Dardlarga davo izlab

Shuhrat bolalikdan shifokor boʻlishni orzu qilardi. Eng zoʻr mutaxassis boʻlishni, ota-onasi shaʼniga eng yaxshi soʻzlar aytilishini istardi. Bu orzu-istaklar uni qunt bilan ilm olishga undadi. Bor bilimini va mahoratini ishga solib, 2-sonli Toshkent davlat tibbiyot instituti (hozirgi Tibbiyot akademiyasi) talabasi boʻldi. Oliy taʼlim dargohida ham qunt bilan oʻqidi. 1997-yilda mutaxassislik diplomini olib, Qoraqalpogʻiston Respublikasi Markaziy shifoxonasining urologiya boʻlimida internatura oʻtadi.

Shundan soʻng, 1998-yilda oʻzi tugʻilib oʻsgan Amudaryo tumani Tibbiyot birlashmasi koʻp tarmoqli Markaziy poliklinikasiga urolog-shifokor boʻlib ishga keldi. Mana qariyb 25-yildirki, shu dargohda el dardiga darmon boʻlib kelmoqda.

Egniga oq xalat kiyib, qasamyod qilganidan buyon turli yoshdagi bemorlarni davolab kelmoqda. Uning huzuriga turli urologik kasalliklar bilan kasallangan bemorlar kelishadi. Ular orasida yillab farzand koʻrmaganlar ham bor. Shuhrat Allohning inoyati bilan bunday bemorlarning ham shifo topishiga yordam koʻrsatib kelmoqda. Uning koʻmagida yuzlab oilalar farzandli boʻlib, xonadonlari quvonchga toʻldi.

Shuhrat muntazam izlanishda. Oʻz ustida ishlab, sohadagi yangiliklarni faoliyatiga tatbiq qiladi. Shu maqsadda bir necha bor Toshkent vrachlar malakasini oshirish institutida malaka oshirdi.

Qoʻli yengil shifokor birinchi marta Yendir ota Idrisovda jarrohlik amaliyotini oʻtkazgandi. Hozir bobo 90 yoshdan oshdi.

– Tibbiyotning rivojlanishi natijasida faoliyatimizga yangi-yangi davolash uslublarini joriy qilayapmiz, – deydi Shuhrat. – Har yili 200ga yaqin jarrohlik amaliyotlarini oʻtkazaman. Bir paytlari respublika markazida bajarilgan amaliyotlarni endi tumanimizda ham oʻtkazib, bemorlarning ortiqcha ovora va chiqimdor boʻlishining oldini olayapmiz. Ularning darddan forigʻ boʻlib, oyoqqa turib ketishlariga koʻmaklashamiz.

Shirinsuxan, bilimdon, iqtidorli, qoʻli yengil bu shifokorni izlab, hatto Rossiya, Qozogʻistondan kelganlar bor. U juda kamtar, barchaga birdek muomala qiladi, qoʻlidan kelgan yordamini ayamaydi. Hamkasblari, shogirdlari ham koʻp masalalarda Shuhrat bilan maslahatlashishadi.

Shifokor  Shuhrat Jumaniyozov har kuni oʻnlab insonlarni qabul qilib, shirin muomalasi bilan ularning darddan forigʻ boʻlishiga koʻmaklashadi. Oʻzi orzu qilganidek, har kuni “Otangga rahmat”, “Qoʻlingiz dard koʻrmasin”, “Umringizdan baraka toping” kabi duolar oladi. Biz ham el suygan shifokorga kasbingizdan kamol toping, deb qolamiz.

Norboy TOʻRABOYeV.