Ajdodlarning nasli-nasabi va shajarasi avlodlarning uzilmas zanjiri orqali davom etaveradi

Har yili 15-may sanasi Xalqaro oila kuni sifatida oilaning ahamiyatini targʻib qilish va uning jamiyatdagi rolini oshirish maqsadida butun dunyo boʻylab nishonlab kelinadi. Bu sana BMT Bosh Assambleyasi tomonidan 1993-yilda taʼsis etilgan va 1994-yildan buyon har yili nishonlanadi.

Oila – jamiyatning asosiy boʻgʻini, uning maʼnaviy va ijtimoiy rivojlanishida muhim ahamiyat kasb etuvchi muqaddas dargohdir. Oilada olingan tarbiya, mehr-muhabbat va oʻzaro hurmat tuygʻulari farzandlarning kelgusida jamiyatga foydasi tegadigan olijanob insonlar boʻlib voyaga yetishlarida hal qiluvchi rol oʻynaydi. Shu sababli ham yurtimizda oilaviy qadriyatlarni mustahkamlash, oilalarning iqtisodiy, maʼnaviy rivojlanishi uchun zarur sharoitlar yaratish masalasiga alohida eʼtibor qaratilmoqda. Natijada namunali oilalar safi yil sayin koʻpaymoqda.

Amudaryolik Jumaniyozovlar oilasi ham ana shunday ibratli oilalardan biri. Oila rahbari Rustam Jumaniyozov 1964-yilda Choykoʻl ovulida tugʻilgan. 1981-yilda sobiq Ayniy nomli, hozirgi 22-sonli maktabni tugatib, 1983-85-yillarda harbiy xizmatni oʻtagan. Harbiy xizmatdan qaytgach, 1985-yilda Toshkent davlat tibbiyot institutining davolash ishi fakultetiga oʻqishga kirib, mazkur institutni 1991-yilda tugatgan lavhamiz qahramoni shu kunga qadar tibbiyot sohasida samarali faoliyat yuritmoqda. Hozirda Amudaryo tumani Tibbiyot birlashmasining jarrohlik boʻlimi mudiri vazifasida ishlab, bemorlarga shifo ulashish bilan bir qatorda boʻlimda ishlovchi oʻnlab shifokorlar, oʻrta tibbiyot xodimlariga rahbarlik qilib kelmoqda.

Uch nafar farzandning otasi boʻlgan lavhamiz qahramoni umr yoʻldoshi – tuman Tibbiyot birlashmasining “Tez yordam” boʻlimi navbatchi hamshirasi Sapargul Abdurazzoqova bilan farzandlariga bergan taʼlim-tarbiyasi, jamiyatdagi oʻrni sababli bu oila el-yurtda ibratli, deya sifatida eʼtirof etiladi.

Ota-onaning tarbiyasini, taʼlimini olgan ikki oʻgʻil va bir qiz ham oliy maʼlumotli. Toʻngʻich oʻgʻli Xursandbek 1991-yilda dunyoga keldi. Maktabda aʼlo baholarga oʻqib, oliygohni ham muvaffaqiyatli tamomlagan Xursandbek ham bugun kamolga yetib, oila qurdi. Turmush oʻrtogʻi bilan ikki nafar farzandni voyaga yetkazmoqda. U Choykoʻl ovul fuqarolar yigʻinida yoshlar yetakchisi vazifasida faoliyat yuritadi. Oilaning kelini Saltanat esa 22-sonli maktabda tarix fanidan dars beradi.

Namunali oilaning ikkinchi farzandi – qizi Fazilat ham oilali, ikki nafar farzandi bor. U ham 22-sonli maktabda psixolog vazifasida faoliyat yuritadi.

Kenja farzand Xurshid esa Jahon iqtisodiyoti va diplomatiya universitetini tugatib, hozirda Toshkent shahrida yashab, Oʻzbekiston Respublikasi Adliya vazirligi tizimida faoliyat yuritmoqda.

Rustam Jumaniyozov va Sapargul Abdurazzaqovalar oila qurib, ilk farzandi dunyoga kelganidanoq ota-onalarining, bobo-buvilarining tavsiyalari va yordami bilan farzand tarbiyasiga alohida eʼtibor qaratishdi. Ikkalasi ham tibbiyot sohasida faoliyat yuritgani sababli ularning jismoniy, ruhiy va aqliy rivojlanishiga alohida mehr bilan yondashishdi. Farzandlari katta boʻlgach, sogʻlom turmush tarzi, toʻgʻri ovqatlanish va jismoniy faollik borasida tavsiyalar berib, oʻzaro mehr-oqibatli, insofli va diyonatli boʻlishga chorlashdi. Bolalarga taʼlim-tarbiya berish, ularning qiziqishlarini rivojlantirish, mustaqil fikrlashga oʻrgatish, farzandlariga oʻrnak boʻlish, ular ongi va qalbiga ijobiy xulq-atvorni singdirish borasida qilgan mehnatlari sababli bugun el-yurtda eʼzozli mana shunday mustahkam oila bunyod boʻldi.

Endigina tetapoya boʻlayotgan, dunyoni tanishga intilayotgan nevaralar ham mana shunday qadriyatlar asosida tarbiyalanmoqda. Shu tariqa ajdodlarning nasli-nasabi va shajarasi avlodlarning uzilmas zanjiri orqali davom etaveradi.

Tilagimiz – yurtimizda mana shunday ibratli oilalar safi yanada koʻpayaversin! Zero, har bir oila mustahkam, tinch-osoyishta, maʼnaviy va iqtisodiy barkamol boʻlsa, xalq, davlat ham taraqqiyot sari dadil odimlayveradi.

M.Shomurodov, R.Bahromov