САЙЁР СУДДА ҲУҚУҚБУЗАРЛАРГА ЖАЗО ТАЙИНЛАНДИ
Жиноят ишлари бўйича Амударё туман суди томонидан сайёр суд мажлиси ўтказилди.
2023 йил 13 декабрь куни Амударё туманидаги ихтисослаштирилган мактабнинг мажлислар залида бўлиб ўтган ушбу очиқ сайёр суд мажлисида Амударё тумани Ички ишлар бўлими томонидан тақдим қилинган маъмурий ҳуқуқбузарликка оид ишлар кўриб чиқилди.
Суд иши давомида Ўзбекистон Республикаси Маъмурий Жавобгарлик тўғрисидаги Кодекснинг 183-моддасида кўрсатилган ҳуқуқбузарликни, яъни майда безорилик содир этган 4 нафар ҳуқуқбузарларга оид иш тафсилотлари ўрганилди. Ушбу шахсларга нисбатан юритилган маъмурий иш ҳужжатлари атрофлича кўриб чиқилди. Ҳуқуқбузарларга амалдаги қонунчилик талаблари тушунтирилди ва уларга нисбатан тегишли жазо чоралари тайинланган ҳолда қарорлар қабул қилинди.
Ҳуқуқбузарлардан бирига нисбатан Ўзбекистон Республикаси Маъмурий Жавобгарлик тўғрисидаги Кодекснинг 131-моддасининг 2-қисмида назарда тутилган, яъни транспорт воситаларини маст ҳолда бошқарганлиги бўйича тўпланган иш материли кўриб чиқилиб, 15 сутка маъмурий қамоқ жазоси тайинланди. Шунингдек, Ўзбекистон Республикаси Маъмурий Жавобгарлик тўғрисидаги Кодекснинг 206-1-моддасида назарда тутилган, яъни тазйиқ ўтказган ва зўравонлик содир этган ёхуд уларни содир этишга мойил бўлган шахс томонидан ҳимоя ордери талабларини бажармаслик кўринишидаги ҳуқуқбузарликни содир этган фуқарога 5 сутка маъмурий қамоқ жазоси тайинланди.
Таъкидлаб ўтилганидек, маъмурий ҳуқуқбузарлик деганда қонун ҳужжатларига биноан маъмурий жавобгарликка тортиш назарда тутилган, шахсга, фуқароларнинг ҳуқуқлари ва эркинликларига, мулкчиликка, давлат ва жамоат тартибига, табиий муҳитга тажовуз қилувчи ғайриҳуқуқий, айбли, қасддан ёки эҳтиётсизлик орқасидан содир этилган ҳаракат ёки ҳаракатсизлик тушунилади. Ўзбекистонда содир этилган қилмишнинг маъмурий ҳуқуқбузарлик эканини ва жавобгарликка ёки жазога сазоворлиги Ўзбекистон Республикасининг Маъмурий жавобгарлик тўғрисидаги кодекси билан тартибга солинади.
Суд давомида масъуллар томонидан ушбу сайёр суд мажлиси фуқароларга қулайликлар яратиш ҳамда энг асосийси жазолаш эмас, тарбиялаш мақсадида ташкил этилганлиги тушунтирилди. Шунингдек, маъмурий ҳуқуқбузарлик содир этган шахсни қонунларга риоя этиш ва уларни ҳурмат қилиш руҳида тарбиялаш, ҳуқуқбузарнинг ўзи томонидан, ҳамда бошқа шахслар томонидан янги ҳуқуқбузарлик содир этилишининг олдини олиш мақсадида қўлланилиши таъкидлаб ўтилди. Жазо тайинлашдан мақсад фақат ҳуқуқбузарни жазолаш эмас, балки мазкур жазо тайинлаш орқали уни ўзи томонидан ва бошқа шахслар томонидан ҳуқуқбузарликлар содир этилишини олдини олиш эканлиги айтилди. Шу ўринда амалдаги қонунлар барча учун баробарлиги ва уни бузган ҳар қандай шахс, у ким бўлишидан қатъий назар қонунда белгиланган жазосини олиши муқаррарлиги ҳам эътироф этилди.
Ундан ташқари, тадбир давомида янгиланган Конституциянинг мазмун-моҳияти тушунтирилиб, қонунчиликдаги ўзгаришлар, суд-ҳуқуқ соҳасидаги ислоҳотлар тўғрисида сўз юритилди. Бу борада ихтисослаштирилган мактаб фаоллари, ҳуқуқни муҳофаза қилувчи орган ходимлари ва кенг жамоатчилик иштирокида савол-жавоб тарзида мулоқот ўтказилди.
А.Сафаров, Жиноят ишлари бўйича Амударё тумани суди раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
