Аждодларнинг насли-насаби ва шажараси авлодларнинг узилмас занжири орқали давом этаверади

Ҳар йили 15 май санаси Халқаро оила куни сифатида оиланинг аҳамиятини тарғиб қилиш ва унинг жамиятдаги ролини ошириш мақсадида бутун дунё бўйлаб нишонлаб келинади. Бу сана БМТ Бош Ассамблеяси томонидан 1993 йилда таъсис этилган ва 1994 йилдан буён ҳар йили нишонланади.

Оила – жамиятнинг асосий бўғини, унинг маънавий ва ижтимоий ривожланишида муҳим аҳамият касб этувчи муқаддас даргоҳдир. Оилада олинган тарбия, меҳр-муҳаббат ва ўзаро ҳурмат туйғулари фарзандларнинг келгусида жамиятга фойдаси тегадиган олижаноб инсонлар бўлиб вояга етишларида ҳал қилувчи роль ўйнайди. Шу сабабли ҳам юртимизда оилавий қадриятларни мустаҳкамлаш, оилаларнинг иқтисодий, маънавий ривожланиши учун зарур шароитлар яратиш масаласига алоҳида эътибор қаратилмоқда. Натижада намунали оилалар сафи йил сайин кўпаймоқда.

Амударёлик Жуманиёзовлар оиласи ҳам ана шундай ибратли оилалардан бири. Оила раҳбари Рустам Жуманиёзов 1964 йилда Чойкўл овулида туғилган. 1981 йилда собиқ Айний номли, ҳозирги 22-сонли мактабни тугатиб, 1983-85 йилларда ҳарбий хизматни ўтаган. Ҳарбий хизматдан қайтгач, 1985 йилда Тошкент давлат тиббиёт институтининг даволаш иши факультетига ўқишга кириб, мазкур институтни 1991 йилда тугатган лавҳамиз қаҳрамони шу кунга қадар тиббиёт соҳасида самарали фаолият юритмоқда. Ҳозирда Амударё тумани Тиббиёт бирлашмасининг жарроҳлик бўлими мудири вазифасида ишлаб, беморларга шифо улашиш билан бир қаторда бўлимда ишловчи ўнлаб шифокорлар, ўрта тиббиёт ходимларига раҳбарлик қилиб келмоқда.

Уч нафар фарзанднинг отаси бўлган лавҳамиз қаҳрамони умр йўлдоши – туман Тиббиёт бирлашмасининг “Тез ёрдам” бўлими навбатчи ҳамшираси Сапаргул Абдураззоқова билан фарзандларига берган таълим-тарбияси, жамиятдаги ўрни сабабли бу оила эл-юртда ибратли, дея сифатида эътироф этилади.

Ота-онанинг тарбиясини, таълимини олган икки ўғил ва бир қиз ҳам олий маълумотли. Тўнғич ўғли Хурсандбек 1991 йилда дунёга келди. Мактабда аъло баҳоларга ўқиб, олийгоҳни ҳам муваффақиятли тамомлаган Хурсандбек ҳам бугун камолга етиб, оила қурди. Турмуш ўртоғи билан икки нафар фарзандни вояга етказмоқда. У Чойкўл овул фуқаролар йиғинида ёшлар етакчиси вазифасида фаолият юритади. Оиланинг келини Салтанат эса 22-сонли мактабда тарих фанидан дарс беради.

Намунали оиланинг иккинчи фарзанди – қизи Фазилат ҳам оилали, икки нафар фарзанди бор. У ҳам 22-сонли мактабда психолог вазифасида фаолият юритади.

Кенжа фарзанд Хуршид эса Жаҳон иқтисодиёти ва дипломатия университетини тугатиб, ҳозирда Тошкент шаҳрида яшаб, Ўзбекистон Республикаси Адлия вазирлиги тизимида фаолият юритмоқда.

Рустам Жуманиёзов ва Сапаргул Абдураззақовалар оила қуриб, илк фарзанди дунёга келганиданоқ ота-оналарининг, бобо-бувиларининг тавсиялари ва ёрдами билан фарзанд тарбиясига алоҳида эътибор қаратишди. Иккаласи ҳам тиббиёт соҳасида фаолият юритгани сабабли уларнинг жисмоний, руҳий ва ақлий ривожланишига алоҳида меҳр билан ёндашишди. Фарзандлари катта бўлгач, соғлом турмуш тарзи, тўғри овқатланиш ва жисмоний фаоллик борасида тавсиялар бериб, ўзаро меҳр-оқибатли, инсофли ва диёнатли бўлишга чорлашди. Болаларга таълим-тарбия бериш, уларнинг қизиқишларини ривожлантириш, мустақил фикрлашга ўргатиш, фарзандларига ўрнак бўлиш, улар онги ва қалбига ижобий хулқ-атворни сингдириш борасида қилган меҳнатлари сабабли бугун эл-юртда эъзозли мана шундай мустаҳкам оила бунёд бўлди.

Эндигина тетапоя бўлаётган, дунёни танишга интилаётган неваралар ҳам мана шундай қадриятлар асосида тарбияланмоқда. Шу тариқа аждодларнинг насли-насаби ва шажараси авлодларнинг узилмас занжири орқали давом этаверади.

Тилагимиз – юртимизда мана шундай ибратли оилалар сафи янада кўпаяверсин! Зеро, ҳар бир оила мустаҳкам, тинч-осойишта, маънавий ва иқтисодий баркамол бўлса, халқ, давлат ҳам тараққиёт сари дадил одимлайверади.

М.Шомуродов, Р.Баҳромов