Китобхонлик маданияти ва мутолаага эҳтиёж болаликдан бошлансин!

Кўнгил зиёси бўлган китобларга меҳр қўйиш ва китобхонлик маданияти ёш танламайди. Фарзандларимиз бутун вақтини телефон билан ойнаи жаҳон олдида ўтказиб улғайишмасин. Зеро, бугун китоб ўқиган бир бола эртага телевизор кўриб ўтирган ўнта болани бошқариши ҳаёт ҳақиқатига айланган. Қолаверса, бундай ускуналардан доимий фойдаланиш бола соғлиғига жиддий зиён етказиши ҳам сир эмас.

Болаларда китобхонлик маданиятини шакллантиришда мактабгача таълим ташкилотлари ва ахборот кутубхона марказларининг самарали фаолияти муҳим аҳамият касб этади. Бола ёшига мос ҳар хил қизиқарли эртаклар, шеърлар ҳамда қўшиқлар муҳитида тарбияланар, экан нутқ шаклланиши, тасаввур дунёси кенгайиши, хотира кўникмалари ривожида ижобий таъсир кўрсатади. Шу сабабли Амударё тумани Ахборот-кутубхона марказида томонидан болаларни китобхонликка жалб қилиш бўйича турли тадбирлар, акциялар ўтказилмоқда.

Марказ томонидан 1 июнь Халқаро болаларни ҳимоя қилиш куни муносабати билан ҳам “Болалар китоб фестивали” доирасида маънавий-маърифий тадбир ташкил этилди. Мазкур тадбирда Амударё туманидаги “Радуга” нодавлат мактабгача таълим ташкилоти раҳбари Феруза Тажибоева боғчанинг битирувчи болалари билан меҳмон бўлди. “Эзгулик – шиоримиз, марифат - қуролимиз” шиори остида ўтказилган тадбир болажонларга унитилмас қувонч бағишлади.

Табир аввалида туман Ахборот-кутубхона маркази ходими Роҳатой Раманова болаларни байрам билан самимий табриклаб, ташкилот раҳбари Феруза Тажибоевага марказда болалар учун яратилган шароит ва ранг-баранг чиройли эртак китоблар ҳақида маълумот берди. Шунингдек, марказ ходимлари томонидан болаларда китобхонлик маданиятини шакллантириш мақсадида боғчаларда ўтказилаётган китоб кўргазмалари, ахборот-кутубхона марказида болаларга бағишлаб ташкил этилган экуркурсияларнинг аҳамияти алоҳида таъкидланди.

Шундан кейин, марказ мутахассиси Муножат Сафарбоева тамонидан болалар иштирокида ўйинлар ўтказилди. Ўйин шартига кўра ёш рассомлар махсус тайёрланган расмларга ранг беришди. Кимдир машинга ранг берса, бошқа иштирокчи ўзи севган эртак қаҳрамонини жонлантиришга ҳаракат қилди. Болаларнинг расмларни беғубор тилда тасвирлаши, қаҳрамонлар образига кириб айтган сўзлари барчанинг кўнглига хуш кайфият бағишлади. Муножаат Сафарбоева тамонидан образга кириб айтилган қизиқарли эртаклар болаларга манзур бўлди.

Шундан кейин болалар боғчада ёд олган ўзбек ва рус тилидаги шеърларни ифодали ўқишди. Мазкур шеърларда уларнинг улғайганда ким бўлиши, қайси касбни яхши кўриши, табиат манзалари ҳамда эртак қаҳрамонлари баён этилди. Шеър ўқиш тасаввурни бойитиб, нутқий шаклланишни ҳам яхшилайди. Қизлар томонидан тайёрланиб ижро этилган расқлар эса, тадбирга байрамона файз бағишлади. Рақс нафақат кайфиятни кўтаради, балки боланинг соғлом ривожланишида ҳам муҳим аҳамият касб этади.

Тадбир якунида болажонларга ташкилотчилар тамонидан байрам совғалари билан фахрий ёрлиқлар топширилди. Мактабгача таълим ташкилоти раҳбари Феруза Тажибаева кўтаринки руҳда ўтказилган маънавий-марифий тадбир учун туман Ахборот-кутубхона ходимларига миннатдорчилик билдирди.

Маълумот ўрнида айтиш жоизки, бугунги кунда ахборот-кутубхона маркази фондида ҳар хил жанрдаги умумий сони 65минг 300дан зиёд илмий, бадий, публицистик китоблар ҳамда газета-журналлар мавжуд. Шундан 3мингга яқинини болаларга бағишланган китоблар ташкил этади. Ёзги таътил вақтида ахборот-кутубхона маркази ходимлари жойларга бориб, очиқ осмон остида – табиат қўйнида тадбирлар, давра суҳбатлари, китоб кўргазмалари, шоир-ёзувчилар билан учрашувлар ташкил этишни режалаштирмоқдалар.

Бола бамисоли ниҳолга ўхшайди. Уларни қандай муҳитда тарбия қилиш ўзимизга боғлиқ. Зеро, китобларни дўст билиб улағайган инсондан ёмонлик чиқмайди. Фурсатдан фойдаланиб, туманимиздаги барча ёшларни ҳамда аҳолини Ахборот-кутубхона марказига таклиф қиламиз.

Роҳатой Рамонова, Амударё тумани Ахборот кутубхона маркази Ахборот библиография хизмати раҳбари