Qoramon mahallasida elektr infratuzilmasi yangilanmoqda

Aholi turmush farovonligini yuksaltirish va tadbirkorlik subʼektlari uchun qulay shart-sharoitlar yaratishda uzluksiz elektr energiyasi taʼminotining oʻrni beqiyosdir. 2026-yilda hududlarni yangicha yondashuvlar asosida rivojlantirish orqali aholi daromadlarini oshirish, barqaror ish oʻrinlarini yaratish hamda kambagʻallikni qisqartirish chora-tadbirlari toʻgʻrisidagi Prezident qarori ijrosi doirasida bugungi kunda joylarda keng koʻlamli bunyodkorlik ishlari jadal surʼatlarda olib borilmoqda. Ushbu hujjat asosida “Ogʻir mahalla” toifasiga kiritilgan Amudaryo tumanidagi Qoramon mahallasi hududida ham sanoat va xizmat koʻrsatish sohasini yanada rivojlantirish uchun zarur boʻlgan zamonaviy elektr infratuzilmasini shakllantirish ishlari qizgʻin pallaga kirgan. Mazkur jarayonlar nafaqat aholi xonadonlarini elektr energiyasi bilan taʼminlash, balki yangi ishlab chiqarish quvvatlarini ishga tushirish orqali aholi bandligini taʼminlashga xizmat qilishi bilan ham gʻoyat ahamiyatlidir.

Loyiha doirasida mahallaning Keksa otaxonlar va Umidli koʻchalariga 2 ta yangi transformator punkti oʻrnatilishi koʻzda tutilgan. Shuningdek, hududda jami 17 kilometr uzunlikdagi yangi elektr tarmogʻini tortish ishlari rejalashtirilgan boʻlib, bu elektr uzatish tizimidagi yoʻqotishlarning oldini olishga va kuchlanishning doimiy meʼyorida boʻlishiga zamin yaratadi. Bundan tashqari, Buyuk avlod va Majnuntol koʻchalarida ham qoʻshimcha ravishda 4 ta transformator punkti oʻrnatilishi belgilangan.

Loyihaning amaliy bosqichida bugungi kunga qadar sezilarli natijalarga erishildi. Jumladan, quruvchi va mutaxassislar tomonidan shu vaqtgacha 222 ta mustahkam temir-beton tayanch oʻrnatib boʻlindi. Ayni paytda esa yana 68 ta shunday tayanchni oʻrnatish ishlari izchil davom ettirilmoqda va xavfsiz SIP kabellarini tortish jarayonlari ham parallel ravishda olib borilyapti.

Mazkur yirik loyiha va keng koʻlamli qurilish-montaj ishlari «Qoraqalpoq hududiy elektr tarmoqlari korxonasi» aktsiyadorlik jamiyatining Amudaryo tuman filiali mutaxassislari tomonidan sifatli darajada amalga oshirilmoqda. Olib borilayotgan bunday ezgu va tizimli ishlar yaqin kelajakda Qoramon mahallasining iqtisodiy salohiyatini oshirishga, sanoat obʼektlarining uzluksiz ishlashiga, eng muhimi esa, aholi turmush darajasi yaxshilanib, ularning daromadlari koʻpayishiga mustahkam poydevor boʻlib xizmat qiladi.