan har bir xodimni koʻrsatgan holda taqdim etish, boʻsh ish joylari bor-yoʻqligi toʻgʻrisidagi maʼlumotlarni hamda xodimlarning ishdan ozod qilinishi toʻgʻrisidagi axborotlarni taqdim etishi bilan koʻmaklashadilar.

Tuman Bandlikka koʻmaklashish markazi tomonidan joriy yilning 10 oyi davomida tumandagi  20 ta korxona va tashkilotlarda mehnat qonunchiligiga rioya qilinishi yuzasidan tekshirishlar oʻtkazildi. Natijada 80 ta holatda qonun buzilishlar aniqlandi. Qonunbuzilishlarga yoʻl qoʻygan 15 nafar mansabdor shaxslarga Oʻzbekiston Respublikasi Maʼmuriy javobgarlik toʻgʻrisida”gi Kodeksining 49-moddasiga asosan 4,2 mln. soʻmlik jarimalar solindi. Boʻsh ish joylari (vakant lavozimlar) bor-yoʻqligi toʻgʻrisidagi maʼlumotlarni topshirmagan 9 nafar mansabdor shaxsga 3,8 mln. soʻm jarima solindi. Korxona va tashkilotlar rahbarlari shuni bilishlari lozimki, boʻsh ish joylari (vakant lavozimlar) bor-yoʻqligi toʻgʻrisidagi maʼlumotlarni har oyning 5 sanasigacha topshirishlari zarur. Boʻsh ish oʻrinlari (vakant lavozimlar) bor-yoʻqligi toʻgʻrisidagi maʼlumotlarni har oyning 5 sanasigacha topshirmagan mansabdor shaxslarga "Maʼmuriy javobgarlik toʻgʻrisida”gi kodeksning 229-moddasiga binoan, boʻsh ish joylari (boʻsh lavozimlar)ni yashirish, boʻshatib olinishi kutilayotgan xodimlar toʻgʻrisidagi maʼlumotlarni oʻz vaqtida bermaslik, davlat jamgʻarmasiga ajratmalarni toʻlashdan boʻyin tovlash eng kam ish haqining uch baravaridan besh baravarigacha miqdorda jarima solishga sabab boʻladi.

Bunday holatni takror sodir etgan mansabdor shaxsga jinoiy javobgarlik belgilanadi.

Xalqimizni ishsizlikdan ishonchli himoya qilishga, yangi ish oʻrinlari yaratishga va boʻshagan vakant lavozimlar haqida xabardorligi taʼminlanishiga hissa qoʻshish bugungi kunning eng dolzarb vazifalaridandir. 

A.XOʻJAMURODOV, 

tuman Bandlikka koʻmaklashish markazi direktori.