ЁШЛАР ҲУҚУҚЛАРИНИ ҲИМОЯ ҚИЛУВЧИ КОНСТИТУЦИЯ

Давлат ёшларнинг шахсий, сиёсий, иқтисодий, ижтимоий, маданий, экологик ҳуқуқлари ҳимоя қилинишини таъминлайди, уларнинг жамият ва давлат ҳаётида фаол иштирок этишини рағбатлантиради.

Конституциянинг 79-моддасидан.

Бугун юртимизда ёшларни ҳар жиҳатдан қўллаб-қувватлаш давлат сиёсати даражасига кўтарилган. Янгиланган Конституцияда ҳам кўплаб соҳа ва йўналишлар қаторида ёшлар масаласига алоҳида устуворлик берилган.

Ўзбекистон – ёшлар мамлакати, унда 30 ёшгача бўлган аҳоли сони 18 млн.дан зиёд. Аҳолининг қарийб 55 фоизини ташкил этган улкан қатлам  ҳар доим давлатимизнинг эътиборида бўлиб келмоқда.

Янгиланган Конституцияга киритилган ўзгаришлар туфайли иқтидорли ёшлар ўзлари хоҳлаган таълим турини танлаши, ўзлари қизиққан соҳада ишлаши мумкин. Шунингдек, фуқароларга давлат ва жамият бошқарувининг барча босқичларида фаол иштирок этиш, ҳар бир қабул қилинаётган муҳим ҳужжат ижросида ўз овозига эга бўлиш имконияти ҳам яратиб берилган.

Асосий Қонунимизнинг мазмун-моҳияти ҳақида сўз борганида, унинг ҳар бир моддаси, янги ҳаёт руҳи сингдирилган нормалари ҳақида узоқ гапириш мумкин бўлади. Конституциямизнинг Оила, болалар ва ёшлар, деб номланган бобининг 79-моддасида ёшлар сиёсатига доир муҳим жиҳатлар ҳақида сўз юритилган.

Аввало, таъкидлаш жоизки, Ўзбекистон ижтимоий давлат сифатида ёшларнинг барча жабҳадаги ҳуқуқларини таъминлаш кафолатини олмоқда. Биргина мана шу модданинг ўзи мамлакат ёшлари ҳаётини ўзгартириб юборувчи, бугунги ва эртанги фаровонлик асосини яратувчи механизм сифатида бўй кўрсатади.

Ёшлар ҳуқуқлари акс этган алоҳида моддага кўра, давлат ёшларнинг шахсий, сиёсий, иқтисодий, ижтимоий, маданий, экологик ҳуқуқлари ҳимоя қилинишини таъминлайди. Уларнинг жамият ва давлат ҳаётида фаол иштирок этишини рағбатлантиради. Шунингдек, давлат ёшларнинг маънавий, интеллектуал, ижодий, жисмоний ва ахлоқий жиҳатдан шаклланиши ҳамда ривожланиши учун, уларнинг таълим олишга, соғлигини сақлашга, уй-жойга, ишга жойлашишга, бандлик ва дам олишга бўлган ҳуқуқларини амалга ошириш учун шарт-шароитлар яратиб бериши белгиланган.

Ўқиш, бирон мутахассисликка  эга бўлгач, муносиб иш топиш, уй-жойли бўлиш масаласи ҳар бир ёшни жиддий ўйлантирадиган, қийнайдиган масалалардан  эди. Чунки  буларнинг барини бирданига ҳал қилиш жуда мушкул. Шу боис, давлат эндиликда бу каби масалаларни ўз зиммасига олмоқда. Яъни, Конституциямизда ёшларнинг сифатли таълим олиши, ишга жойлашиши, уй-жойга эга бўлишига алоҳида эътибор қаратилган.

Бир сўз билан айтганда, бош Қомусимиз – Конституциямиз  жамиятимиз ҳаётининг барча йўналишларини комплекс тартибга солиш ҳамда мамлакатимизни демократик ривожлантириш йўлида энг муҳим ҳуқуқий пойдевор бўлиб ҳисобланади.

Ёшлар мамлакати бўлган Ўзбекистонда биз учун барча имконият эшиклари доимо очиқ. Мана шу имкониятларнинг қонуний мустаҳкамлаб қўйилиши эса ёшларимизга янада ўзгача шижоат ва руҳ бағишлайди.

Дилмурод  Ёдгоров,

Дўстлик МФЙ ёшлар етакчиси.