ЯНГИ КОНСТИТУЦИЯДА ОИЛА ВА НИКОҲ МУНОСАБАТЛАРИ АЛОҲИДА ЭЪТИРОФ ЭТИЛГАН

Янги Конституциянинг 76-моддасига кўра, оила жамиятнинг асосий бўғини ҳамда у жамият ва давлат муҳофазасида эканлигини сақлаб қолган ҳолда, никоҳ Ўзбекистон халқининг анъанавий оилавий қадриятларига, никоҳланувчиларнинг ихтиёрий розилигига ва тенг ҳуқуқлилигига асосланиши белгиланган. Бу билан давлат оиланинг тўлақонли ривожланиши учун нафақат ижтимоий, иқтисодий, ҳуқуқий, балки давр талабидан келиб чиққан ҳолда бошқа шарт-шароитлар яратишни ҳам ўз зиммасига олмоқда.

Илк маротаба 78-моддада Ўзбекистон халқини миллатидан қатъий назар, Ўзбекистон Республикасининг фуқаролари ташкил этишини инобатга олиб, республикада яшовчи барча фуқароларнинг анъанавий оилавий қадриятларини ҳурмат қилиши эътироф этилган. Шу нуқтаи назардан Ўзбекистон халқининг анъанавий оилавий қадриятлари деганда фуқароларнинг Конституция ва қонунларга, шу жумладан, Оила Кодексига зид бўлмаган анъаналари тушунилади.

Янги Конституцияда кўплаб соҳа ва йўналишлар қаторида ёшлар масаласига ҳам алоҳида устуворлик берилган. Алоҳида бир боб, яъни XIV боб – оила, болалар ва ёшлар масаласига бағишланган.

Конституцияга мувофиқ, давлат ёшларни ўз ҳимоясига олади. Шунингдек, давлат ёшларнинг маънавий, интеллектуал, ижодий, жисмоний ва ахлоқий жиҳатдан шаклланиши ҳамда ривожланиши учун, уларнинг таълим олишга, соғлиғини сақлашга, уй-жойга, ишга жойлашишга, бандлик ва дам олишга бўлган ҳуқуқларини амалга ошириш учун шарт-шароитлар яратиб бериши белгиланган.   

Яхши биламизки, ўқишни битирган ҳар қандай ёш ишлаши, турмуш қуриб оилали, уйли-жойли бўлиши лозим. Аммо буларнинг ҳаммасини бирданига ҳал қилиш жуда қийин. Шу боис, давлат бу каби масалаларни ўз зиммасига олмоқда.

Янги Конституцияда ёшларнинг ишга жойлашишига, уй-жойга эга бўлишига алоҳида эътибор қаратилган бўлиб, тегишли моддаларда кўрсатиб ўтилган.

Роҳатой Полвонова, туман  ФҲДЁ   бўлими инспектори.