“Obod turmush yili“ yangiliklari

FUQAROLAR YIGʻINLARI XODIMLARI UChUN SEMINAR

13-15-may kunlari tumanimizda fuqarolar yigʻini raisi (oqsoqoli), masʼul kotibi, yigʻinning diniy-maʼrifat va maʼnaviy-ahloqiy tarbiya masalalari boʻyicha maslahatchisi, «Mahalla posboni» jamoatchilik tuzilmasi rahbarlarining malakasini oshirish boʻyicha oʻquv-seminari boʻlib oʻtdi. Seminarda tumandagi 47 ta fuqarolar yigʻinlarining raislari, masʼul kotiblari, yigʻinning diniy-maʼrifat va maʼnaviy-ahloqiy tarbiya masalalari boʻyicha maslahatchilari, «Mahalla posboni» jamoatchilik tuzilmasi rahbarlaridan iborat jami 202 nafar xodim ishtirok etdi.

3 kun davom etgan ushbu seminar oʻzini-oʻzi boshqarish organlarining kelgusidagi faoliyati yanada yaxshilanishiga, shu orqali hududlarda ijtimoiy-iqtisodiy yuksalishning oʻsishiga zamin yaratadi.

GʻAMXOʻRLIK IFODASI

Tuman bandlikka koʻmaklashish va aholini ijtimoiy muhofaza qilish Markazi tomonidan oʻzgalar parvarishiga muhtoj yakka-yolgʻiz kishilar va nogironlarga Prezidentimiz qaror va farmonlariga muvofiq doimo gʻamxoʻrlik koʻrsatib kelinmoqda.

Shu yilning birinchi choragi davomida 143 nafar yakka-yolgʻiz kishilar va nogironlar dispanser koʻrigidan oʻtkazildi. Koʻrik natijasi boʻyicha ularning hammasi statsionar va ambulator sharoitlarida sogʻlomlashtirildi.

Yolgʻizlarga ijtimoiy xizmat koʻrsatish maqsadida 11 million 551 ming soʻm pul sarflandi, ulardan 43 nafariga 3 million 225 ming soʻmlik moddiy yordam koʻrsatildi, keksalar, pensionerlar va nogironlardan 23 nafariga sihatgohlarga yoʻllanmalar berildi.

Oʻzgalarning parvarishiga muhtoj 125 nafar yakka-yolgʻiz pensionerlarga 9 xil oziq-ovqat mahsulotlari va kir yuvish vositalari har oyda belgilangan miqdorda bepul yetkazib berilmoqda.

NOQONUNIY USKUNA UChUN JARIMA

Tuman ichki ishlar boʻlimi huzuridagi yongʻin xavfsizligi boʻlinmasi xodimlari tomonidan tumanimiz xonadonlarida yongʻin xavfsizligini taʼminlash maqsadida OFY va MFYlar huzuridagi profilaktika nozirlari, "Shimolgaztaʼminot” unitar korxonasining Amudaryo tumangaz filiali xodimlari tomonidan tez-tez reydlar oʻtkazilib, yongʻin xavfsizligiga qarshi aholi oʻrtasida tushuntirishlar olib boriladi.

Yaqinda ana shunday reydlar natijasida tumanimizning turli hududlarida yashovchi 11 nafar kishi oʻz xonadonlarida tabiiy gaz tarmogʻiga noqonuniy ravishda taqiqlangan gaz soʻruvchi uskunalarni oʻrnatib qoʻyganliklari uchun jarimaga tortildi.

XALQARO OILA KUNI BAYRAM QILINDI

"Choykoʻl” ovulining 2-mahallasi qardosh Turkmaniston Respublikasi bilan chegara hududda joylashganligi bois, mahalla qoʻmitasi raisi Q.Ernazarov mahalla faollari bilan tez-tez xonadonlarga tashrif buyurib, aholi turmush tarzidan voqif boʻlib turadi.

- 15-may – Xalqaro oila kuni munosabati bilan mahallada istiqomat qiluvchi turkman, qozoq, qoraqalpoq, oʻzbek oilalari oʻz farzandlari, qoʻni-qoʻshnilari bilan bu kunni munosib nishonlashdi, - deydi Q.Ernazarov.

Mahalladagi Qurol Qurbonboyevning oilasi qozoq, Sobir Gurbanov oilasi turkman, Lya opa oilasi ukrain, Abdulla Sobirov oilasi boshqird, Roziya momo oilasi esa tatar millatlariga mansub fuqarolardan iborat ahil-inoq oilalardir. Qozoq millatiga mansub Qurol Qurbonboyev oilasida 15-may – Xalqaro oila kuni keng nishonlandi.

- Men va farzandlarim uchun bu kun qoʻshaloq bayram, - deydi u quvonch bilan. – Chunki bu sana mening tavallud kunim, qolaversa, baynalmilal oilamizning bayrami. – Ilohim, ahil, inoq, bagʻrikeng oilalarimiz koʻp boʻlsin.

OILAVIY TADBIRKORLIK TUFAYLI

Mangʻit shahrining Beruniy nomli mahallasida yashovchi Sobir Polvonov oilaviy tadbirkorlikka qoʻl urib, kam boʻlmadi. Ishni mayda-chuyda duradgorlik anjomlarini yasashdan boshlagan Sobir Polvonov qisqa vaqt ichida yangi oilalar uchun ixcham sandiqlar, xontaxta, deraza va eshik romlari, divan-krovatlar yasashni oʻzlashtirib, eldoshlari olqishiga sazovor boʻldi. Eng muhimi, oʻgʻli Davronbek ham ishli boʻldi, ham malakali duradgor-usta darajasiga erishdi. Oila daromadi oshib, turmushi farovonlashdi.

- Mehnatdan kelsa boylik – turmush boʻlar chiroylik, - deydi u mamnuniyat bilan.