Энг қадимий ва ҳамиша НАВҚИРОН БАЙРАМ
Ҳар бир куни қутлуғ янгиланишлар, қувонарли ўзгаришлар билан кечаётган юртимизнинг байрамлари, нишонланадиган муҳим саналари кўп. Бироқ, асл миллий байрамимиз – Наврўзи оламнинг мазмун-моҳияти жуда теран. Чунки Наврўз аввало шарқона янги йилнинг кириб келиши, деҳқоннинг ерга яхши ният билан уруғ сочиши билан бошланиб, эл-юртга қут-барака тилаб хурсандчилик қилиш, ўйин-кулгу билан давом эттирилади. Наврўз байрами шоҳтаоми – сумалак, гўжа, кўксўмсалар пиширилади. Кишиларнинг орасида меҳр-оқибат, ҳамжиҳатлик ришталарини мустаҳкамловчи, халқимизнинг меҳр-мурувватлилигини ифода этувчи урф-одатлари байрам кунлари янада яққол намоён бўлади.
Шунинг учун ҳам Наврўз асрлар оша яшаб келмоқда ва келгусида ҳам авлодларимиз турмушидан теран жой эгаллаши шубҳасиз.
Мен асли рус миллатидан бўлсам-да 1956 йилдан бери шу ерда яшаб, бахтли турмуш кечирганим, уйли-жойли, фарзандли, невара-чеварали бўлиб, элда эъзоз топиб яшаётганим учун тақдиримдан миннатдорман. Насибам Ўзбекистондай бағрикенг, инсонпарвар юртга сочилганидан бир умр хурсанд бўлиб яшаб келаяпман. Шукронамни меҳнатим, эл-юртга хизматим билан кўрсатишга интилдим.
1957 йилдан 30-сонли умумтаълим мактабида болаларга бошланғич синфларда сабоқ бердим. Ҳали мактаб нималигини билмайдиган болаларга илк савод ўргатдим. Мактабда ўқув ишлари бўйича директор ўринбосари, директор лавозимларида ишлаб, нафақага чиқдим.
Ҳозир саксон ёшнинг остона-сидаман. Фарзандларим, невараларим ҳам ўқиб, турли касб эгалари бўлиб етишди, чевараларим - ҳаётим қувончи. Уларга атаб ҳар йили Наврўз байрамида фарзандларим, келинларим кўмагида улкан қозонда сумалак пиширамиз, ҳаммамиз дастурхон атрофига йиғилиб, қувониб қоламиз. Ҳатто қўшни кичкинтойлар ҳам сумалак пиширишимизни завқланиб кузатиб туришади. Сумалакни пишириш ҳам, улашиш ҳам қандай яхши.
Халқимизнинг дилидан чуқур жой олган, гўзал инсоний фазилатлар намоён бўладиган Наврўзни орзиқиб кутишимиз ҳам шундандир, балки?
Юртбошимиз И.Каримовнинг "2015 йилги Наврўзумумхалқ байрамига тайёргарлик кўриш ва уни ўтказиш тўғрисида” қарор қабул қилганлиги йиллар суронида таъқиб, таъқиқларга қарамай, юртдошларимизнинг юрагидан чуқур жой эгаллаган улуғ байрамимизга ҳурматдир.
Валентина КУЗНЕЦОВА, фахрий ўқитувчи.
(Фото - http://www.uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
