КЕЛАЖАККА ДАДИЛ ИНТИЛИБ...
Юртимизда истиқлол йилларида болалар спортига алоҳида эътибор қаратилаётгани кўпгина ўғил-қизларнинг қобилияти ривожланиб, нималарга қодир эканлигини намойиш этишларига асос бўлмоқда.
Туманимиздаги Гулзор маҳалласи, Аваз Ўтар кўчасида яшовчи Гулчеҳра опа Салаеванинг қувончи чексиз. Чунки унинг тарбиялаб вояга етказган фарзанди Ботиржон Ражапбоев бу йил Нукус Олимпия заҳиралари коллежини футбол йўналиши бўйича тамомлайди.
У 2004 йилда туманимиздаги 38-сонли умумтаълим мактабининг биринчи синфига қабул қилинди. Ботиржондаги жисмоний тарбия ва спортга қизиқиш устун эканлигини сезган устозлари ва оиласидагилар уни 2009-2010 ўқув йилида Қорақалпоғистон Республикаси халқ таълими вазирлигига қарашли 7-сонли футболга ихтисослаштирилган Давлат умумтаълим мактабига олиб боришди, синовлар асосида 6-синфга қабул қилинди.
Шундан бошлаб Ботиржон ўзининг спорт соҳасидаги билимларини, маҳоратини янада бойитиш ва ўзи қизиққан футболнинг сир-синоатларини устозларидан яхшилаб ўрганишга киришди.
Эндиликда Ботиржон ўзи илк қадам қўйган мактаб спорт майдончасида ўйнаган футболи билан ҳақиқий футбол орасидаги фарқни, жамоада тўп суриш масъулиятини тушуниб етди.
Мурғаккина болакайни ўзининг интилиш ва қизиқишлари етаклаб келган, уйидан, ота-онанинг иссиқ бағридан ўнлаб чақирим олисдаги бу спорт мактаби унинг келажак ҳаётида омадларга элтувчи бахт маскани бўлди.
У ҳар доим оиласи ва мактабидагиларнинг ўзига билдирган умид ва ишончларини оқлаши керак эканлигини ҳис этди. Мана шу масъулиятни сезиш туйғуси уни орзулар сари етаклади. Ботиржоннинг фикр-ўйида етук спортчи бўлиб етишиш, Ўзбекистоннинг энг илғор футбол жамоаларида тўп суриш, Ватанимиз довруғини дунёга танитган спортчилар қаторидан жой олиш иштиёқи ҳукм сурарди. Мана шу изланиш ва интилишлар самараси ўлароқ кўрик-танловларга, мусобақаларга қатнашди. 2010 йилда "Баркамол авлод йили” га бағишлаб қишки таътил кунлари бўлиб ўтган очиқ турнирда 1-ўринни эгаллагани учун унинг жамоаси 1-даражали диплом билан тақдирланди. 1 июнь – Халқаро болаларни ҳимоя қилиш кунига бағишланган футбол биринчилигида 1-даражали диплом билан тақдирланди. Шунингдек 2010 йилда спорт мактабининг "энг яхши спортчи” номинацияси, 2011 йилда "Энг маҳоратли спортчи” номинацияси ғолиби бўлди. 2012 йилда 1997-1999 йилларда туғилган ўсмирлар орасида ўтказилган футбол бўйича ички биринчиликда 1-ўринни эгаллагани учун 1-даражали диплом билан тақдирланди.
Бу рўйхатни узоқ давом қилдириш мумкин. Туманимизнинг фахрига айланиб бораётган ёш футболчи Қорақалпоғистондаги ўсмир спортчилар орасида эришган ютуқлари билан кўпчиликка намуна бўлаяпти.
Коллеждаги таҳсили давомида ҳам у яхши натижаларга эришди. "Камолот” ёшлар ижтимоий ҳаракати Марказий Кенгаши ва бир қатор ҳамкор ташкилотлар мутасаддилигида ўтказилган академик лицей ва касб-ҳунар коллежлари ўқувчилари ўртасида футбол бўйича "Камолот кубоги” республика мусобақасида фаол иштирок этганлиги учун Сертификат билан тақдирланди.
Ботирнинг мусобақаларда эришган ютуқларини далиллаб, кўзни қувонтириб турган ўнлаб медаллар, диплом, фахрий ёрлиқлари борки, уларни кўрган ота-она бизнинг ҳам фарзандимиз шундай ютуқларга эришсин, деб ният қилишига ишончимиз комил.
Иқтидорсиз фарзанднинг ўзи йўқ, оила ва жамиятдаги эътибор ва таълим-тарбия фарзандларимиз келажагида асқотади. Шу маънода биз туманимизнинг спорт соҳасидаги нуфузини оширишга ўзининг ҳиссасини қўшаётган, моҳир футболчини тарбиялаган Гулчеҳра опага, юксак орзулар билан келажакка талпинаётган футболчи Ботир Ражапбоевга ҳавас билан қарадик. Унинг порлоқ истиқболига тилакдош бўлдик.
Ўлмасбек ХЎЖАЕВ
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
