НУРОНИЙЛАР ЁШЛАР КАМОЛИ ЙЎЛИДА САЪЙ-ҲАРАКАТДА

Мамлакатимизда кекса ёшдагилар ва нуронийларни қўллаб-қувватлаш, уларга ижтимоий хизматлар кўрсатиш тобора кучайтирилмоқда. Вилоятлар ва Қорақалпоғистон Республикаси туман ва шаҳарларида Нуронийлар жамоатчилик кенгашлари ташкил этилди. “Кексалар ҳафталиги”, “Кексалар учун туризм ойлиги”ни ўтказиш анъанага айланди. Кексаларни ҳар томонлама қўллаб-қувватлаш, уларнинг турмуш даражасини ошириш билан бир қаторда уларнинг ижтимоий фаоллигини кучайтиришга, маҳаллаларда тинчлик, осойишталикни таъминлашда, ижтимоий-маънавий муҳитни соғломлаштиришда иштирокини кенгайтиришга ҳам алоҳида эътибор қаратилаётир. Маҳаллаларда “Бир нуроний ўн ёшга масъул” тамойили асосида ҳаётий ва катта амалий тажрибага эга бўлган обрў-эътиборли нуронийларни ишсиз, тарбияси оғир ва муаммоли ёшларга бириктириш орқали уларнинг жамият учун фойдали инсонлар бўлиб етишишларига кўмак берилмоқда.

Амударё туманида фаолият юритаётган “Нуронийлар” жамоатчилик кенгаши томонидан кексаларнинг бўш вақтларини мазмунли ўтказишларини таъминлаш, уларнинг бой ҳаётий тажрибаларини ёшларга ўрнак қилиб кўрсатиш, оилалар бирдамлигини сақлаш, ўзаро аҳил қўшничилик муносабатларини қарор топтириш, оилаларда авлодлар ўртасидаги ўзаро алоқани сақлаш ва қўллаб-қувватлаш борасида тизимли ишлар амалга оширилмоқда.

Бу борада сўз кетар экан, энг аввало туман “Нуронийлар” жамоатчилик кенгаши раиси Бекман ҳожи ота Алламбергановнинг “Амударё телеканали”да мунтазам олиб бораётгани Одоблар хазинаси” рукнидаги ёшлар тарбияси, оилавий муносабатлар, касблар ҳақидаги, инсон ҳаётига доир, ислом динининг инсон ҳаёти гўзал ва мазмунли бўлишидаги ролига доир кўрсатувларини алоҳида эътироф этиш жоиз. Шунингдек, отахон саъй-ҳаракатлари билан ташкил этилган кутубхонадаги мингдан ортиқ нусхада турли мавзулардаги адабий, илмий оммабоп китоблар кекса отахон, онахонларгагина эмас, ёшларга ҳам манзур бўлаётир.

Жамоатчилик кенгаши аъзолари туманимизда турли маънавий-маърифий тадбирларнинг юксак савияда ўтказилишига муносиб ҳисса қўшиб келишмоқда. “Уч авлод учрашуви”, “Кексалар ўгити” каби тадбирлар ёшларга ҳаётий сабоқ берадиган мактабга айланмоқда.

Маҳалла ва оилалардаги ижтимоий-маънавий муҳитни барқарорлаштириш, ажримларнинг олдини олиш, ёшлар, айниқса қизларни миллий урф-одатларимиз, қадриятларимизга содиқлик руҳида тарбиялашда туман Маҳаллани қўллаб-қувватлаш ва аҳоли бандлигига кўмаклашиш бўлимида фаолият юритаётган “Бувижонлар мактаби” жамоатчилик кенгашининг ҳам муносиб ўрни бор.

Кенгаш раиси, “Баркамол авлод” болалар мактаби директори, “Қорақалпоғистонда хизмат кўрсатган маданият ходими Хонимжон Ражабова кенгаш аъзолари билган биргаликда нуроний онахонларни ижтимоий-сиёсий ҳаётга кенг жалб этиш орқали оилалар ва маҳаллаларда ижтимоий-маънавий муҳитни барқарорлаштиришга, ёшларни имон-эътиқодли, миллий одоб ва урф-одатлар руҳида тарбиялашга муносиб ҳисса қўшиб келмоқда.

“Бувижонлар мактаби” жамоатчилик кенгаши томонидан жорий йилда ҳам йигит ва қизларни оила қуришга тайёрлашга кўмаклашиш, туман ҳудудидаги тарбияси оғир, ҳуқуқбузарликка мойил ёшлар айниқса, қизлар билан тарбиявий ишларни олиб бориш, ёшлар ўртасида “оммавий маданият кўринишидаги салбий иллатлар тарқалишининг олдини олиш борасида қатор тадбирлар ўтказилди.

Хонимжон Ражабова туманимизнинг қайси бурчагидаги одамлар билан учрашса-да, фарзанд тарбиясига алоҳида эътибор билан қараш, уларнинг қизиқиш ва интилишларини ҳурмат қилиш, дўстона муносабатда бўлиш ва илмли, соғлом бўлиб вояга етишишларига эришиш лозимлигини таъкидлайди.

Айни кунда у раҳбарлик қилаётган мактабда 7та йўналишдаги 69та тўгаракда 1668 нафар ўқувчилар фанларни чуқур ўрганишиб, касб-ҳунарлар бўйича илк билим ва кўникмага эга бўлишмоқда. Уларга 65 нафар педагог ходимлар таълим-тарбия бериб, касб-ҳунар сирларини ўргатишмоқда.

“Бувижонлар мактаби” жамоатчилик кенгаши раиси Хонимжон Ражабова ўз хизмат бурчини сидқидилдан адо этиш баробарида жамоат ишларида ҳам доим фаол. Уни гоҳ болалар билан турли мавзуларда суҳбатлашаётган чоғида, гоҳ нуроний онахонлар билан кенгаш фаолиятига доир вазифалар хусусида кенгашаётган вақтида учратасиз. Онахоннинг нияти ҳар бир фарзанд юртимизга муносиб бўлиб вояга етиб, оилаларда, оилалардан ташкил топган юртимизда тинчлик, осойишталик ҳукмрон бўлишидир. “Бувижонлар мактаби” жамоатчилик кенгаши саъй-ҳаракатлари ҳам шу мақсадга қаратилган.

Ойгул РАЖАБОВА.