Давлат хавфсизлик хизмати Амударё туман бўлими томонидан йиғилиш ташкил этилди

Мамлакатимизда муҳтарам Президентимиз ташаббуси билан ёшларга оид давлат сиёсатини янги босқичга олиб чиқиш мақсадида кенг кўламли ислоҳотлар амалга оширилмоқда. Ҳудудларда бу борада қабул қилинаётган қарор ва фармонларнинг амалий ижросини таъминлаш юзасидан тизимли чора-тадбирлар йўлга қўйилган.

Амударё тумани ҳокимлигининг мажлислар залида Давлат хавфсизлик хизмати туман бўлими томонидан ёшларга оид давлат сиёсати борасида амалга оширилаётган янги ислоҳотларни тумандаги ёшлар етакчиларига етказиш мақсадида йиғилиш бўлиб ўтди.

Йиғилишда тумандаги 49 та овул ва маҳаллаларда фаолият юритаётган ёшлар етакчилари иштирок этдилар. Йиғилишда Президентимизнинг 23 февраль кунги видеоселектр йиғилишида белгилаб берилган устувор вазифалар хусусида сўз юритилди.

Қайд этилишича, мамлакатимизда ёшларга оид давлат сиёсати янги босқичга кўтарилиб, эртанги кун эгаларини ҳар томонлама қўллаб-қувватлашга алоҳида эътибор қаратилмоқда. Ёшларнинг бандлигини таъминлаш, уларга касб-ҳунар ўргатиш, сифатли таълим олиши ва инновацион ғояларини рўёбга чиқаришлари учун шароитлар яратиш мақсадида қатор дастурлар, янги лойиҳалар амалга оширилиб, ёшлар учун муносиб иш ва турмуш шароитини яратиш, бўш вақтини мазмунли ташкил этишга қаратилган комплекс чора-тадбирлар амалга оширилмоқда.

Йиғилишда сўзга чиққан масъуллар давлатимиз раҳбари томонидан ёшларни ижтимоий қўллаб-қувватлаш, жамиятнинг ҳар жабҳасида ёшлар фаоллигини ошириш бўйича белгилаб берилган вазифаларни ёшлар етакчиларига етказдилар.

Хусусан, ҳудудларда “Ёшлар дафтари”га киритилган ёшлар билан ишлаш, ёшларни ҳар томонлама қўллаб-қувватлаш, улар бандлигига кўмаклашиш ҳамда ижтимоий фаоллигини янада оширишга оид қўшимча чора-тадбирларни амалга ошириш борасидан таклиф ва тавсиялар берилди.

Шунингдек, ёшлар ўртасида ҳуқуқбузарлик ва жиноятлар содир этилишининг олдини олиш, жойларда ижтимоий-маънавий муҳит барқарорлиги ва тарбиявий ишлар самарадорлигини ошириш борасида олдинда турган устувор вазифалар хусусида сўз юритилди.

Ёшлар етакчилари томонидан ўзларининг фаолиятлари мобайнида дуч келаётган турли муаммо ва қийинчиликлар юзасидан саволлар берилди. Масъуллар томонидан барча саволларга батафсил жавоблар қайтарилди.

Шунингдек, ёшлар етакчилари эртанги кун эгаларининг бўш вақтларидан унумли фойдаланиш, санъат ва спортга қизиқишларини уйғотиш мақсадида турли маънавият ва спорт тадбирларини ташкил этиш борасида таклифлар билдирдилар.

Маъсуллар билдирилган муаммо ва камчиликларни бартараф этиш, таклиф ва тавсияларни ўрганиб, улар юзасидан тегишли чоралар кўришга келишиб олдилар.

Чарос Арслонова, туман ҳокимлигининг Ахборот хизмати раҳбари.