Amudaryo tumanida jinoyatchilik va huquqbuzarliklarning oldini olish borasida amalga oshirilayotgan ishlar yuzasidan matbuot anjumani oʻtkazildi

Joriy yilning 24-avgust kuni Amudaryo tumani hokimligining majlislar zalida tumanda jinoyatchilik va huquqbuzarliklarning oldini olish borasida amalga oshirilayotgan ishlar yuzasidan matbuot anjumani oʻtkazildi.

Matbuot anjumanida tuman hokimi Sobir Xoʻjametov, tuman Ichki ishlar boʻlimi boshligʻi Muhammetali Xoʻjamuratov, “Mahalla yettiligi” aʼzolri, ommaviy axborot vositalari vakillari ishtirok etdilar.

Matbuot anjumanini tuman hokimi Sobir Xoʻjametov ochib berdi. Tuman hokimi oʻz soʻzida jinoyat va huquqbuzarliklarning oldini olishda huquqni muhofaza qilish organlarining “Mahalla yettiligi” bilan hamkorlikda ish olib borishi lozimligi, shuningdek, aholi orasida tinch va osoyishta hayotimizning qadriga yetish, oila mustahkamligi, farzandlar tarbiyasiga eʼtibor berish, shukronalik va hamjihatlikda yashash borasidagi targʻibot ishlarini yanada kuchaytirish zarurligi xususida soʻz yuritdi.

Shuningdek, jinoyatchilik sonini kamaytirishning eng muhim omili aholi bandligini taʼminlash ekanligini taʼkidlab, insonlarning oilasiga daromad olib kelishiga yordam berish borasidagi ishlarni kuchaytirish zarurligini qayd etib oʻtdi. Qolaversa, mustaqilligimizning 33 yilligi munosabati bilan oʻtkaziladigan bayram tantanalarida jamoat nazoratni saqlash borasida oldinda turgan vazifalar xususida toʻxtaldi.

Matbuot anjumanida tuman Ichki ishlar boʻlimi boshligʻi joriy yilning shu davriga qadar huquqbuzarliklar profilaktikasi va jinoyatchilikka qarshi kurashish boʻyicha amalga oshirilgan ishlar yuzasidan hisobot berdi.

Muhammetali Xoʻjamuratov oʻz hisobotida joriy yilning 7 oyi davomida tuman hududida jamoat xavfsizligini taʼminlash, huquqbuzarlik va jinoyatlarning barvaqt oldini olish borasida bir qator ishlar amalga oshirilgani, xususan, “Profilaktika kuni” tadbirlari davomida 108ta jinoyatlar muhokama qilingani, 38 ming 76ta xonadon oʻrganilib, huquqbuzarlik sodir etish yoki undan jabrlanish ehtimoli yuqori boʻlgan 1 ming 419 nafar shaxslar bilan ijtimoiy profilaktik tadbirlarni amalga oshirish boʻyicha “Mahalla yettiliklari”ga xulosalar taqdim etilgani, mahalla faollari tomonidan 1 ming 207 nafar ijtimoiy profilaktika obʼekti boʻlgan shaxslarning muammolarini ijobiy hal etish choralari koʻrilgani xususida soʻz yuritdi.

Shuningdek, 981 nafar shaxslar profilaktik hisobga olinib, ular bilan yakka tartibda profilaktik ishlar olib borilgan, ovul va mahallalardagi 5 ming 228 nafar shaxslarga huquqbuzarlik sodir qilganligi uchun maʼmuriy choralar koʻrilgan. Ichkilikka ruju qoʻygan 76 nafar shaxs va 108 nafar ruhiy kasallar majburiy davolashga yotqizilib, bosim va zoʻravonlikka uchragan 183 nafar xotin-qizlarga himoya orderlari berilgan.

Hisobotda keltirilishicha, amalga oshirilgan profilaktik ishlar natijasida tumandagi 29ta ovul va mahallalarda jinoyat yuz berishiga yoʻl qoʻyilmagan. Jinoyat va huquqbuzarliklar sonini kamaytirish maqsadida tumandagi ovul va mahallalar toifalarga ajratilib, tizimli ishlar yoʻlga qoʻyilmoqda. Jumladan, 4 mahalla “qizil”, 16 ta mahalla “sariq” toifaga kiritilib, ular bilan alohida ishlash borasidagi tadbirlar kuchaytirilmoqda.

Joriy yilning 7 oyi mobaynida tuman Ichki ishlar boʻlimi tomonidan olib borilgan samarali ishlar natijasida tuman hududida oldini olish mumkin boʻlgan jinoyatlar sezilarli darajada kamayishiga erishilgan. Xususan,  firibgarlik 30 foizga, nomusga tegish 75 foizga,  badanga oʻrta ogʻir tan jarohati yetkazish 22,2 foizga, badanga yengil tan jarohati yetkazish jinoyati esa 20 foizga kamaygan.

Tadbir mobaynida kun tartibidagi masala yuzasidan berilgan savollarga masʼullar tomonidan tegishli javoblar qaytarildi. Mavjud muammo va kamchiliklar tanqid va tahlil etildi hamda oldinda turgan ustuvor vazifalar boʻyicha fikr almashildi.

Charos Arslonova, tuman hokimligining Axborot xizmati rahbari.