QOʻLLARINGIZ DARD KOʻRMASIN!

Yaqinda farzand kutayotgan kelinimning tobi qochib qoldi. Oy-kuni yaqin boʻlganligi sababli uni tugʻruqxonaga olib bordim. U yerda navbatchi shifokorlar hali 2-3 hafta borligini aytishdi va uyga ketishga ruxsat berishdi. Men kelinim bilan uyga qaytdim. Ertasiga ayollar koʻrigiga olib bordim, bu yerdagi shifokorlar homilador ayollar patologiyasi boʻlimiga yotqizishdi. U yerda 2-3 kun yotdi. Kimdir Nukusga olib ketishimni aytsa, yana biri Urganchni tavsiya qildi. Men kelinimning ahvoli yoʻlda yomonlashib qolishidan choʻchib, hech qayerga olib ketmadim. TTB huzuridagi 1-sonli tugʻruqxona mudirasi Habiba Toʻrayeva va akusher-ginekolog Muhabbat Yusupovalar bilan maslahatlashganimda, Habiba kulib turib: "qoʻrqmang, eson-omon qutilib oladi”, - dedi. Xullas, kelinim oʻz farzandini sogʻ-salomat qoʻliga oldi. Allohga ming shukur, ana shunday fidoyi, oʻz kasbining ustalari boʻlgan shifokorlar Habiba Toʻrayeva, Muhabbat Yusupova, tugʻruqxona jonlantirish boʻlimi shifokori Rustam Xolimbetov va hamshira Muborak Hayitboyevalarning jonkuyarligi sababli oilamizga nabiram bilan birga katta quvonch kirib keldi.

Men baʼzan yaqinlarimni koʻrgani tugʻruqxonaga borsam, Habibaga yoki Muhabbatga duch kelsam, hamisha ularning muloyim chehrasi va shirin muomalasidan koʻnglim togʻday koʻtariladi. Habibaxon Toʻrayeva, Muhabbatxon Yusupova, Rustamjon Xolimbetov, Muborakxon Hayitboyeva kabi qoʻli gul shifokorlarimiz borligi uchun ham qancha-qancha oilalar quvonchga toʻlib ketadi. Men esa ana shunday quvonchga sazovor inson sifatida bu shifokorlarning oilalarini va koʻngillarini Allohning oʻzi baxtga toʻldirishini tilayman. El-yurt sogʻligi yoʻlidagi fidoyi xizmatlarida kuch-quvvat, muvaffaqiyat yor boʻlsin, deyman.

Shirin soʻzingiz ham dillarga malham,

Mehrli nigohdan kuch olar bemor.

Ey, oppoq libosli goʻzal farishtam –

Samimiyat tojin kiygan shifokor.

Inobat OTAJONOVA,

38-sonli maktab oʻqituvchisi.

(Foto - http://uza.uz)