FAROVON MAHALLASI TADBIRKORLARIDAN MAHALLA BOLALARI XURSAND BOʻLIShDI

“Bir miskinning koʻnglini obod etish – Kaʼbani ziyorat qilgan bilan barobar”, – degan gap bor xalqimizda. Haqiqatdan ham, ayrim sabablarga koʻra oilasi boquvchisidan ayrilgan miskin qalblar, nogironligi bor, oʻzgalar  mehriga muhtoj insonlarga quvonch  bagʻishlab, ularning hayotlariga ozgina boʻlsa-da nurafshonlik, shodlik baxsh etib yashash – odamiylikning eng ezgu fazilatlaridan sanaladi.

Joriy yilning har bir kunini inson qadr-qimmatini ulugʻlash, ijtimoiy himoyaga  muhtoj aholi qatlamini moddiy va maʼnaviy qoʻllab-quvvatlashga qaratilgan tadbirlar asosida, xalq bilan birga, bahamjihat oʻtkazishni niyat qilib, ana shu ezgu niyat  roʻyobi uchun tizimli ishlarni  amalga oshirayotgan Amudaryo tumanining Farovon mahalla fuqarolar yigʻini masʼullari deyarli har kuni xalq orasida. Ayniqsa, turli bayram  sanalari munosabati bilan mahalla oqsoqoli Madamin Kazakov, hokim yordamchisi Muqaddas Beknazarova, oila va xotin-qizlar masalalari boʻyicha mutaxassis Sayyora Qoraboyevalar hamkorlikda har bir koʻcha va har bitta xonadonga kirib borib, mahalla ahli hayotiga oid muammoli masalalarni joyida oʻrganish va tegishli tashkilotlarga havola  etishga harakat qilishadi.

Farovonliklar turli bayram sanalarini hamjihatlik va xursandlik bilan nishonlashga harakat qilishadi. Xususan, 1-iyun – Xalqaro bolalarni himoya qilish kuni munosabati bilan oʻtkazilgan bayram tadbiri ham mahalla ahli uchun haqiqiy xayr-saxovat va mehr-oqibat bayramiga aylanib ketdi. Mahallada oʻtkaziladigan bunday tadbirlarga koʻpincha saxovatpesha tadbirkorlar homiylik qilishadi.

Mahallada istiqomat qiluvchi tadbirkorlar Shukurulloh Sultonov va Akmaljon Matqurbonovlarning begʻaraz saʼy-harakatlari bilan tashkillashtirilgan 1-iyun – Xalqaro bolalarni himoya qilish kuniga bagʻishlangan bayram tadbirida ham mahalla ahli uchun yorqin taassurotlarga boy boʻldi. Bayramda Amudaryo tuman Nogironlar jamiyati raisi Nilufar Xolboyeva, shuningdek, ijtimoiy himoyaga muhtoj, boquvchisini yoʻqotgan, otasi yoki onasidan biri jazoni ijro etish maskanlarida jazo muddatini oʻtayotgan oilalarning farzandlari ishtirok etishdi.

Tadbirda Farovon mahalla fuqarolar yigʻini raisi Madamin Kazakov va Amudaryo tumani Nogironlar jamiyati raisi Nilufar Xolboyevalar barchani 1-iyun – Xalqaro bolalarni himoya qilish kuni munosabati bilan tabrikladilar. Mahallaning saxovatpesha tadbirkorlari Shukurulloh Sultonov va Akmaljon Matqurbonovlar mahalladagi kam taʼminlangan oilalarning farzandlari, shuningdek, nogironligi boʻlgan bolalardan 15 nafariga oʻzlarining shaxsiy sovgʻalarini topshirishdi.

Yaxshi soʻz, ezgu tilaklar va maʼnaviy ragʻbatdan koʻngillari charogʻon boʻlgan bolajonlar va ularning ota-onalari, yaqinlari uchun bayram tadbiri yanada zavqli onlarni hadya etdi. Bolajonlar el-yurt, xalq mehr-muhabbatidan bahra olib, qalblari yanada ezgu tuygʻularga toʻldi.

Tadbir davomida Farovon mahallasi bolalari doʻstlik, tinchlik, ona Vatan haqida sheʼrlar aytishib, bir-birlarini bayram bilan muborakbod etishdi. Mahalla tadbirkorlari tomonidan yozilgan fayzli dasturxon atrofida oʻtkazilgan bayram tadbiri barchaga xush kayfiyat bagʻishladi.

Robiya YOʻLDOShEVA.