Хонадонларнинг куз-қиш мавсумига тайёрлиги кўздан кечирилмоқда
Айни кунларда Амударё туманидаги овул ва маҳаллаларда куз-қиш мавсумига тайёргарлик ишлари режали асосда амалга оширилмоқда. Туман прокурори Азиз Рўзметов бошчилигида тузилган ишчи гуруҳ Янгиобод, Дўстлик, Фаровон, Арна бўйи маҳалларида истиқомат қилувчи кам таъминланган оилаларнинг хонадонларида бўлиб, куз-қиш мавсумига тайёргарлик ишлари билан яқиндан танишдилар.
Масъуллар томонидан таъкидланганидек, фавқулодда ҳолатлар ва бахтсиз ҳодисаларнинг олдини олиш, болалар хавфсизлигини таъминлашда хонадонларда куз-қиш мавсумига тайёргарлик ишларининг тўғри ташкил этилиши муҳим аҳамият касб этади. Шу мақсадда ишчи гуруҳ аъзолари аҳолига ёнғин хавфсизлиги, газ ва электр таъминоти қоидаларига қатъий амал қилиш бўйича зарур тавсияларни беришди.
Қайд этилганидек, куз-қиш мавсумида ҳаво ҳароратининг кескин пасайиб кетиши билан фуқароларимиз томонидан хонадонларни иситиш мақсадида турли хилдаги иситиш ва табиий газ ускуналаридан фойдаланишга бўлган эҳтиёж кундан-кунга ошиб боради. Бу эса ўз навбатида ёнғин ва техника хавфсизлиги қоидалари талабларининг бузилиши натижасида хонадонларда табиий газ ва ҳаво аралашмасининг чақнашига, фуқароларнинг ис газидан заҳарланиш эҳтимоли ошишига олиб келиши мумкин. Шунингдек, ўзбошимчалик билан носоз ҳолатдаги иситиш қозонлари, табиий газ етказиб берувчи мосламалардан фойдаланиш ва дудбуронларининг вақтида тозаланмаслиги оқибатида бахтсиз ҳодисалар содир бўлаяпти.
Ўрганишлар вақтида яроқсиз ҳолдаги табиий газ мосламалари аниқланиб, улар замонавий ва тежамкор ускуналарга алмаштирилди. Иситиш қозонларининг мўриларида тозалаш ишлари ташкил этилди. Шунингдек, куз-қиш мавсумини беталофат ўтказиш бўйича аҳоли орасида тушунтириш-тарғибот ишлари олиб борилди. Бундай тадбирларни ташкил этиш бўйича Амударё туманида 3 та ишчи гуруҳ тузилган бўлиб, жойларда амалий ишлар давом этмоқда.
Бундан ташқари, тадбир давомида кам таъминланган оилаларда тарбияланаётган 4 нафар мактаб ўқувчиларига мактаб формаси ва бадиий китоблар совға қилинди.
Чиндан ҳам, бугунги кунда табиий газ ва электр энергиясидан тежамкорлик билан самарали фойдаланиш долзарб масалалардан ҳисобланади. Мавжуд қоидаларга амал қилиш орқали нафақат қайта тикланмас энергия захиралари тежалади, балки фавқулодда вазиятларнинг ҳам олди олинади.
Одатда табиий газ босими қанча баланд бўлса, ундан борича фойдаланишга ҳаракат қиламиз. Аслида, газ плитасининг олови қозон, това, чойнак тагидан ташқарига чиқмаслиги керак. Бундай ҳолда сиз табиий газни меъёрдан 50 фоиз ёки ундан кўпроқ сарфлайсиз.
Хонадонларда ёнғин ҳолатларининг олдини олишда табиий газ ускуналари ва иситиш мосламаларидан фойдаланишда ёнғин ва хавфсизлик талабларига амал қилиш лозим. Қўлбола ва носоз иситиш тизими мосламаларидан фойдаланманг. Бу воситалар ёнғин содир бўлишида асосий сабаблардан ҳисобланади. Иситиш қозонларидан фойдаланишдан олдин мўриларининг созлигига, уларнинг турли буюм ва тўсиқлар билан беркитилмаганлигига ҳамда масъул ташкилотлар томонидан ўз вақтида тозаланишига алоҳида эътибор беринг. Иситиш тизимларига ускуналарни улаш тартиб-қоидаларига амал қилинг ва уларга резина шланглар орқали уланишга йўл қўйманг. Агарда хонада газ ҳидини сезсангиз, чироқ ва учқун чиқарувчи мосламалардан асло фойдаланманг, дарҳол хонани шамоллатинг ҳамда табиий газ хизмати идорасига зудлик билан хабар беринг.
Ёнғин хавфсизлиги қоидаларига амал қилиш орқали ўзингиз, яқинларингизни ҳамда уй-жойингизни кўнгилсиз ҳодисалардан сақлаган бўласиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
