СОБИҚ СИНФДОШЛАР 50 ЙИЛДАН СЎНГ УЧРАШДИЛАР

Инсон ҳаётида шундай бир оний лаҳзалар борки, бу лаҳзалар ўзининг гўзаллиги, ўчмас, ширин таассуротларга бойлиги билан барча учун бирдай қадрли. Бу – беғубор ва бетакрор болалик! Жўшқин, ўйинқароқ, шумликлари ҳам ўзига ярашган такрорланмас дамларни инсон шунинг учун ҳам умр бўйи қўмсаб, соғиниб яшайди. Гарчи у олис йилларни ортга қайтариб бўлмаса-да, болаликдаги қадрдон дўстлар даврасида ўзини болалардай ҳис этиб, шодланади, ҳаёт ташвишларини бир зум бўлса-да унутиб, беғубор, самимий суҳбатлар қуришдан завқланади.

Амударё туманидаги 8-сонли умумтаълим мактабини 1974 йилда битирган собиқ синфдошларнинг 50 йилдан кейинги дийдорлашув кечасида бўлганимизда инсон ўз умрида ҳеч нарсага алишмайдиган болалик хотираларининг орадан шунча йиллар ўтса-да, нақадар азиз ва қадрлилигини ҳис этдик. Ёшлари 70ни қоралаб қолган, ҳар бири бир этак невара-чеваранинг бобо ва бувижонлари бўлган, юзларида нуронийлик акс этиб турган отахон ва онахонлар ўртасидаги самимият чўғидан кўнгилларимиз нурланди.

Собиқ синфдош дўстлар дийдорлашув маросими аввалида ўзлари таълим-тарбия олган муқаддас даргоҳ – 8-сонли мактабга ташриф буюрдилар. Синфхоналардаги жимжитлик оғушида собиқ синфдошлар бу масканда бундан 50 йил аввал ўқувчи-ёшларга илм сирларини ўргатган, фарзандларидай азиз бўлиб қолган шогирдларини мустақил ҳаётга йўллаб, уларга баланд парвозлар тилаб қолган устозлари, Аллоҳ раҳмат қилсин, Париза Дўсимбетова, Абдулла Ўрозметов, Бозорбой Жумамуродов, Эриммат Матчонов, Шукуржон Худойберганова, Давлат Жумамуродовлар билан боғлиқ азиз хотираларини ёдга олдилар.

Хидир Бобожонов, Давлат Ражабов, Раҳим Қосимов, Қурбонбой Жумамуродов, Нурулла Абдуллаев, Янгибой Жапақов, Ўрозбой Қурбонбоев каби устозларни эҳтиром билан эсладилар. Қурол Тўраев, Йўлдош Хўжанов, Султон Юсупов, Абдулла ва Иброҳим Эшниёзовлар, Ортиқбой Бобожонов, Бекмат Отажонов, Майдагул Мамбетжонова, Одил Ражабов, Жумабой Қурбонбоев сингари устозларининг жонкуярликлари туфайли ҳаётда ўз ўринларини топганларини алоҳида эътироф этишиб, марҳум устозлари руҳларига Қуръон оятларидан тиловатлар қилдилар.

Шундан сўнг, ўзлари таълим олган синфхоналардаги парталарга ўтиришиб, турли сабабларга кўра ҳаётдан эрта кетган собиқ синфдошлари хотираси олдида бир дақиқа сукут сақлашиб, улар билан боғлиқ болалик ва ўсмирлик хотираларини ёдга олишди. Бир-бирларини ғойибона соғинган дўстлар орасидаги камчиликни тўлдиргулик сўз топилмади.

Бўш парталар орасида нигоҳлар гирён,

Ўрозматни, Раҳимбойни излаб толдилар,

Маткарим-у Ўринбой ва Озодлар бир ён,

Қайда, деб Бозоргул, Жумагул-у Қубалар?

Дўстларнинг қатори бузилмасин энди, деб, синфдошлар жам бўлиб қилди дуолар.

Шундан сўнг, синфдош дўстлар марҳум дўстлари қабрларини зиёрат қилишиб, дунёдан бевақт ўтиб кетган дўстлари руҳларини шод қилиш мақсадида “Юсуф Эшон бобо” жомъе масжиди имом-хатиби Абдураҳмон Матсапаев иштирокида хотира маросими ташкил этдилар ва хайр-эҳсон тадбирларини амалга ошириб, ҳақларига дуои-фотиҳа қилдилар.

Собиқ синфдош дўстларнинг 50 йилдан кейинги дийдорлашув маросими Манғит шаҳрининг энг сўлим ва баҳаво гўшаси – истироҳат боғидаги “Олтин сарой” тантаналар ва маросимлар мажмуасида давом этди.

Файзли дастурхон атрофидаги самимий ва дилкаш гурунглар мусиқий лаҳзаларга уланиб, бири-биридан ёқимли куй ва қўшиқлар кўнгилларга ором бағишлади. Орадан шунча йиллар ўтиб ҳам оҳори тўкилмаган самимият, қадрдонлик туйғулари ҳоким бўлган собиқ синфдошлар даврасида шу куни меҳр гуллади, мактаб бўсағасидан полопонлардай учиб, ҳаётнинг турфа хил чаманларидан бахт-иқболларини излаган, не-не жумбоқлар олдида минг бора ҳайратланган, синовларда қийналган лаҳзаларда бири-бирини суяб, мушкулларини осон қилишга интилиб яшаган ва ниҳоят нуроний ёшга етганларида ҳам ҳамон бири-биридан кўнгил узмаган қадрдон дўстларга, тўғриси, қалбимизда ҳавас ва ҳурмат уйғонди.

Ана шу ҳавас ва эҳтиром туйғусини назмий тилакларга жо этдик:

Дўстликнинг қадрини бошида тутиб,

Ҳаёт ташвишларин бир четга қўйиб.

Болаликка қайтиб, ёшликка қайтиб,

Кўнгиллар яйради, яйради тўйиб.

Бор бўлсин дилларда меҳр-у оқибат,

Бахтиёр дилларни қучган муҳаббат!

Робия Йўлдошева.