Меҳнат ярмаркасида иштирок этган 21 нафар фуқаро доимий иш жойига эга бўлди

Меҳнат ярмаркалари аҳоли, айниқса меҳнат бозорига энди кириб келаётган ёшларни иш билан таъминлашда муҳим аҳамиятга эга. Бу каби тадбирлар иш излаётган шахсларга ва иш берувчиларга бир-бирлари билан тўғридан-тўғри мулоқот қилиш имконини беради. Шу сабабли ҳам мамлакатимизда аҳолини иш билан таъминлаш, янги иш ўринлари яратиш бўйича давлат сиёсати доирасида меҳнат ярмаркалари алоҳида аҳамият касб этади. Бу борада Амударё муҳандислик техникумида ўтказилган “Карьера куни” ҳамда “Меҳнат ярмаркаси” ҳам нафақат иқтисодий, балки ижтимоий жиҳатдан аҳамиятли тадбир бўлди.

Тадбирда туман ҳокими ўринбосари Фаҳриддин Юсупов, туман прокурори ёрдамчиси Санжар Абдуллаев, Камбағалликни қисқартириш ва бандликка кўмаклашиш бўлими бошлиғи Рашид Салаев, мазкур бўлим бошлиғининг ўринбосари Баҳодир Болтабоев, Мактабгача ва мактаб таълими бўлими бошлиғи Ялғаш Шомуратов, Савдо-саноат палатаси туман бўлими бошлиғи Мақсуд Ражабов ва тумандаги муассаса, корхона ҳамда ташкилотлар масъуллари, фаол тадбиркорлар, ишбилармонлар иштирок этди.

Тадбирнинг асосий мақсади туман ҳудудида яшовчи иш изловчи фуқаролар, айниқса ёшларни, умумтаълим мактаблари, касб-ҳунар таълими масканлари, олий ўқув юртлари битирувчиларини мавжуд бўш иш ўринлари билан яқиндан таништиришдир.

Меҳнат ярмаркасида таклиф этилган бўш иш ўринлари иш изловчиларга кенг танлов имкониятларини тақдим этди. Жумладан, ярмаркада тумандаги турли корхона ва ташкилотлар ўзларида мавжуд бўлган 339та бўш иш ўринлари билан иштирок этди. Бундан ташқари, салоҳиятли тадбиркорлар – “Расулов Ойбек таомлари” оилавий корхонаси 50 та, “JKB Energy Amudaryo group” МЧЖ 100та, “Жумамурод уста” МЧЖ 10 та, “Равшанбек Юлдузхон” хусусий корхонаси 10 та бўш иш ўринлари билан қатнашди.

Меҳнат ярмаркасида аҳолининг турли тоифа қатламлари, жумладан ёшлар, аёллар, битирувчилар, ногиронлиги бўлган шахслар, жазони ижро этиш муассасасидан озод қилинган, ҳарбий хизматдан келган, меҳнат миграциясидан қайтган юртдошларимиз, шунингдек алимент тўловчи фуқаролар, жами 145 нафар иш изловчилар иштирок этди.

Иштирокчиларнинг 21 нафари, шу жумладан 1 нафар ногиронлиги бўлган фуқаро доимий ишга жойлаштирилган бўлса, 12 нафарига касбга ўқитиш, қайта ўқиш курсларига йўлланма берилди. 60 нафар фуқаро ҳақ тўланадиган жамоат ишларига жойлаштирилиб, меҳнат қонунчилигига оид масалалар бўйича 39 нафар фуқарога ҳуқуқий маслаҳатлар берилди.

Бундан ташқари, Ўзбекистон Республикаси Вазирлар Маҳкамасининг 2022 йил 11 май кунги 252-сонли қарорига асосан туман ҳоким ёрдамчилари томонидан 13 нафар ишсиз хотин-қизларга бандлигини таъминлаш мақсадида субсидия асосида тикув машиналари топширилди.

Айтиш керакки, аҳоли бандлиги иқтисодий ва ижтимоий ривожланишнинг муҳим омили ҳисобланади. Иш билан таъминланган аҳоли иқтисодиётнинг барқарорлигига ва ўсишига ҳисса қўшади. Шу сабабли мамлакатимизда аҳоли бандлигини таъминлаш ва ишсизликни камайтириш бўйича давлат сиёсати доирасида кўплаб ислоҳотлар амалга оширилмоқда. Бу ислоҳотлар орқали янги иш ўринлари яратиш, аҳолининг даромадларини ошириш ва камбағалликни қисқартириш мақсад қилинган.

Меҳнат ярмаркаси, айниқса касб-ҳунар мактаблари ва олий ўқув юртлари битирувчилари учун ажойиб имконият бўлди. Бундай тадбирлар туманнинг иқтисодий ривожланишига ва аҳолининг иш билан таъминланишига катта ҳисса қўшади, бу эса ўз навбатида камбағалликни қисқартириш ҳамда халқ фаровонлигини янада оширишга ёрдам беради.

Баҳодир Болтабоев, туман Камбағалликни қисқартириш ва бандликка кўмаклашиш бўлими бошлиғининг ўринбосари