Амударё туманида жиноятчилик ва ҳуқуқбузарликларнинг олдини олиш борасида амалга оширилаётган ишлар юзасидан матбуот анжумани ўтказилди

Жорий йилнинг 24 август куни Амударё тумани ҳокимлигининг мажлислар залида туманда жиноятчилик ва ҳуқуқбузарликларнинг олдини олиш борасида амалга оширилаётган ишлар юзасидан матбуот анжумани ўтказилди.

Матбуот анжуманида туман ҳокими Собир Хўжаметов, туман Ички ишлар бўлими бошлиғи Муҳамметали Хўжамуратов, “Маҳалла еттилиги” аъзолри, оммавий ахборот воситалари вакиллари иштирок этдилар.

Матбуот анжуманини туман ҳокими Собир Хўжаметов очиб берди. Туман ҳокими ўз сўзида жиноят ва ҳуқуқбузарликларнинг олдини олишда ҳуқуқни муҳофаза қилиш органларининг “Маҳалла еттилиги” билан ҳамкорликда иш олиб бориши лозимлиги, шунингдек, аҳоли орасида тинч ва осойишта ҳаётимизнинг қадрига етиш, оила мустаҳкамлиги, фарзандлар тарбиясига эътибор бериш, шукроналик ва ҳамжиҳатликда яшаш борасидаги тарғибот ишларини янада кучайтириш зарурлиги хусусида сўз юритди.

Шунингдек, жиноятчилик сонини камайтиришнинг энг муҳим омили аҳоли бандлигини таъминлаш эканлигини таъкидлаб, инсонларнинг оиласига даромад олиб келишига ёрдам бериш борасидаги ишларни кучайтириш зарурлигини қайд этиб ўтди. Қолаверса, мустақиллигимизнинг 33 йиллиги муносабати билан ўтказиладиган байрам тантаналарида жамоат назоратни сақлаш борасида олдинда турган вазифалар хусусида тўхталди.

Матбуот анжуманида туман Ички ишлар бўлими бошлиғи жорий йилнинг шу даврига қадар ҳуқуқбузарликлар профилактикаси ва жиноятчиликка қарши курашиш бўйича амалга оширилган ишлар юзасидан ҳисобот берди.

Муҳамметали Хўжамуратов ўз ҳисоботида жорий йилнинг 7 ойи давомида туман ҳудудида жамоат хавфсизлигини таъминлаш, ҳуқуқбузарлик ва жиноятларнинг барвақт олдини олиш борасида бир қатор ишлар амалга оширилгани, хусусан, “Профилактика куни” тадбирлари давомида 108та жиноятлар муҳокама қилингани, 38 минг 76та хонадон ўрганилиб, ҳуқуқбузарлик содир этиш ёки ундан жабрланиш эҳтимоли юқори бўлган 1 минг 419 нафар шахслар билан ижтимоий профилактик тадбирларни амалга ошириш бўйича “Маҳалла еттиликлари”га хулосалар тақдим этилгани, маҳалла фаоллари томонидан 1 минг 207 нафар ижтимоий профилактика объекти бўлган шахсларнинг муаммоларини ижобий ҳал этиш чоралари кўрилгани хусусида сўз юритди.

Шунингдек, 981 нафар шахслар профилактик ҳисобга олиниб, улар билан якка тартибда профилактик ишлар олиб борилган, овул ва маҳаллалардаги 5 минг 228 нафар шахсларга ҳуқуқбузарлик содир қилганлиги учун маъмурий чоралар кўрилган. Ичкиликка ружу қўйган 76 нафар шахс ва 108 нафар руҳий касаллар мажбурий даволашга ётқизилиб, босим ва зўравонликка учраган 183 нафар хотин-қизларга ҳимоя ордерлари берилган.

Ҳисоботда келтирилишича, амалга оширилган профилактик ишлар натижасида тумандаги 29та овул ва маҳаллаларда жиноят юз беришига йўл қўйилмаган. Жиноят ва ҳуқуқбузарликлар сонини камайтириш мақсадида тумандаги овул ва маҳаллалар тоифаларга ажратилиб, тизимли ишлар йўлга қўйилмоқда. Жумладан, 4 маҳалла “қизил”, 16 та маҳалла “сариқ” тоифага киритилиб, улар билан алоҳида ишлаш борасидаги тадбирлар кучайтирилмоқда.

Жорий йилнинг 7 ойи мобайнида туман Ички ишлар бўлими томонидан олиб борилган самарали ишлар натижасида туман ҳудудида олдини олиш мумкин бўлган жиноятлар сезиларли даражада камайишига эришилган. Хусусан,  фирибгарлик 30 фоизга, номусга тегиш 75 фоизга,  баданга ўрта оғир тан жароҳати етказиш 22,2 фоизга, баданга енгил тан жароҳати етказиш жинояти эса 20 фоизга камайган.

Тадбир мобайнида кун тартибидаги масала юзасидан берилган саволларга масъуллар томонидан тегишли жавоблар қайтарилди. Мавжуд муаммо ва камчиликлар танқид ва таҳлил этилди ҳамда олдинда турган устувор вазифалар бўйича фикр алмашилди.

Чарос Арслонова, туман ҳокимлигининг Ахборот хизмати раҳбари.