Saylov kampaniyasidagi muhim jarayonlardan biri — imzo toʻplash jarayoni uyushqoqlik bilan oʻtkazilmoqda

Maʼlumki, joriy yil 27-oktyabrda Oliy Majlis Qonunchilik palatasi va mahalliy Kengashlarga deputatlar saylovi boʻlib oʻtadi. Bosh Qomusimiz va Saylov Kodeksida belgilangan muddatlar va qonun talablaridan kelib chiqib, 26-iyuldan eʼtiboran Markaziy saylov komissiyasi tomonidan Qonunchilik palatasi deputatlari va mahalliy Kengashlar deputatlari saylovi boʻyicha saylov kampaniyasiga start berildi.

Shuni alohida qayd etish kerakki, bu yilgi saylovlar avvalgi yillardagidan farqli ravishda amalga oshiriladi. Yaʼni, Saylov Kodeksida belgilangan tartib-qoidalarga koʻra, Qonunchilik palatasi deputatlar saylovi aralash saylov tizimi asosida oʻtkaziladi. Unga koʻra, Qonunchilik palatasi deputatlarining yarmi ayni paytdagi mavjud tartib boʻyicha saylansa, qolgan yarmi siyosiy partiyalarning roʻyxatlari asosida saylanadi. Yaʼni, saylovchilar 75ta oʻrin boʻyicha aniq bir nomzodni tanlab saylasalar, qolgan 75tasi boʻyicha siyosiy partiyaga ovoz beradi.

Ayni kunlarda mamlakatimiz siyosiy hayotida muhim mavqega ega boʻlgan beshta siyosiy partiya – Oʻzbekiston Xalq demokratik partiyasi, Tadbirkorlar va ishbilarmonlar harakati – Oʻzbekiston Liberal-demokratik partiyasi, “Milliy tiklanish” demokratik partiyasi, “Adolat” sotsial-demokratik partiyasi va Ekologik partiyalarining saylovda ishtirok etishini qoʻllab-quvvatlovchi saylovchilar imzosini toʻplash jarayoni oʻtkazilmoqda. Mazkur siyosiy tadbir Amudaryo tumanida faoliyat olib boruvchi siyosiy partiyalar tomonidan ham yuksak saviyada tashkil qilinmoqda.

Joriy yilning 5-avgust sanasida Amudaryo tumanida oʻtkazilgan Oʻzbekiston Xalq demokratik partiyasini qoʻllab-quvvatlashga bagʻishlangan tadbir ham ishtirokchilarga koʻtarinki kayfiyat va bayramona ruh bagʻishladi. Unda partiya xayrixohlari shaxsini tasdiqlovchi hujjatlar bilan kelishib, imzo varaqalariga qoʻyilgan shaxsiy imzolari orqali Oʻzbekiston Xalq demokratik partiyasini qoʻllab- quvvatlashga rozi ekanliklarini bildirdilar.

Shuni alohida taʼkidlash joizki, imzo yigʻish jarayoni Saylov qonunchiligiga binoan oʻtkazilayotgani fuqarolarning oʻz xohish-irodalarini emin-erkin ifodalash imkoniyatlarini kengaytirmoqda. Bu fikrlarimiz tadbir davomida fuqarolar bilan partiya masʼullarining samimiy va oshkora muloqot tarzidagi davra suhbatida ham oʻz tasdigʻini topdi.

Partiya masʼullari tomonidan joriy yilda boʻlib oʻtadigan Oliy Majlis Qonunchilik palatasi va mahalliy Kengashlarga deputatlar saylovining avvalgi yillardagi saylovlardan farqli jihatlari hamda Oʻzbekiston Xalq demokratik partiyasi gʻoyalari, shuningdek, boʻlajak siyosiy jarayonning mazmun-mohiyati xususida fuqarolarga zarur tushunchalar berildi.

Taʼkidlanganidek, partiyaning maqsadi – davlat hokimiyatining vakillik organlarida davlat va jamiyat tomonidan manzilli ijtimoiy himoya va ijtimoiy qoʻllab-quvvatlashga ehtiyojmand aholi qatlamlari manfaatlarini himoya qilishdan iboratdir.

Partiya, ushbu insonlarning manfaatlaridan kelib chiqib, vakillik demokratiyasi mexanizmlari vositasida qonunlarni qabul qilish, davlat hokimiyati ijroiya organlarini shakllantirish va ular tomonidan taraqqiyotning ustuvor yoʻnalishlari hamda tegishli vazifalarni amalga oshirish yoʻllarini belgilashda amaliy taʼsir koʻrsatish imkoniyatiga ega boʻlishni koʻzda tutadi.

Tadbir davomida partiya elektorati vakillari masʼullarga oʻzlarini qiziqtirgan savollar bilan murojaat qilib, tegishli javoblar oldilar.

R. Yoʻldosheva.