Mahalliy Kengashlar faoliyatini takomillashtirish yuzasidan seminar tashkil etildi

Oʻzbekistonda demokratik islohotlarni chuqurlashtirish va davlat boshqaruvida xalq vakilligini kuchaytirish borasidagi tizimli ishlar amalga oshirilmoqda. Ushbu yoʻnalishda amalga oshirilayotgan ishlar, avvalambor, Oliy Majlisning vakolatlarini kengaytirish, mahalliy Kengashlarning mustaqilligini oshirish, ijro hokimiyati organlari ustidan deputatlik nazoratini kuchaytirish va “xalqchil davlat” tamoyilini amalda roʻyobga chiqarishni oʻz ichiga oladi. Ayniqsa, joylarda mahalliy ijro organlari rahbarlarining masʼuliyatini oshirishga qaratilgan aniq mexanizmlar joriy etilmoqda.

Ayni shu maqsadda, 5-noyabr kuni Amudaryo tumani hokimligining majlislar zalida “Mahalliy Kengashlar faoliyatini namunali tashkil etish” mavzusida koʻrgazmali seminar tashkil etildi.

Tadbir Oʻzbekiston Respublikasi Oliy Majlisi Senati devonining Hududiy vakillik organlari faoliyatini oʻrganish markazi tomonidan tasdiqlangan rejaga asosan oʻtkazildi. Seminarning asosiy maqsadi Senat Kengashining 2025-yil 28-yanvardagi “Xalq deputatlari mahalliy Kengashlari faoliyatini namunali tashkil etish toʻgʻrisida”gi qarori ijrosini taʼminlashga qaratildi. Mazkur qaror asosida Nukus shahar Kengashining faoliyati tasdiqlangan meʼyorlar asosida toʻliq yoʻlga qoʻyilgan. Endilikda Nukus shahar Kengashining tajribasini hududdagi boshqa mahalliy Kengashlarga ham tatbiq etish va mahalliy vakillik organlari faoliyatini yanada jonlantirish koʻzda tutilmoqda.

Seminarda Qoraqalpogʻiston Respublikasi Joʻqorgʻi Kengesining Mahalliy hokimiyat vakillik va fuqarolarning oʻzini-oʻzi boshqarish organlari hamda davlat organlarining ochiqligini taʼminlash masalalari qoʻmitasi raisi Sharapat Otemisov, Xalq deputatlari Amudaryo tuman Kengashi raisi, tuman hokimi Sobir Xoʻjametov, Qoraqalpogʻiston Respublikasi Joʻqorgʻi Kengesiga Amudaryo tumanidan saylangan deputatlar, tuman Kengashi deputatlari, Kengash huzuridagi “Yoshlar maslahat guruhi” aʼzolari, siyosiy partiyalar rahbarlari hamda OAV vakillari ishtirok etdilar.

Seminarda asosiy eʼtibor “Xalq deputatlari mahalliy Kengashining doimiy komissiyalari faoliyatini samarali tashkil etish toʻgʻrisida”gi masalaga qaratildi. Ushbu yoʻnalishda amalga oshirilayotgan ishlar doimiy komissiyalarning yillik ish rejalarini aniq muammolar va aholi murojaatlari asosida shakllantirishni, qabul qilingan qarorlar ijrosi ustidan qatʼiy deputatlik nazoratini oʻrnatishni hamda ijro hokimiyati idoralari rahbarlarining hisobotlarini muntazam eshitib borishni taqozo etadi. Samarali faoliyat – bu qogʻozdagi hisobotlar emas, balki joylardagi real ijobiy oʻzgarishlar demakdir.

Mazkur masala yuzasidan Kengashning Mahalliy byudjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi raisi Madamin Kazakov, Korruptsiyaga qarshi kurashish va xavfsizlik masalalari boʻyicha doimiy komissiyasi raisi Yaxshimurat Ahmedovlar soʻzga chiqib, doimiy komissiyalarningfaoliyati haqida maʼlumotlar berdilar hamda uni kelgusida yanada takomillashtirish yuzasidan fikr-mulohazalarini bayon qildilar.

Deputatlar tomonidan Kengashning tumanni ijtimoiy-iqtisodiy rivojlantirishga qoʻshayotgan hissasi, xalq vakillarining aholining muammolarini hal etishdagi oʻrni, shuningdek, davlat organlari faoliyatida ochiqlik va shaffoflikni taʼminlash masalalari atroflicha muhokama qilindi.

Xususan, deputatlarning mahalliy byudjetni tasdiqlash va uning ijrosini nazorat qilishdagi rolini kuchaytirish, hududni ijtimoiy-iqtisodiy rivojlantirish boʻyicha dasturlarning ijrosini nazorat qilish, sayyor qabullar orqali aholi bilan bevosita muloqotni yoʻlga qoʻyish muhimligi taʼkidlandi. Kengash sessiyalarini ijtimoiy tarmoqlar orqali jonli efirga uzatish, qabul qilingan qarorlarni ochiq eʼlon qilish va jamoatchilik eshituvlarini oʻtkazish amaliyotini kengaytirish zarurligi taʼkidlandi.

Tadbir doirasida ishtirokchilar mahalliy Kengash faoliyatining namunaviy modeli, deputatlarning tashabbuslari hamda ularning joylardagi aholi bilan oʻzaro hamkorlik mexanizmlari bilan yaqindan tanishdilar. Aynan shu mexanizmlar orqali deputatlik korpusi aholining hayotiy muammolariga tezkor yechim topishda koʻprik vazifasini bajarishi lozimligi qayd qilindi.

Mazkur seminar mahalliy Kengashlar faoliyatini yanada takomillashtirish, deputatlar tashabbuskorligini oshirish va ularning jamiyat hayotidagi rolini yanada mustahkamlashga xizmat qiladi. Bu esa kuchli va xalqchil vakillik organini shakllantirish orqali hududlarni rivojlantirish strategiyasini izchil amalga oshirish uchun mustahkam asos yaratadi.