Сайлов кампаниясидаги муҳим жараёнлардан бири — имзо тўплаш жараёни уюшқоқлик билан ўтказилмоқда

Маълумки, жорий йил 27 октябрда Олий Мажлис Қонунчилик палатаси ва маҳаллий Кенгашларга депутатлар сайлови бўлиб ўтади. Бош Қомусимиз ва Сайлов Кодексида белгиланган муддатлар ва қонун талабларидан келиб чиқиб, 26 июлдан эътиборан Марказий сайлов комиссияси томонидан Қонунчилик палатаси депутатлари ва маҳаллий Кенгашлар депутатлари сайлови бўйича сайлов кампаниясига старт берилди.

Шуни алоҳида қайд этиш керакки, бу йилги сайловлар аввалги йиллардагидан фарқли равишда амалга оширилади. Яъни, Сайлов Кодексида белгиланган тартиб-қоидаларга кўра, Қонунчилик палатаси депутатлар сайлови аралаш сайлов тизими асосида ўтказилади. Унга кўра, Қонунчилик палатаси депутатларининг ярми айни пайтдаги мавжуд тартиб бўйича сайланса, қолган ярми сиёсий партияларнинг рўйхатлари асосида сайланади. Яъни, сайловчилар 75та ўрин бўйича аниқ бир номзодни танлаб сайласалар, қолган 75таси бўйича сиёсий партияга овоз беради.

Айни кунларда мамлакатимиз сиёсий ҳаётида муҳим мавқега эга бўлган бешта сиёсий партия – Ўзбекистон Халқ демократик партияси, Тадбиркорлар ва ишбилармонлар ҳаракати – Ўзбекистон Либерал-демократик партияси, “Миллий тикланиш” демократик партияси, “Адолат” социал-демократик партияси ва Экологик партияларининг сайловда иштирок этишини қўллаб-қувватловчи сайловчилар имзосини тўплаш жараёни ўтказилмоқда. Мазкур сиёсий тадбир Амударё туманида фаолият олиб борувчи сиёсий партиялар томонидан ҳам юксак савияда ташкил қилинмоқда.

Жорий йилнинг 5 август санасида Амударё туманида ўтказилган Ўзбекистон Халқ демократик партиясини қўллаб-қувватлашга бағишланган тадбир ҳам иштирокчиларга кўтаринки кайфият ва байрамона руҳ бағишлади. Унда партия хайрихоҳлари шахсини тасдиқловчи ҳужжатлар билан келишиб, имзо варақаларига қўйилган шахсий имзолари орқали Ўзбекистон Халқ демократик партиясини қўллаб- қувватлашга рози эканликларини билдирдилар.

Шуни алоҳида таъкидлаш жоизки, имзо йиғиш жараёни Сайлов қонунчилигига биноан ўтказилаётгани фуқароларнинг ўз хоҳиш-иродаларини эмин-эркин ифодалаш имкониятларини кенгайтирмоқда. Бу фикрларимиз тадбир давомида фуқаролар билан партия масъулларининг самимий ва ошкора мулоқот тарзидаги давра суҳбатида ҳам ўз тасдиғини топди.

Партия масъуллари томонидан жорий йилда бўлиб ўтадиган Олий Мажлис Қонунчилик палатаси ва маҳаллий Кенгашларга депутатлар сайловининг аввалги йиллардаги сайловлардан фарқли жиҳатлари ҳамда Ўзбекистон Халқ демократик партияси ғоялари, шунингдек, бўлажак сиёсий жараённинг мазмун-моҳияти хусусида фуқароларга зарур тушунчалар берилди.

Таъкидланганидек, партиянинг мақсади – давлат ҳокимиятининг вакиллик органларида давлат ва жамият томонидан манзилли ижтимоий ҳимоя ва ижтимоий қўллаб-қувватлашга эҳтиёжманд аҳоли қатламлари манфаатларини ҳимоя қилишдан иборатдир.

Партия, ушбу инсонларнинг манфаатларидан келиб чиқиб, вакиллик демократияси механизмлари воситасида қонунларни қабул қилиш, давлат ҳокимияти ижроия органларини шакллантириш ва улар томонидан тараққиётнинг устувор йўналишлари ҳамда тегишли вазифаларни амалга ошириш йўлларини белгилашда амалий таъсир кўрсатиш имкониятига эга бўлишни кўзда тутади.

Тадбир давомида партия электорати вакиллари масъулларга ўзларини қизиқтирган саволлар билан мурожаат қилиб, тегишли жавоблар олдилар.

Р. Йўлдошева.