Dorixonalar faoliyatini tartibga solish yuzasidan yigʻilish boʻlib oʻtdi

Respublikamizda soʻnggi yillarda dori vositalari, tibbiy buyumlar va tibbiy texnika muomalasini takomillashtirish boʻyicha kompleks chora-tadbirlar amalga oshirilib kelinmoqda. Aholini sifatli, xavfsizligi va samaradorligi kafolatlangan dori vositalari, tibbiy buyumlar va tibbiy texnika bilan taʼminlashni yanada yaxshilash hamda farmatsevtika mahsulotlari muomalasini tartibga solish jarayonlari takomillashtirilmoqda.

Shu bilan birga, farmatsevtika sohasini isloh qilish, farmatsevtika mahsulotlari xavfsizligini taʼminlash, ularni davlat roʻyxatidan oʻtkazishni takomillashtirish va dorixonalar faoliyatini tartibga solishga masalalariga ham alohida eʼtibor qaratilmoqda.

Amudaryo tumani hokimligining majlislar zalida ushbu masalalarga bagʻishlangan yigʻilish boʻlib oʻtdi. Yigʻilishda Iqtisodiy jinoyatlarga qarshi kurashish departamentining Amudaryo tumani boʻlimi boshligʻi Maqset Utepbergenov, tuman Soliq inspektsiyasi boshligʻi oʻrinbosari Islom Yusupov hamda tumandagi dorixona faoliyati bilan shugʻullanuvchi tadbirkorlar ishtirok etdilar.

Unda departamentning tuman boʻlimi boshligʻi Maqset Utepbergenov tomonidan dorixonalar faoliyatini qoʻllab-quvvatlash va yanada rivojlantirish borasida amalga oshirilayotgan islohotlar, ularning mazmun-mohiyati xususida, ushbu yoʻnalishda kelib chiqishi mumkin boʻlgan huquqbuzarliklarning oldini olish borasida tushunchalar berildi.

Taʼkidlanganidek, dorixonalar faoliyatini rivojlantirish maqsadida qator farmon va qarorlar qabul qilinib, xalqimizning sogʻlom va uzoq umr kechirishini taʼminlashga alohida eʼtibor qaratilmoqda, tizimdagi toʻsiqlar bartaraf etilmoqda.

Aytish joizki, tibbiy xizmatlar koʻlami va sifatini oshirish, fuqarolarni sifatli hamda arzon dori vositalari bilan taʼminlash maqsadida amalga oshirilayotgan islohotlar ushbu sohaga dolzarb masala sifatida qaralayotganidan dalolat beradi.

Xususan, Oʻzbekiston Respublikasi Vazirlar Mahkamasining dori vositalari va tibbiy buyumlarni ishlab chiqarish, olib kirish va aylanmasini hisobga olish mexanizmlarini tubdan takomillashtirish hamda qonuniy aylanishini taʼminlash, shuningdek, ushbu mahsulotlarni majburiy raqamli markirovkalash tizimini joriy qilish maqsadida imzolangan “Dori vositalari va tibbiy buyumlarni majburiy raqamli markirovkalash tizimini joriy etish toʻgʻrisida”gi qarori bu borada muhim dasturulamal boʻlmoqda.

Mazkur qaror bilan Davlat soliq qoʻmitasi, Moliya vazirligi hamda Sogʻliqni saqlash vazirligining dori vositalari va tibbiy buyumlarni guruhlarga boʻlinishini nazarga tutgan holda identifikatsiya vositalari orqali majburiy raqamli markirovkalash tizimini 2022-2025-yillar davomida bosqichma-bosqich joriy qilish toʻgʻrisidagi taklifiga rozilik berilgan hamda majburiy raqamli markirovkalashni boshlash muddatlari hamda dori vositalari va tibbiy buyumlar turlari koʻrsatilgan.

Shuningdek, yigʻilishda Vazirlar Mahkamasining “Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomni tasdiqlash haqida”gi qarori bilan belgilangan dori vositalari va tibbiy buyumlarini chakana realizatsiya qilish faoliyatini litsenziyalash talablari va shartlari asosida litsenziya talablariga rioya qilish zarurligi xususida soʻz yuritildi.

Charos Arslonova, tuman hokimligining Axborot xizmati rahbari.