ҲАРБИЙ ХИЗМАТГА ЧАҚИРИЛУВЧИЛАРНИ ТАНЛОВ ТАДБИРЛАРИ ДАВОМ ЭТМОҚДА
Ўзбекистон Республикаси “Умумий ҳарбий мажбурият ва ҳарбий хизмат тўғрисида”ги Қонуни ҳамда Ўзбекистон Республикаси Вазирлар Маҳкамасининг 2019 йил 9 апрель кунги “Чақирилувчиларни танлаб олиш тўғрисида”ги Қарори асосида Амударё тумани ҳокимининг 2023 йил 22 июль кунги Қарори билан тайинланган танлов Кенгаши томонидан Мудофаа ишлари бўлими билан ҳамкорликда фуқароларни 2024 йилги ҳарбий хизматга чақирувга тайёргарлик кўриш мақсадида танлов тадбирлари олиб борилмоқда.
Муддатли ҳарбий хизматга танлов тадбирлари 2023 йилнинг 10 август кунидан бошланди ва 2024 йилнинг 10 февраль кунига қадар давом этади.
Танлов тадбирларида 18 ёшдан 27 ёшгача бўлган яъни 1997-2006 йилларда туғилган ва илгари ҳарбий хизматни ўтамаган йигитларимиз қатнашмоқдалар. Ушбу танлов тадбирларида қўйилган синовлардан муваффақиятли равишда ўтган йигитлар муддатли ҳарбий хизматга жўнатиладилар.
Танлов 3та йўналиш бўйича олиб борилмоқда. Яъни жисмоний тайёргарлик даражасини баҳолаш, якка тартибда суҳбат ўтказиш, тиббий кўрикдан ўтиш.
Айни кунларда танлов Кенгаши томонидан муддатли ҳарбий хизматга чақирилувчиларнинг Дўстлик маҳалласида жойлашган ўйингоҳда жисмоний тайёргарлиги синовдан ўтказилмоқда.
Жисмоний нормативларни муваффақиятли топширган чақирилувчиларга якка тартибдаги суҳбатга киришга рухсат берилаяпти. Якка тартибдаги суҳбат Танлов Кенгаши томонидан олиб борилиб, чақирилувчиларнинг дунёқараши, оилавий аҳволи, шунингдек, салоҳиятлари ўрганилади ҳамда тарих фанидан савол-жавоблар ўтказилиб, интеллектуал даражаси аниқланмоқда. Танлов натижаларига кўра, чақирилувчининг муддатли ҳарбий хизматга жўнатилишига ёки жўнатилмаслигига тавсиялар берилаётир.
Якка тартибдаги суҳбатдан муваффақиятли ўтган чақирилувчилар Бутлаш комиссиясига бориш ҳуқуқини қўлга киритадилар. Бутлаш комиссиясидан ўтаолган чақирилувчилар эса Республика раҳбарияти Кенгаши комиссиясига муддатли ҳарбий хизмат командаларига ва қўшин турларига тайинланиш учун юборилади.
Ўзбекистон Республикаси Қуролли Кучлари таркибини жисмоний бақувват ва маънан етук аскарлар билан бутлашга ва Ватанимизнинг равнақи йўлида хизмат қилишга даъват этишда туман Мудофаа бўлими ходимларининг вазифаси масъулиятлидир. Шу боисдан ҳам улар танловни намунали ва ҳаққоний равишда ўтказишга интилмоқдалар.
Шуниси эътиборлики, мазкур танловда қатнашмаган ёки қатнашиб, синовлардан ўтаолмаган чақирилувчилар, сафарбарлик чақирув резерви хизматига тайинланадилар.
Ҳарбий хизмат бурчини ўташ ҳар бир йигит учун шарафли вазифадир. Зеро, Ўзбекистон Республикаси Конституциясида қайд қилинганидек, Ўзбекистон Республикасини ҳимоя қилиш – Ўзбекистон Республикаси ҳар бир фуқаросининг бурчидир. Фуқаролар қонунда белгиланган тартибда ҳарбий хизматни ўташга мажбурдирлар.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
