"KAFIL-SUGʻURTA" — IShONCh, BARQARORLIK VA KELAJAKKA DADIL QADAM

Bugungi globallashuv va iqtisodiy oʻzgarishlar davrida moliyaviy xavfsizlik har qachongidan ham muhim ahamiyat kasb etmoqda. Iqtisodiyotning "xavfsizlik yostiqchasi" hisoblangan sugʻurta tizimi nafaqat tadbirkorlik subʼektlari, balki oddiy aholining ham ertangi kunga boʻlgan ishonchini mustahkamlovchi asosiy vositadir. Ana shunday masʼuliyatli vazifani 20-yildan buyon sharaf bilan bajarib kelayotgan "KAFIL-SUG‘URTA" aktsiyadorlik jamiyati bugun Oʻzbekiston sugʻurta bozorining yetakchi drayverlaridan biriga aylandi.

2004-yil 21-mayda oʻz faoliyatini boshlagan kompaniya oʻtgan davr mobaynida kichik tuzilmadan respublikaning eng yirik moliyaviy institutlaridan birigacha boʻlgan sharafli yoʻlni bosib oʻtdi. Oʻzbekiston Respublikasi Moliya vazirligi huzuridagi Sugʻurta bozorini rivojlantirish agentligi litsenziyasi asosida faoliyat yurituvchi jamiyat bugungi kunda sugʻurtaning 17 ta klassi boʻyicha majburiy va ixtiyoriy xizmatlarni taklif etmoqda. Bu raqamlar ortida minglab mijozlarning xotirjamligi va himoyalangan manfaatlari yotibdi.

Sugʻurta kompaniyasining ishonchliligi uning chiroyli shiorlari bilan emas, balki real moliyaviy koʻrsatkichlari va toʻlov qobiliyati bilan oʻlchanadi. "KAFIL-SUG‘URTA" aktsiyadorlik jamiyatining soʻnggi yillardagi moliyaviy dinamikasi tahsinga loyiq. Raqamlarga eʼtibor qaratsak, 2020-yilda kompaniyaning ustav kapitali 25,7 milliard soʻmni tashkil etgan boʻlsa, 2024-yilga kelib bu koʻrsatkich 235 foizga oʻsib, 60,7 milliard soʻmga yetdi.

Ammo kompaniya bu bilan cheklanib qolmadi. 2025-yilda ustav kapitali yana 32,9 foizga oshirilib, 80,7 milliard soʻm etib belgilandi. Bunday oʻsish surʼati kompaniyaning har qanday moliyaviy qaltisliklarga bardosh bera olishidan va yirik hajmdagi majburiyatlarni oʻz vaqtida bajarish salohiyatidan dalolat beradi.

Aktivlar hajmining soʻnggi besh yilda qariyb 4 barobarga ortib, 230,3 milliard soʻmga yetgani esa kompaniyaning investitsion jozibadorligi va bozordagi mustahkam oʻrnini koʻrsatadi.

Sugʻurta kompaniyasining haqiqiy yuzi — bu sugʻurta hodisasi yuz berganda mijozga toʻlab beriladigan tovon pullaridir. Aynan shu nuqtada "KAFIL-SUG‘URTA" mijozlar manfaatiga yoʻnaltirilgan siyosatini amalda isbotlamoqda. Agar 2020-yilda sugʻurta qoplamalari hajmi 1,8 milliard soʻmni tashkil etgan boʻlsa, 2024-yil yakunlariga koʻra bu raqam 77,5 milliard soʻmga yetdi.

Ushbu ulkan farq ikki narsani anglatadi: birinchidan, aholi va tadbirkorlarning kompaniyaga boʻlgan ishonchi ortib, sugʻurta portfeli kengaymoqda; ikkinchidan, kompaniya oʻz zimmasiga olgan majburiyatlarni "qogʻozda" emas, amalda, tezkor va toʻliq bajarmoqda. Buning natijasida kompaniya milliy reytingning 11-pogʻonasidan kuchli yettilikka koʻtarildi.

"KAFIL-SUG‘URTA" faoliyati faqat ichki bozor bilan cheklanib qolgani yoʻq. Kompaniyaning "Yil brendi" xalqaro mukofotini ketma-ket uchinchi marta qoʻlga kiritishi va ISO 9001:2015 xalqaro sertifikatiga ega boʻlishi uning xizmat sifati jahon standartlariga mos ekanini tasdiqlaydi. "Ahbor-Reyting" agentligi tomonidan berilgan "UzA++" reytingi esa barqarorlikning yorqin dalilidir.

Ayniqsa, Xitoy Xalq Respublikasining yirik sugʻurta kompaniyalari bilan imzolangan memorandumlar kompaniya tarixida yangi sahifa ochdi. Bu hamkorlik qayta sugʻurtalash, yirik investitsion loyihalardagi risklarni boshqarish va innovatsion mahsulotlarni Oʻzbekiston bozoriga olib kirish imkonini beradi.

Biznes — faqat daromad degani emas. Kompaniya "KAFIL GRANTI" dasturi orqali iqtidorli talabalarni qoʻllab-quvvatlashi, xotin-qizlar faolligini oshirishga qaratilgan loyihalari bilan jamiyat rivojiga ham hissa qoʻshmoqda.

Kompaniyaning Qoraqalpogʻiston Respublikasi filiali ham samarali faoliyat yuritmoqda. Filialda mijozlar ehtiyojidan kelib chiqib baxtsiz hodisalar va kasalliklardan sugʻurta qilish, avtotransport vositalarini sugʻurtalash, mulkni sugʻurtalash, lizing obʼektlarini sugʻurtalash, eksport shartnomalarini sugʻurtalash va boshqa oʻnlab sugʻurta xizmatlari koʻrsatilmoqda.

Xulosa qilib aytganda, 2024-yilda 263 mingdan ortiq shartnoma imzolagan "KAFIL-SUG‘URTA" aktsiyadorlik jamiyati bugungi kunda nafaqat sugʻurta xizmatlarini sotuvchi tashkilot, balki har bir mijozning xavfsizligi va farovonligi uchun qaygʻuradigan ishonchli hamkordir.

Kompaniyaning "Har ehtimolga qarshi!" shiori ostidagi faoliyati yurtimiz aholisiga ertangi kunga ishonch bilan boqish, kutilmagan vaziyatlarda esa suyanish mumkin boʻlgan mustahkam tayanch borligini his qilish imkonini bermoqda.