KASBIDAN KAMOL TOPGAN INSON

Hayotda shunday insonlar boʻladiki, garchi boshqa soha vakili boʻlsa-da, kasb mashaqqatlarini yengishni, sharafini his qilishni, sadoqat, fidoyilikni ulardan oʻrganasan va umr boʻyi yaxshilar qatori hurmat-ehtirom bilan eslab yurasan.

Sobiq 4-sonli Mangʻit bosmaxonasida chop qiluvchi boʻlib 35-yildan ortiq mehnat qilib, ayni kunda keksalikning gashtini surib, farzandlari, nevaralari ardogʻida yashayotgan, "Oʻrta qalʼa” ovulida istiqomat qiluvchi Jumaboy aka Boltaboyev ana shunday eʼzozli insonlarning biridir.

Men "Amudaryo haqiqati” gazetasi tahririyatida ish boshlagan kezlarim - 1985-yilda u bosmaxonada gazeta chop qiluvchi boʻlib ishlardi. U paytlarda materiallar linotip mashinasida, qoʻrgʻoshinda terilib, sahifalanar, shu bois, navbatchiliklar  yarim tunga, baʼzan tonggacha ham davom etardi. Shunday damlarda chop qiluvchi Jumaboy aka Boltaboyev charchasak-da shoshmaslikni, matn xatolarining tuzatilganini sinchkovlik bilan qarab  chiqishni uqtirardi doim. Har gal imzo qoʻyib, Jumaboy akaga topshirib ketgan sahifalarimiz ertalab hali buyogʻi qurimagan gazetaga aylanib, taxlanib turganini koʻrib quvonib ketardim. Shunday damlarda gazeta taxlamlari yonida horgʻin qiyofada, biroq jilmayib, gazetani chop qilgan odam – Jumaboy aka turardi.

Uning haftaning uch kunida hayoti shunday kechardi. Axir u paytlarda gazeta haftasiga uch marta yorugʻlikka chiqardi. Inson oʻzi tanlagan kasbi uchun qanchalik fidoyi boʻlishi kerakligini men oʻsha  kishi timsolida yurak-yuragimdan his qilganman.

Jumaboy Boltaboyevning bosmaxonadagi mehnat faoliyati 1969-yildan boshlandi. U turli buyurtmalar, ish qogʻozlari va gazeta chop qilishni shu kasbda ishlaydigan Rajab Abdullayevdan oʻrgandi. Hademay oʻzi  ham mustaqil ishlay oladigan boʻldi. Oʻsha vaqtdagi bosmaxonaning direktori Bekish Jumamurodov (xudo rahmat qilsin!) uning tirishqoqligini inobatga olib, eng masʼuliyatli ish - gazeta chop qiladigan mashinani ishlatishni ishonib topshirdi. U shu kasbda 35-yildan ortiq mehnat qildi, jamoasida obroʻ-eʼtibor qozondi.

- Gazeta tahririyati va 4-bosmaxona mehnat jamoalari bir ota-ona farzandlariday  ahil-inoqlikda ishlagan damlarimiz doim koʻz oʻngimda. Sobiq kasbdoshlarim Gulandom Yangiboyeva, Oʻrozgul Habibullayeva, Jumaboy Abdullayev, Davlatboy Ochilov Jumagul Yerdosheva, Gulsara Oʻrozboyeva, Dilbar Jumamurodova, Ulboʻlsin Obdalova, Norgul Yusupova, Gulbahor Ibrohimova, Rajabboy Haytimbetovlarni xuddi tugʻishganlarimni sogʻingandek sogʻinaman, eslab oʻtiraman, - deydi xayolga berilib Jumaboy aka.

Ayni kunda Jumaboy Boltaboyev umrining 70-yilini qarshi olgan boʻlsa-da, hamon tetik, ziyrak. Koʻzlari nursizlanib qolganiga qaramay, radio eshitadi, televizor – ermagi. Dunyo voqealaridan boxabar boʻlib, oʻzicha xulosalar chiqarib, farzandlarini ezgulikka undab oʻtiradi, umrdoshi Bikajon opa bilan  farzandlarining kamolidan quvonib yashaydi.

Inson uchun oʻzining bosib oʻtgan hayot yoʻlidan mamnuniyat bilan yashamogʻi – ulkan baxt. Ana shunday baxtga erishgan Jumaboy Boltaboyevni sohamiz xodimlari uchun ulkan shodiyona  - 27-iyun – Matbuot va ommaviy axborot vositalari xodimlari kuni bilan qutlab, uzoq umr, sihat-salomatlik tilab qolamiz.

Oygul RAJABOVA.