MEHR - OQIBAT VA EZGULIK BAYRAMI
Bahor
– uygʻonish fasli. Uning hikmatlarga, xosiyatlarga toʻla har bir kuni qadrli.
Ayniqsa, dehqon uchun!
Ota-bobolarimiz tuproq tafti qizib, tabiatda jonlanish boshlanayotgan kun
– Navroʻzi olamni kuch va gʻayrat, yaratish va yashnatish timsoli sifatida
qadrlaganlar. Bahorgi teng kunlik – tun bilan kunning tenglashuvi, tabiatdagi
yashillanish jarayonining boshlanishi, inson ruhiyatidagi oʻzgarish – mehnatga ishtiyoq
tuygʻusi bilan uygʻunllashib, ezgu amallarga kirishilgan. Yerga urugʻ qadalib, yangi
hosil yili – Yangi kun boshlangan.
Tumanimizda Navroʻz bayrami tantanalari juda erta, mart oyining
boshidanoq sumalak sayillari bilan boshlanib ketadi. Nazarxon ovuli
kengliklaridan tortib Xitoy, Qilichboy, Jumurtov va "Chorbogʻ” ovullarigacha har
bir mahallada deyarli har kuni Navroʻzga atalgan sumalaklar pishadi, elimizning
katxudo onalari yaxshi niyatlar bilan xonadonlarga sumalaklar ulashadilar. Bu
udumda hikmat koʻp: oilalarimiz totuv, shirin hayot kechirsin, eldan birdamlikk,
ogʻizbirchilik koʻtarilmasin, farzandlarimizning iligi toʻq, kuch-qudratli, ilmli
boʻlsin, degan niyatlar bor unda.
Oʻtgan asrning 1985-87-yillarida xalqimizdan bu goʻzal udumni tortib olmoqchi, uning
xotirasidan oʻchirib tashlamoqchi boʻlishdi. Esimda, kompartiyaning bir toʻda malaylari
Navroʻzni diniy bayram deb eʼlon qilib, oʻrniga "Navbahor” bayramini
tiqishtirishdi. Oʻsha paytlari rahbarlar qoʻliga har kuni bir boʻyruq kelib tegardi:
"Navroʻz – xalqimizga yot, diniy bayram, aprel oyining falon sanasida "Navbahor”
bayramini uyushqoqlik bilan oʻtkazish” topshirilardi.
Ammo Navroʻzga oʻz xalqi uchun fidoyi olimlarimiz hech qanday diniy tus
berishning hojati yoʻqligini, bu bayram Sharq xalqlarining qadimiy, asrlar davomida shakllangan goʻzal udumi –
mehnatkashlik, mehr-oqibat, insonparvarlik tamoyillari aks etgan buyuk maʼnaviy
qadriyati ekanligini isbotladilar. Hayotimizga zoʻrma-zoʻraki tiqishtirilgan
"Navbahor” bayramini tugʻilmasidanoq xalq unutdi. Oʻsha sovetlar kompartiyasi
hukmronlik qilgan 1985-87-yillarda ham xalqimiz orasida 2-3 xonadon birlashib
sumalak sayillari oʻtkazilib turdi. Va xalq oʻzligini, oʻz Navroʻzini unutmadi.
Mustaqillik yillarida Navroʻz shodiyonalari tamoman yangicha tus oldi.
Yurtboshimiz aytganlariday "yuksak maʼnaviyat – yengilmas kuch” ekanligi oʻz tarixiy
isbotini topdi. Necha ming yillik bu buyuk maʼnaviy qadriyat – Navroʻz mustaqil
Vatanimizning eng tojdor bayramlaridan biriga aylandi. Navroʻz anʼanalari,
udumlari yangi davr, yangilangan tuzum – istiqlol sharofati ila xalqimizning
qon-qoniga singib ketdi va kuch-qudrat, goʻzallik, nafosat, mehr-oqibat, ezgulik
va birdamlik timsoliga aylandi.
Navroʻz ayyomi barchaga qutlugʻ boʻlsin!
OʻrinboyBerdiboyev,
nafaqadagi shifokor.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
