ДАВЛАТ ТИЛИ – КУЧ-ҚУДРАТ ВА ИЛҲОМ МАНБАИ
Тил – миллатнинг маънавий бойлиги, мамлакат тимсоли ва қимматбаҳо мулкидир. Давлат тилимизга бўлган эътибор бугунги кунда, балки тарихнинг барча даврларида ҳам долзарб аҳамият касб этиб келган. Шу ўринда Беҳбудий бобомиз айтган шу сўзларни эслатиб ўтаман: "Ҳар бир миллатнинг дунёда борлиғини кўрсатадурғон ойнаи ҳаёти тил ва адабиётидир. Миллий тилни йўқотмак миллат руҳини йўқотмакдир".
Сўнгги йилларда Ўзбекистонда барча соҳа ва тармоқлардаги каби она тилимиз қадри ва нуфузини янада ошириш борасидаги асосий ва амалий ишлар ҳам янги босқичга кўтарилмоқда. Хусусан, бизнинг туманимизда ва 79-сонли мактабда бу борада бир қанча ишлар олиб борилмоқда. Мактабимизда ҳар йили 21 октябрь – Ўзбек тилига давлат тили мақоми берилган кун муносабати билан катта тадбир ўтказилади.
Ундан ташқари, мактабда ўқувчиларнинг саводхонлигини, фикрлаш қобилиятини ривожлантириш мақсадида ҳар ҳафталикда "Сўз ўйини", "Энг чиройли ҳуснихат эгаси", "Мен ўзбек тилида қанча сўз биламан" каби танловлар ўтказиб борилади. Энг фаол қатнашган ўқувчилар эса рағбатлантирилади. Ушбу танловлар ўқувчиларни тилимизни қадрлашга ўргатиб боришда муҳим аҳамият касб этмоқда. Жорий йилги ўқув йили бошланганидан шу пайтга қадар "Қадринг баланд бўлсин она тилим!" шиори остида "Сўз ўйини", "Ҳарфлар рақсга тушганда", "Диктантлар танлови" мусобақалари ўтказилди. Булар орқали ўқувчилар ўзбек тилининг қанчалар бой ва соф тил эканлигини англаб олишди.
Қорақалпоғистон Республикаси методик хизмат кўрсатиш бўлимининг ўзбек тили методисти Ўткир Матмуродов ҳам биз фан ўқитувчиларига янги педагогик технологияларни қўллаган ҳолда дарс ўтишни, турли методлар, иш тажрибаларини ўргатиб, маҳоратимизни оширишга кўмаклашиб келмоқда. Ўз устимизда ишлаб, дарс машғулотларини янгича услубларни қўллаган ҳолда ўтиш бўйича зарур тавсиялар, маслаҳатлар бериб, йўл-йўриқлар кўрсатмоқда.
Она тили миллатнинг руҳи, борлигимиз ва бирлигимиз, давлат тимсоли. Шу сабабли ҳар бир дарсимизда ўқувчи-ёшларнинг миллий тилимизга бўлган эътиборини ошириш билан бирга тилимизни қадрлашга ўргатиб бориш бизнинг энг асосий вазифамиздир. Хулоса ўрнида шу фикрларимни келтириб ўтмоқчиман: Тилимиз бой, тилимиз соф, гўзалдир! Ҳар бир сўзи, гапи мақол, жумласи масал ва маталдир!
Лайло Ражаббоева, 79-сонли мактабнинг она тили ва адабиёт ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
