Siyosat 30.07.2017 👁 3,839

Tumandagi tijorat banklari tomonidan tadbirkorlikni rivojlantirish va ish oʻrinlarini tashkil qilish maqsadida kredit mablagʻlarining ajratilishi toʻgʻrisida tuman hokimi birinchi oʻrinbosarining hisoboti toʻgʻrisida

Xalq deputatlari Amudaryo tuman Kengashi QARORI

Amudaryo tumanida 2017-yilning 6 oyi davomida tijorat banklari tomonidan tadbirkorlikni rivojlantirish va ish oʻrinlarini tashkil qilish maqsadida kredit mablagʻlarining ajratilishi toʻgʻrisidagi masala yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari M.Temirboyevning hisobotini tinglab va muhokama qilib, "Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-, 24-moddalariga asosan xalq deputatlari tuman Kengashi QAROR QILADI:

1. Amudaryo tumanida 2017-yilning 6 oyi davomida tijorat banklari tomonidan tadbirkorlikni rivojlantirish va ish oʻrinlarini tashkil qilish maqsadida kredit mablagʻlarining ajratilishi toʻgʻrisidagi masala yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari M.Temirboyevning hisoboti maʼlumot uchun qabul qilinsin.

2. Tadbirkorlikni rivojlantirish va qoʻllab-quvvatlash hamda ish oʻrinlarini tashkil etish maqsadida:

2017 yilning oʻtgan 6 oyi davomida tadbirkorlik subʼektlariga tijorat banklari tomonidan umumiy qiymati 44 mlrd. 404,4 mln. soʻm miqdorida kredit mablagʻlari ajratilganligi;

shundan, kichik biznes subʼektlariga sanoat sohasi, xizmat koʻrsatish va sevris, qishloq xoʻjaligi, tovar aylanmasi hamda boshlangʻich tovar aylanmasi uchun jami 22 mlrd. 578,2 mln. soʻm kredit mablagʻlari ajratilganligi;

Oʻzbekiston Respublikasi Prezidentining 2015-yil 6-maydagi "Tijorat banklarining moliyaviy barqarorligini yanada oshirish va ularning resurs bazasini rivojlantirish chora-tadbirlari toʻgʻrisida”gi PQ-2344-sonli qarori ijrosini taʼminlash yuzasidan chorvachilik, parrandachilik, issiqxonalar tashkil qilish va boshqa sohalarni rivojlantirish maqsadida jami 1234 ta oilaga 7 mlrd 941.3 mln soʻmlik imtiyozli kredit mablagʻlari ajratilganligi qayd etilsin.

3. Tumandagi tijorat banklari tomonidan tadbirkorlikni qoʻllab-quvvatlash, aholining bandligini taʼminlash, sanoat, qishloq xoʻjaligi hamda xizmat koʻrsatish va servis sohalarini rivojlantirish hamda aholi shaxsiy tomorqalari va chorvachilikni rivojlantirish uchun "Agrobank” ATB tuman filiali (R.Raximov) tomonidan 9 ta loyihaga 1 mlrd. 530 mln. soʻm va tomorqa kreditlari boʻyicha 5 ta oilaga 23,8 mln. soʻm, "Mikrokreditbank” ATB tuman filiali (E.Kurbanov) tomonidan 11 ta loyihaga 795 mln. soʻm va tomorqa kreditlari boʻyicha 16 ta oilaga 48 mln. soʻm, Xalq banki tuman filiali tomonidan aholi shaxsiy tomorqalari va chorvachilikni rivojlantirish uchun 2 ta oilaga 15 mln. soʻm jami 2 mlrd. 411,8 mln. soʻm kredit mablagʻlari ajratilmaganligi koʻrsatib oʻtilsin.

4. Tuman hokimining iqtisodiyot va tadbirkorlik masalalari boʻyicha birinchi oʻrinbosari M.Temirboyev Oʻzbekiston Respublikasi Prezidentining 2017 yil 19-iyunda qabul qilingan "Biznesning qonuniy manfaatlari davlat tomonidan muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar toʻgʻrisida”gi PF-5087-sonli Farmonidan kelib chiqib, tumanda tadbirkorlik faoliyatini yanada rivojlantirish, ularni har tomonlama qoʻllab-quvvatlash, huquq va manfaatlarini himoya qilish, shuningdek, tijorat banklar bilan birgalikda aholini tadbirkorlikka keng jalb qilish orqali yangi ish oʻrinlarini tashkil qilish maqsadida ularga imtiyozli kreditlar ajratish ishlarini tizimli ravishda olib borish choralarni koʻrish topshirilsin.

5. Tuman tijorat banklariga (E.Kurbanov, R.Raximov, Sh.Sadikova):

- tumanda tadbirkorlik sohasining rivojlanishini taʼminlash, uy mehnatining barcha turlarini rivojlantirish orqali imtiyozli kreditlar berish asosida yangi ish oʻrinlarini tashkil etishni amalga oshirish;

- tumanni ijtimoiy-iqtisodiy rivojlantirish davlat dasturlariga kiritilgan loyihalarga oʻz vaqtida kredit mablagʻlarining ajratilishini taʼminlash;

- tuman aholisining tadbirkorlikka boʻlgan ehtiyojini aniqlagan holda zarur miqdorda imtiyozli kredit mablagʻlari ajratish, fermer va dehqon xoʻjaliklarini rivojlantirish hisobidan ish oʻrinlari sonini koʻpaytirishga alohida eʼtibor qaratish topshirilsin.

6. Xalq deputatlari tuman Kengashi deputatlariga oʻz saylov okruglarida imtiyozli kreditlar berish asosida tadbirkorlik va kichik biznes subʼektlari tashkil qilishda faol ish olib borish hamda oilaviy tadbirkorlikni keng targʻib qilish orqali yangi ish oʻrinlarini yaratish boʻyicha targʻibot-tashviqot ishlarini olib borishda oʻz hissalarini qoʻshish topshirilsin.

7. Ushbu qaror "Taraqqiyot koʻzgusi” gazetasida, xalq deputatlari tuman Kengashi va tuman hokimligining rasmiy veb-saytlarida eʼlon qilinsin.

8. Ushbu qarorning ijrosini nazorat qilish xalq deputatlari tuman Kengashining mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari doimiy komissiyasi raisi M.Kazakov zimmasiga yuklatilsin.

9. Ushbu qaror qabul qilingan kundan eʼtiboran kuchga kiradi.

Xalq deputatlari Amudaryo

tuman Kengashi raisi: S.Yoʻldashev

2017-yil 29-iyul,

№ 130/35-05