"КАФИЛ-СУҒУРТА" — ИШОНЧ, БАРҚАРОРЛИК ВА КЕЛАЖАККА ДАДИЛ ҚАДАМ

Бугунги глобаллашув ва иқтисодий ўзгаришлар даврида молиявий хавфсизлик ҳар қачонгидан ҳам муҳим аҳамият касб этмоқда. Иқтисодиётнинг "хавфсизлик ёстиқчаси" ҳисобланган суғурта тизими нафақат тадбиркорлик субъектлари, балки оддий аҳолининг ҳам эртанги кунга бўлган ишончини мустаҳкамловчи асосий воситадир. Ана шундай масъулиятли вазифани 20 йилдан буён шараф билан бажариб келаётган "KAFIL-SUG‘URTA" акциядорлик жамияти бугун Ўзбекистон суғурта бозорининг етакчи драйверларидан бирига айланди.

2004 йил 21 майда ўз фаолиятини бошлаган компания ўтган давр мобайнида кичик тузилмадан республиканинг энг йирик молиявий институтларидан биригача бўлган шарафли йўлни босиб ўтди. Ўзбекистон Республикаси Молия вазирлиги ҳузуридаги Суғурта бозорини ривожлантириш агентлиги лицензияси асосида фаолият юритувчи жамият бугунги кунда суғуртанинг 17 та класси бўйича мажбурий ва ихтиёрий хизматларни таклиф этмоқда. Бу рақамлар ортида минглаб мижозларнинг хотиржамлиги ва ҳимояланган манфаатлари ётибди.

Суғурта компаниясининг ишончлилиги унинг чиройли шиорлари билан эмас, балки реал молиявий кўрсаткичлари ва тўлов қобилияти билан ўлчанади. "KAFIL-SUG‘URTA" акциядорлик жамиятининг сўнгги йиллардаги молиявий динамикаси таҳсинга лойиқ. Рақамларга эътибор қаратсак, 2020 йилда компаниянинг устав капитали 25,7 миллиард сўмни ташкил этган бўлса, 2024 йилга келиб бу кўрсаткич 235 фоизга ўсиб, 60,7 миллиард сўмга етди.

Аммо компания бу билан чекланиб қолмади. 2025 йилда устав капитали яна 32,9 фоизга оширилиб, 80,7 миллиард сўм этиб белгиланди. Бундай ўсиш суръати компаниянинг ҳар қандай молиявий қалтисликларга бардош бера олишидан ва йирик ҳажмдаги мажбуриятларни ўз вақтида бажариш салоҳиятидан далолат беради.

Активлар ҳажмининг сўнгги беш йилда қарийб 4 баробарга ортиб, 230,3 миллиард сўмга етгани эса компаниянинг инвестицион жозибадорлиги ва бозордаги мустаҳкам ўрнини кўрсатади.

Суғурта компаниясининг ҳақиқий юзи — бу суғурта ҳодисаси юз берганда мижозга тўлаб бериладиган товон пулларидир. Айнан шу нуқтада "KAFIL-SUG‘URTA" мижозлар манфаатига йўналтирилган сиёсатини амалда исботламоқда. Агар 2020 йилда суғурта қопламалари ҳажми 1,8 миллиард сўмни ташкил этган бўлса, 2024 йил якунларига кўра бу рақам 77,5 миллиард сўмга етди.

Ушбу улкан фарқ икки нарсани англатади: биринчидан, аҳоли ва тадбиркорларнинг компанияга бўлган ишончи ортиб, суғурта портфели кенгаймоқда; иккинчидан, компания ўз зиммасига олган мажбуриятларни "қоғозда" эмас, амалда, тезкор ва тўлиқ бажармоқда. Бунинг натижасида компания миллий рейтингнинг 11-поғонасидан кучли еттиликка кўтарилди.

"KAFIL-SUG‘URTA" фаолияти фақат ички бозор билан чекланиб қолгани йўқ. Компаниянинг "Yil brendi" халқаро мукофотини кетма-кет учинчи марта қўлга киритиши ва ISO 9001:2015 халқаро сертификатига эга бўлиши унинг хизмат сифати жаҳон стандартларига мос эканини тасдиқлайди. "Ahbor-Reyting" агентлиги томонидан берилган "UzA++" рейтинги эса барқарорликнинг ёрқин далилидир.

Айниқса, Хитой Халқ Республикасининг йирик суғурта компаниялари билан имзоланган меморандумлар компания тарихида янги саҳифа очди. Бу ҳамкорлик қайта суғурталаш, йирик инвестицион лойиҳалардаги рискларни бошқариш ва инновацион маҳсулотларни Ўзбекистон бозорига олиб кириш имконини беради.

Бизнес — фақат даромад дегани эмас. Компания "KAFIL GRANTI" дастури орқали иқтидорли талабаларни қўллаб-қувватлаши, хотин-қизлар фаоллигини оширишга қаратилган лойиҳалари билан жамият ривожига ҳам ҳисса қўшмоқда.

Компаниянинг Қорақалпоғистон Республикаси филиали ҳам самарали фаолият юритмоқда. Филиалда мижозлар эҳтиёжидан келиб чиқиб бахтсиз ҳодисалар ва касалликлардан суғурта қилиш, автотранспорт воситаларини суғурталаш, мулкни суғурталаш, лизинг объектларини суғурталаш, экспорт шартномаларини суғурталаш ва бошқа ўнлаб суғурта хизматлари кўрсатилмоқда.

Хулоса қилиб айтганда, 2024 йилда 263 мингдан ортиқ шартнома имзолаган "KAFIL-SUG‘URTA" акциядорлик жамияти бугунги кунда нафақат суғурта хизматларини сотувчи ташкилот, балки ҳар бир мижознинг хавфсизлиги ва фаровонлиги учун қайғурадиган ишончли ҳамкордир.

Компаниянинг "Ҳар эҳтимолга қарши!" шиори остидаги фаолияти юртимиз аҳолисига эртанги кунга ишонч билан боқиш, кутилмаган вазиятларда эса суяниш мумкин бўлган мустаҳкам таянч борлигини ҳис қилиш имконини бермоқда.