ОЛМАЗОР МАҲАЛЛАСИДА ХАЛҚАРО ҚИЗЛАР КУНИГА БАҒИШЛАНГАН ТАДБИР ЎТКАЗИЛДИ

Юртимизда 11 октябрь – Халқаро қизлар куни муносабати билан турли маънавий-маърифий тадбирлар ўтказилиб келинмоқда. Ушбу кунга бағишлаб Амударё туманидаги Олмазор маҳалласида жойлашган 82-сонли мактабда ҳам “Қизлар” клуби аъзолари иштирокида маънавий-маърифий тадбир ташкил этилди.

11 октябрь куни бўлиб ўтган мазкур тадбирга ташриф буюрганлар дастлаб мактаб фойесида қизларнинг қўл меҳнатлари намуналари, юмшоқ ўйинчоқлар, ранг-баранг қуроқлар, аёллар либослари ва бошқа нарсалар намойиш этилган кўргазмани томоша қилдилар.

 Тадбир маҳалла фуқаролар йиғини хотин-қизлар фаоли Ўрозгул Якубова, мактаб ўқитувчилари ва ўқувчилари иштирокидаги давра суҳбати билан бошланди. Суҳбат давомида БМТ Бош Ассамблеясининг 2011 йил 10 декабрдаги резолюциясига асосан, 11 октябрь "Халқаро қизлар куни” деб эълон қилингани, БМТга аъзо давлатлар, халқаро ташкилотлар, фуқаролик жамиятининг турли тузилмаларига ушбу кунни кенг миқёсда нишонлаш, шунингдек, бутун дунёда қизларнинг ҳаёт тарзи, яшаш шароитлари, ҳуқуқ ва эркинликлари билан боғлиқ ҳолатларни ўрганиш тавсия этилгани, бу сана ҳар йили бутун жаҳон бўйича қизларнинг камситилиши, уларнинг ижтимоий муаммоларига эътибор қаратиш мақсадида нишонланиб келинаётгани тўғрисида сўз юритилди.

Шу билан бирга бу борада юртимизда ҳам миллат давомчилари бўлмиш қизларни маърифатли қилиб вояга етказиш масаласига алоҳида эътибор қаратилаётгани, Президентимизнинг 2022 йил 7 мартдаги “Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида”ги Фармонларида қизларни ҳар томонлама етук, юксак ахлоқли, билимли ва миллий кадриятларга ҳамда она Ватанга содиқ фарзандлар қилиб тарбиялаш вазифаси белгилаб берилгани алоҳида таъкидлаб ўтилди.

Шундан сўнг, мактабнинг она тили ва адабиёт фани ўқитувчиси Зулхумор Сапарова, тўгарак раҳбарлари Дилдора Холбоева, Севара Болтабоевалар томонидан ташкил этилган ушбу тадбир мактабнинг фаол ўқувчи-қизлари иштирокидаги маданий-мусиқий дастур билан давом эттирилди.

Мактабдаги фан, адабиёт, спорт ва бошқа йўналишларда ютуқларга эришиб келаётган ўқувчи-қизлар ҳам саҳнада ўз иқтидорларини намойиш этишди. Спортчи қизлар ижросидаги гимнастика машқлари, адабиётчи қизлар ифодали айтиб берган шеърлар, қўшиқ ва рақслар томошабинларга хушнудлик бахш этди.

Таъкидланганидек, 82-сонли мактабда таҳсил олаётган 527 нафар ўқувчидан 266 нафарини қиз болалар ташкил этади. Мактабдаги иқтидорли қизлардан Сарвиноз Эрманова спортнинг гимнастика тури бўйича Қорақалпоғистон Республикаси миқёсида кўплаб ютуқларга эришган. Мактаб ёшлари сардори, 10-синф ўқувчиси Маҳлиё Жумабоева эса Ёшлар ишлари агентлиги туман бўлими ҳузурида ташкил қилинган “Қизлар овози” клубида бандлик ва ишбилармонлик йўналиши бўйича координатори сифатида ўз лойиҳалари билан танилган.

Бичиш-тикиш тўгарагининг фаол аъзоси, 9-синф ўқувчиси Ирода Янгибоева, санъат йўналишидаги тўгарак аъзоси, 5-синф ўқувчиси Дилрабо Эрмановалар ҳам кўплаб танловларда ғолиб бўлган. Шунингдек, адабиёт йўналиши бўйича иқтидорли қиз, 9-синф ўқувчиси Машҳура Ражабованинг 2022 йилда "Кўнглим" номли шеърий тўплами нашр қилинган.

Ўқувчиларнинг сифатли таълим олишлари, ўз иқтидорларини юзага чиқаришлари учун таълим масканида етарли шарт-шароитлар яратилган. Ёшларнинг ушбу имкониятлардан унумли фойдаланаётгани эришилаётган ютуқларда яққол намоён бўлмоқда.

Кўтаринки руҳда ўтган тадбир ўқувчи-қизларнинг қизиқишларини янада рағбатлантириш, жамиятдаги ижтимоий-сиёсий фаоллигини ошириш, тенгдошлари ўртасида ҳамкорлик ва ташаббускорлик муҳитини яратишда муҳим аҳамият касб этди.

О.Худойберганова.