Mehnat migrantlarining xavfsizligi yuzasidan ularning oilalarida tushuntirish ishlari olib borilmoqda

Bugungi globallashuv davrida mehnat migratsiyasi butun dunyo boʻylab odatiy holga aylangan. Insonlar oʻz turmush sharoitini yaxshilash, yangi imkoniyatlar izlash yoki kasbiy malakasini oshirish maqsadida xorijiy mamlakatlarga yoʻl olmoqda. Bu jarayon bizning jamiyatimizni ham chetlab oʻtgani yoʻq. Xususan, bugungi kunda Amudaryo tumanining 13 ming nafardan ortiq aholisi turli maqsadlar, asosan mehnat qilish va daromad topish ilinjida chet davlatlarda boʻlib turibdi. Ammo, har qanday safarning oʻz masʼuliyati va xatarlari mavjud boʻlib, bu borada fuqarolarimizning xavfsizligi va huquqiy himoyasi doimiy eʼtibor markazida boʻlishi shart. Quvonarlisi shundaki, joriy yil boshidan buyon 9 mingdan ziyod yurtdoshlarimiz oʻz yashash manzillariga, oilasi va yaqinlari bagʻriga sogʻ-omon qaytib kelgan. Bu koʻrsatkichlar ortida minglab insonlarning taqdiri, ularning ijtimoiy holati va albatta, jamiyatdagi barqarorlik masalasi yotibdi.

Aholining tinchligi va osoyishtaligini taʼminlash nafaqat davlat idoralarining, balki butun jamiyatning asosiy vazifalaridan biri hisoblanadi. Ayniqsa, xorijda yurgan yurtdoshlarimizning turli yot va buzgʻunchi gʻoyalar taʼsiriga tushib qolishining oldini olish bugungi kunning eng dolzarb masalalaridan biridir. Axborot almashinuvi tezlashgan, turli xil oqimlar va firibgarlik tarmoqlari keng quloch yozgan bir paytda, uzoq oʻlkalarda mehnat qilayotgan hamyurtlarimiz baʼzan oʻzlari bilmagan holda turli xavf-xatarlarga duch kelishlari mumkin. Ana shunday noxush holatlarning oldini olish maqsadida Amudaryo tumani Ichki ishlar boʻlimi xodimlari tomonidan tizimli va keng koʻlamli profilaktika ishlari amalga oshirilmoqda.

Xususan, huquq-tartibot idoralari vakillari tumanda yashab, hozirda chet davlatlarga vaqtincha ishlash maqsadida chiqib ketgan fuqarolarning xonadonlariga tashrif buyurib, ularning yaqin qarindoshlari, oila aʼzolari bilan muntazam ravishda samimiy suhbatlar oʻtkazib kelmoqda.

Ushbu yuzma-yuz oʻtkazilayotgan profilaktik suhbatlar davomida asosiy eʼtibor musofirlikda boʻlib turgan fuqarolarning holidan xabar olishga, ularning yashash va mehnat sharoitlari qanday kechayotganini oʻrganishga qaratilmoqda. Oila aʼzolariga chet eldagi yaqinlari bilan doimiy ravishda aloqada boʻlib turish, ularning kayfiyati va qanday insonlar bilan muloqot qilayotganiga eʼtiborli boʻlish kerakligi tushuntirilmoqda.

Shuningdek, muloqotlar jarayonida yuzaga kelishi mumkin boʻlgan har qanday shubhali vaziyatlar, boshqa kutilmagan holatlar yoki muammolar paydo boʻlganda zudlik bilan tegishli huquqni muhofaza qiluvchi idoralarga xabar berish zarurligi alohida taʼkidlanmoqda.

Bundan tashqari, odam savdosi, firibgarlik qurboniga aylanib qolish yoki boshqa turdagi huquqbuzarliklarning oldini olish boʻyicha huquqiy tushuntirish va targʻibot ishlari olib borilmoqda. Maqsad bitta – har bir fuqaroning hayoti va sogʻligʻini asrash, ularning qonuniy manfaatlarini himoya qilish hamda jamiyatda jinoyatchilikning barvaqt oldini olishdir.

Shunga koʻra, mutasaddi idoralar Amudaryo tumanining barcha aholisini yana bir bor ogohlikka chaqiradi. Hurmatli yurtdoshlar, agarda siz yoki yaqinlaringiz chet davlatlarga ishlash maqsadida joʻnab ketishni rejalashtirayotgan boʻlsangiz, eng avvalo oʻz xavfsizligingizni taʼminlash choralarini koʻring. Ishga joylashtirishni vaʼda qilayotgan notanish shaxslarning va yolgʻonchi vositachilarning quruq soʻzlariga koʻr-koʻrona ishonmang. Chet elga faqatgina qonuniy yoʻllar bilan, kafolatlangan shartnomalar asosida chiqishga harakat qiling. Oʻzgalarning ishonchiga kirib, nafaqat oʻzingizning, balki butun oila aʼzolaringizning tinchligini xavotirga qoʻymang.

Davlatimiz va uning huquq-tartibot idoralari doimo yordamga tayyor. Har qanday murakkab vaziyatda ham qonuniy koʻmakka tayanish mumkinligini unutmang, zero, Sizni oʻz uyingizda va yaqinlaringiz intizor boʻlib kutishmoqda.