Xonadonlarning kuz-qish mavsumiga tayyorligi koʻzdan kechirilmoqda
Ayni kunlarda Amudaryo tumanidagi ovul va mahallalarda kuz-qish mavsumiga tayyorgarlik ishlari rejali asosda amalga oshirilmoqda. Tuman prokurori Aziz Roʻzmetov boshchiligida tuzilgan ishchi guruh Yangiobod, Doʻstlik, Farovon, Arna boʻyi mahallarida istiqomat qiluvchi kam taʼminlangan oilalarning xonadonlarida boʻlib, kuz-qish mavsumiga tayyorgarlik ishlari bilan yaqindan tanishdilar.
Masʼullar tomonidan taʼkidlanganidek, favqulodda holatlar va baxtsiz hodisalarning oldini olish, bolalar xavfsizligini taʼminlashda xonadonlarda kuz-qish mavsumiga tayyorgarlik ishlarining toʻgʻri tashkil etilishi muhim ahamiyat kasb etadi. Shu maqsadda ishchi guruh aʼzolari aholiga yongʻin xavfsizligi, gaz va elektr taʼminoti qoidalariga qatʼiy amal qilish boʻyicha zarur tavsiyalarni berishdi.
Qayd etilganidek, kuz-qish mavsumida havo haroratining keskin pasayib ketishi bilan fuqarolarimiz tomonidan xonadonlarni isitish maqsadida turli xildagi isitish va tabiiy gaz uskunalaridan foydalanishga boʻlgan ehtiyoj kundan-kunga oshib boradi. Bu esa oʻz navbatida yongʻin va texnika xavfsizligi qoidalari talablarining buzilishi natijasida xonadonlarda tabiiy gaz va havo aralashmasining chaqnashiga, fuqarolarning is gazidan zaharlanish ehtimoli oshishiga olib kelishi mumkin. Shuningdek, oʻzboshimchalik bilan nosoz holatdagi isitish qozonlari, tabiiy gaz yetkazib beruvchi moslamalardan foydalanish va dudburonlarining vaqtida tozalanmasligi oqibatida baxtsiz hodisalar sodir boʻlayapti.
Oʻrganishlar vaqtida yaroqsiz holdagi tabiiy gaz moslamalari aniqlanib, ular zamonaviy va tejamkor uskunalarga almashtirildi. Isitish qozonlarining moʻrilarida tozalash ishlari tashkil etildi. Shuningdek, kuz-qish mavsumini betalofat oʻtkazish boʻyicha aholi orasida tushuntirish-targʻibot ishlari olib borildi. Bunday tadbirlarni tashkil etish boʻyicha Amudaryo tumanida 3 ta ishchi guruh tuzilgan boʻlib, joylarda amaliy ishlar davom etmoqda.
Bundan tashqari, tadbir davomida kam taʼminlangan oilalarda tarbiyalanayotgan 4 nafar maktab oʻquvchilariga maktab formasi va badiiy kitoblar sovgʻa qilindi.
Chindan ham, bugungi kunda tabiiy gaz va elektr energiyasidan tejamkorlik bilan samarali foydalanish dolzarb masalalardan hisoblanadi. Mavjud qoidalarga amal qilish orqali nafaqat qayta tiklanmas energiya zaxiralari tejaladi, balki favqulodda vaziyatlarning ham oldi olinadi.
Odatda tabiiy gaz bosimi qancha baland boʻlsa, undan boricha foydalanishga harakat qilamiz. Aslida, gaz plitasining olovi qozon, tova, choynak tagidan tashqariga chiqmasligi kerak. Bunday holda siz tabiiy gazni meʼyordan 50 foiz yoki undan koʻproq sarflaysiz.
Xonadonlarda yongʻin holatlarining oldini olishda tabiiy gaz uskunalari va isitish moslamalaridan foydalanishda yongʻin va xavfsizlik talablariga amal qilish lozim. Qoʻlbola va nosoz isitish tizimi moslamalaridan foydalanmang. Bu vositalar yongʻin sodir boʻlishida asosiy sabablardan hisoblanadi. Isitish qozonlaridan foydalanishdan oldin moʻrilarining sozligiga, ularning turli buyum va toʻsiqlar bilan berkitilmaganligiga hamda masʼul tashkilotlar tomonidan oʻz vaqtida tozalanishiga alohida eʼtibor bering. Isitish tizimlariga uskunalarni ulash tartib-qoidalariga amal qiling va ularga rezina shlanglar orqali ulanishga yoʻl qoʻymang. Agarda xonada gaz hidini sezsangiz, chiroq va uchqun chiqaruvchi moslamalardan aslo foydalanmang, darhol xonani shamollating hamda tabiiy gaz xizmati idorasiga zudlik bilan xabar bering.
Yongʻin xavfsizligi qoidalariga amal qilish orqali oʻzingiz, yaqinlaringizni hamda uy-joyingizni koʻngilsiz hodisalardan saqlagan boʻlasiz.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
