"Obod turmush yili" yangiliklari

Til oʻrganish – dunyoga chiqish demakdir…

Xorijiy tillarni puxta oʻzlashtirish – mamlakatning iqtisodiy salohiyatini yuksaltirish, chet ellik ishbilarmonlar bilan davlat ahamiyatiga molik shartnomalar tuzish, ishlab chiqarish va sanoatni modernizatsiya qilish, taʼlim tizimini yanada takomillashtirishda muhim omil hisoblanadi. Shu bois, Prezidentimiz I.A.Karimovning 2012-yil 10-dekabrdagi "Chet tillarni oʻrgatishni yanada takomillashtirish chora-tadbirlari toʻgʻrisida”gi qarori har bir chet tili fani yilning aprel-may oylarida NDPI qoshidagi Amudaryo akademik litseyidan 4 nafar ingliz tili fani oʻqituvchilari respublikamizdagi nufuzli malaka oshirish kurslarida tahsil olib qaytishdi. Mazkur kurslarda yuqori natijaga erishgan Orzigul Ibragimova ayni paytda akademik litseyning ingliz tili fani oʻqituvchilari uchun maxsus seminar-trening oʻtkazib, litsey oʻqituvchilariga chet tillarini oʻqitish borasidagi eng soʻnggi yangiliklar haqida zarur tushunchalar bermoqda.

Saxovatli bolalar

Tumanimizdagi 80-sonli umumtaʼlim maktabida "Oila-mahalla-maktab” hamkorligi yoʻnalishining "Saxovatli bolalar” boʻlimi faoliyatidan nafaqat maktab jamoasi, balki ota-onalar va mahalla ahli ham mamnun. Chunki maktabning "Saxovatli bolalar” boʻlimi aʼzolari hududdagi imkoniyati cheklangan tengqur doʻstlari ahvolidan tez-tez xabar olishib, ularning fanlardan yaxshi oʻzlashtirishlariga yordam beradilar. Hamkorlikda dars tayyorlashib, tengqur doʻstlarini turli bayram sanalarida yoʻqlab birga xursandchilik qiladilar. Ularning bu maʼnaviy himmatidan barcha xursand.

Ahillik bor joyda hamisha fayz-baraka, rivojlanish boʻladi. Buni "Taraqqiyot koʻzgusi” gazetasi, Amudaryo televideniyesi tahririyatlari ijodiy jamoalari hamda tuman Davlat arxivi, «Mangʻit matbaasi» xususiy korxonasi misolida yaqqol koʻrish mumkin. Shu yilning 19-may kuni Xiva shahriga uyushtirishgan sayohatda mazkur idora va muassasa xodimlari hamda ularning farzandlari miriqib dam olishdi. Shaharning tarixiy obidalari bilan tanishib, safardan katta taassurotlar bilan qaytishdi.

Barkamol avlod tarbiyasi yoʻlida

Amudaryo melioratsiya va suv xoʻjaligi kasb-hunar kolleji oʻquvchilari "Barkamol avlod” sport oʻyinlari hamisha faxrli oʻrinlarni egallab kelmoqdalar. Shu yilning aprel oyida sport oʻyinlarining voleybol turi boʻyicha Nukus shahrida boʻlib oʻtgan Qoraqalpogʻiston Respublikasi bosqichida kollejning oʻgʻil bolalar jamoasi uchinchi oʻrinni, qizlar jamoasi esa 4-oʻrinni egallashga muvaffaq boʻldilar. Kollej oʻquvchilarini sport oʻyinlariga tayyorlashda murabbiylar rahbari Marat Jarliqapov va maxsus fan oʻqituvchisi Otabek Kamolovlarning hissalari katta boʻldi.

Asalarichilik rivojlanadi

Qipchoq davlat oʻrmon xoʻjaligida yordamchi xoʻjaliklarni rivojlantirish maqsadida bir qancha ibratli ishlar amalga oshirilmoqda. Oʻrmon xoʻjaligi xodimlari yaqinda Navoiy viloyatining Konimex tumanida faoliyat koʻrsatayotgan "Gulbogʻ - Umidraxmiddin” asalarichilik fermer xoʻjaligi bilan shartnoma tuzib, 74 ta asalari oilasini olib kelishdi. - Konimexliklar bilan hamkorlik qilishdan maqsad – ularning ish tajribalari va yordami asosida tumanimizda yetti xazinaning biri boʻlgan asalarichilikni yanada rivojlantirishdir, - deydi oʻrmon xoʻjaligi boshligʻi oʻrinbosari Farxod Mamkarimov.