BUGUNNING BOLALARI

Aylanay Mustaqillik! Aylanayin ERK,

Sen bilan oʻzligin angladi oʻzbek!

Vatan ulugʻ yoʻlda! Ochayotir koʻrk,

Har koʻngil oʻz yeri, oʻz eliga Bek –

Istiqlol ufqlari porloq bolalar!

Kecha joʻyaklarda koʻz yorgan ona –

Bugun Baxt koʻshkida! Vatan – parvona.

Muhabbat chashmida ungan homila

Dunyoga kelguncha cheksiz himoya –

Sogʻlom tugʻilsin deb goʻdak – bolalar!

Qarang, mahallalar bagʻrin toʻldirib,

Oila chamani gullar qulf urib.

Mehr ummonlari aro choʻmilib,

Baxtiyor bolalik gashtini surib,

Ulgʻayar boʻlgʻusi podshoh bolalar.

Sogʻlom ona-bola – sogʻlom kelajak –

Ustuvor siyosat mangu qolajak.

Ona yurt koʻksida gul ochgan chechak

Dunyo ayvoniga qadam qoʻyajak –

Nigohlari olov – chaqnoq bolalar!

Barining koʻksida gʻurur, iftixor,

Hurriyat shavqidan dillarda viqor.

Bundayin tinch hayot ayting, qayda bor?

Keksalar duoda, shukr etar ming bor:

– Omon boʻlsin qalbi uygʻoq bolalar!

Ey, ota makonim, mulki Turonim,

Ozod yurtim mening, Oʻzbekistonim!

Buyuk Jaloliddin siyoqli mardim,

Amir Temur yangligʻ sohibqironim –

Elga qaytmish dono, hoqon Bolalar!

Robiya YOʻLDOShEVA.

(Foto - http://uza.uz)