SAYYoR SUDDA HUQUQBUZARLARGA JAZO TAYINLANDI
Jinoyat ishlari boʻyicha Amudaryo tuman sudi tomonidan sayyor sud majlisi oʻtkazildi.
2023-yil 13-dekabr kuni Amudaryo tumanidagi ixtisoslashtirilgan maktabning majlislar zalida boʻlib oʻtgan ushbu ochiq sayyor sud majlisida Amudaryo tumani Ichki ishlar boʻlimi tomonidan taqdim qilingan maʼmuriy huquqbuzarlikka oid ishlar koʻrib chiqildi.
Sud ishi davomida Oʻzbekiston Respublikasi Maʼmuriy Javobgarlik toʻgʻrisidagi Kodeksning 183-moddasida koʻrsatilgan huquqbuzarlikni, yaʼni mayda bezorilik sodir etgan 4 nafar huquqbuzarlarga oid ish tafsilotlari oʻrganildi. Ushbu shaxslarga nisbatan yuritilgan maʼmuriy ish hujjatlari atroflicha koʻrib chiqildi. Huquqbuzarlarga amaldagi qonunchilik talablari tushuntirildi va ularga nisbatan tegishli jazo choralari tayinlangan holda qarorlar qabul qilindi.
Huquqbuzarlardan biriga nisbatan Oʻzbekiston Respublikasi Maʼmuriy Javobgarlik toʻgʻrisidagi Kodeksning 131-moddasining 2-qismida nazarda tutilgan, yaʼni transport vositalarini mast holda boshqarganligi boʻyicha toʻplangan ish materili koʻrib chiqilib, 15 sutka maʼmuriy qamoq jazosi tayinlandi. Shuningdek, Oʻzbekiston Respublikasi Maʼmuriy Javobgarlik toʻgʻrisidagi Kodeksning 206-1-moddasida nazarda tutilgan, yaʼni tazyiq oʻtkazgan va zoʻravonlik sodir etgan yoxud ularni sodir etishga moyil boʻlgan shaxs tomonidan himoya orderi talablarini bajarmaslik koʻrinishidagi huquqbuzarlikni sodir etgan fuqaroga 5 sutka maʼmuriy qamoq jazosi tayinlandi.
Taʼkidlab oʻtilganidek, maʼmuriy huquqbuzarlik deganda qonun hujjatlariga binoan maʼmuriy javobgarlikka tortish nazarda tutilgan, shaxsga, fuqarolarning huquqlari va erkinliklariga, mulkchilikka, davlat va jamoat tartibiga, tabiiy muhitga tajovuz qiluvchi gʻayrihuquqiy, aybli, qasddan yoki ehtiyotsizlik orqasidan sodir etilgan harakat yoki harakatsizlik tushuniladi. Oʻzbekistonda sodir etilgan qilmishning maʼmuriy huquqbuzarlik ekanini va javobgarlikka yoki jazoga sazovorligi Oʻzbekiston Respublikasining Maʼmuriy javobgarlik toʻgʻrisidagi kodeksi bilan tartibga solinadi.
Sud davomida masʼullar tomonidan ushbu sayyor sud majlisi fuqarolarga qulayliklar yaratish hamda eng asosiysi jazolash emas, tarbiyalash maqsadida tashkil etilganligi tushuntirildi. Shuningdek, maʼmuriy huquqbuzarlik sodir etgan shaxsni qonunlarga rioya etish va ularni hurmat qilish ruhida tarbiyalash, huquqbuzarning oʻzi tomonidan, hamda boshqa shaxslar tomonidan yangi huquqbuzarlik sodir etilishining oldini olish maqsadida qoʻllanilishi taʼkidlab oʻtildi. Jazo tayinlashdan maqsad faqat huquqbuzarni jazolash emas, balki mazkur jazo tayinlash orqali uni oʻzi tomonidan va boshqa shaxslar tomonidan huquqbuzarliklar sodir etilishini oldini olish ekanligi aytildi. Shu oʻrinda amaldagi qonunlar barcha uchun barobarligi va uni buzgan har qanday shaxs, u kim boʻlishidan qatʼiy nazar qonunda belgilangan jazosini olishi muqarrarligi ham eʼtirof etildi.
Undan tashqari, tadbir davomida yangilangan Konstitutsiyaning mazmun-mohiyati tushuntirilib, qonunchilikdagi oʻzgarishlar, sud-huquq sohasidagi islohotlar toʻgʻrisida soʻz yuritildi. Bu borada ixtisoslashtirilgan maktab faollari, huquqni muhofaza qiluvchi organ xodimlari va keng jamoatchilik ishtirokida savol-javob tarzida muloqot oʻtkazildi.
A.Safarov, Jinoyat ishlari boʻyicha Amudaryo tumani sudi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
