KELAJAKKA DADIL INTILIB...

Yurtimizda istiqlol yillarida bolalar sportiga alohida eʼtibor qaratilayotgani koʻpgina oʻgʻil-qizlarning qobiliyati rivojlanib, nimalarga qodir ekanligini namoyish etishlariga asos boʻlmoqda.

Tumanimizdagi Gulzor mahallasi, Avaz Oʻtar koʻchasida yashovchi Gulchehra  opa Salayevaning quvonchi cheksiz. Chunki uning tarbiyalab voyaga yetkazgan farzandi Botirjon Rajapboyev bu yil Nukus Olimpiya zahiralari kollejini futbol yoʻnalishi boʻyicha tamomlaydi.

U 2004 yilda tumanimizdagi 38-sonli umumtaʼlim maktabining birinchi sinfiga qabul qilindi. Botirjondagi jismoniy tarbiya va sportga qiziqish ustun ekanligini sezgan ustozlari va oilasidagilar uni 2009-2010 oʻquv yilida Qoraqalpogʻiston Respublikasi xalq taʼlimi vazirligiga qarashli 7-sonli futbolga ixtisoslashtirilgan Davlat umumtaʼlim maktabiga olib borishdi, sinovlar asosida 6-sinfga qabul qilindi.

Shundan boshlab Botirjon oʻzining sport sohasidagi bilimlarini, mahoratini yanada boyitish va oʻzi qiziqqan futbolning sir-sinoatlarini ustozlaridan yaxshilab oʻrganishga kirishdi.

Endilikda Botirjon oʻzi ilk qadam qoʻygan maktab sport maydonchasida oʻynagan futboli bilan haqiqiy futbol  orasidagi farqni, jamoada toʻp surish masʼuliyatini tushunib yetdi.

Murgʻakkina bolakayni oʻzining intilish va qiziqishlari yetaklab kelgan, uyidan, ota-onaning issiq bagʻridan oʻnlab chaqirim olisdagi bu sport maktabi uning kelajak hayotida omadlarga eltuvchi baxt maskani boʻldi.

U har doim oilasi va maktabidagilarning oʻziga bildirgan umid va ishonchlarini oqlashi kerak ekanligini his etdi.  Mana shu masʼuliyatni sezish tuygʻusi uni orzular sari yetakladi. Botirjonning fikr-oʻyida yetuk sportchi boʻlib yetishish, Oʻzbekistonning eng ilgʻor futbol jamoalarida toʻp surish, Vatanimiz dovrugʻini dunyoga tanitgan sportchilar qatoridan joy olish ishtiyoqi hukm surardi. Mana shu izlanish va intilishlar samarasi oʻlaroq koʻrik-tanlovlarga, musobaqalarga qatnashdi. 2010-yilda "Barkamol avlod yili” ga bagʻishlab qishki taʼtil kunlari boʻlib oʻtgan ochiq turnirda 1-oʻrinni egallagani uchun uning jamoasi 1-darajali diplom bilan taqdirlandi. 1-iyun – Xalqaro bolalarni himoya qilish kuniga bagʻishlangan futbol birinchiligida 1-darajali diplom bilan taqdirlandi. Shuningdek 2010-yilda sport maktabining "eng yaxshi sportchi” nominatsiyasi, 2011-yilda "Eng mahoratli sportchi” nominatsiyasi gʻolibi boʻldi. 2012 yilda 1997-1999-yillarda tugʻilgan oʻsmirlar orasida oʻtkazilgan futbol boʻyicha ichki birinchilikda 1-oʻrinni egallagani uchun 1-darajali diplom bilan taqdirlandi.

Bu roʻyxatni uzoq davom qildirish mumkin. Tumanimizning faxriga aylanib borayotgan yosh futbolchi Qoraqalpogʻistondagi oʻsmir sportchilar orasida erishgan yutuqlari bilan koʻpchilikka namuna boʻlayapti.

Kollejdagi tahsili davomida ham u yaxshi natijalarga erishdi. "Kamolot” yoshlar ijtimoiy harakati Markaziy Kengashi  va bir qator hamkor tashkilotlar mutasaddiligida oʻtkazilgan akademik litsey va kasb-hunar kollejlari oʻquvchilari oʻrtasida futbol boʻyicha "Kamolot kubogi” respublika musobaqasida faol ishtirok etganligi uchun Sertifikat bilan taqdirlandi.

Botirning musobaqalarda erishgan yutuqlarini dalillab, koʻzni quvontirib turgan oʻnlab medallar, diplom, faxriy yorliqlari borki, ularni koʻrgan ota-ona bizning ham farzandimiz shunday yutuqlarga erishsin, deb niyat qilishiga ishonchimiz komil.

Iqtidorsiz farzandning oʻzi yoʻq, oila va jamiyatdagi eʼtibor va taʼlim-tarbiya farzandlarimiz kelajagida asqotadi. Shu maʼnoda biz tumanimizning sport sohasidagi nufuzini oshirishga  oʻzining hissasini qoʻshayotgan, mohir futbolchini tarbiyalagan Gulchehra opaga, yuksak orzular bilan kelajakka talpinayotgan futbolchi Botir Rajapboyevga havas bilan qaradik. Uning porloq istiqboliga tilakdosh boʻldik.

Oʻlmasbek XOʻJAYeV