“Халқаро қишлоқ аёллари куни”га бағишланган тадбир бўлиб ўтди

Бирлашган Миллатлар Ташкилоти Бош ассамблеясининг 2007 йил 18 декабрда қабул қилинган “Қишлоқ ҳудудларида аёлларнинг аҳволини яхшилаш” тўғрисидаги резолюциясига асосан 15 октябрь – Халқаро қишлоқ аёллари куни деб эълон қилинган бўлиб, мазкур сана юртимизда ҳам кенг нишонланиб келинмоқда.

Сана муносабати билан 11 октябрь куни Амударё тумани Маданият бўлимнинг томошалар залида байрам тадбири бўлиб ўтди.

Тадбирда туман ҳокими ўринбосари, Оила ва хотин-қизлар бўлими бошлиғи Гўзал Собурова, Аёлларни реабилитация қилиш ва мослаштириш Қорақалпоғистон Республикаси туманлараро маркази директори Гавҳар Чимбайчиева, туман Адлия бўлими бош маслаҳатчиси Нилуфар Жуманиёзова, туман ФҲДЁ бўлими иш юритувчиси Набира Ўнғарова, овул ва маҳалла фуқаролар йиғинларининг хотин-қизлар фаоллари ҳамда турли соҳалар, айниқса қишлоқ хўжалиги соҳасида хизмат қилаётган фаол аёллар иштирок этишди.

Тадбир аввалида Ўзбекистон Республикаси Олий Мажлис Сенати Раиси Танзила Норбоева, Ўзбекистон Республикаси Оила ва хотин-қизлар қўмитаси раиси Зулайҳо Маҳкамовалар Zoom платформаси орқали республикамиздаги барча аёл-қизларни яқинлашиб келаётган байрам билан табрикладилар. Шунингдек, бугунги кунда мамлакатимизда хотин-қизларга яратиб берилган кенг имкониятлар тўғрисида айтиб ўтдилар.

Давлатимиз раҳбари бутун дунё мамлакатлари учун долзарб бўлган ташаббусларни Бирлашган Миллатлар Ташкилотининг юксак минбаридан мунтазам илгари суриб келаётгани, миллий, минтақавий ва халқаро аҳамиятга эга ушбу ташаббуслар нафақат юртимиз, балки жаҳон жамоатчилиги томонидан ҳам алоҳида эътироф этилаётганлиги таъкидланди.

Байрам муносабати билан ташкиллаштирилган тадбирда туман ҳокими ўринбосари, Оила ва хотин-қизлар бўлими бошлиғи Гўзал Собурова сўзга чиқиб, мамлакатимизда кейинги йилларда хотин-қизларнинг жамиятдаги фаоллигини ошириш, саломатлиги муҳофаза қилиш борасида тизимли ишлар амалга оширилаётганини ҳамда оналик ва болаликни ҳар тарафлама қўллаб-қувватлаш давлатимиз белгилаб олган сиёсатнинг устувор йўналишларидан бири эканлигини таъкидлаб ўтди.

Шунингдек гендер тенглик ва хотин-қизлар ҳуқуқларини таъминлаш масаласига қаратилаётган алоҳида эътибор ҳам шундай муҳим ташаббуслар сирасига киради. Мамлакатимизда кейинги йилларда хотин-қизларни ҳар томонлама қўллаб-қувватлаш, уларнинг ижтимоий-иқтисодий ва сиёсий фаоллигини ошириш, бандлигини таъминлаш, тадбиркорликка кенг жалб этиш борасида эришилган ютуқлар дунё аҳли намуна олишига муносибдир.

Аёлларни реабилитация қилиш ва мослаштириш Қорақалпоғистон Республикаси туманлараро маркази директори Гавҳар Чимбайчиева ўз сўзида қишлоқларда яшаётган мунис бувижон ва онахонларни, дилбар опа-сингилларни 15 октябрь – Халқаро қишлоқ аёллари куни билан самимий табриклади. Шунингдек ҳудудни ижтимоий-иқтисодий ривожлантиришга ва ҳар тарафлама баркамол авлодни тарбиялашга катта ҳисса қўшаётгани учун уларга чуқур миннатдорлик билдирди.

Қишлоқ аёлларининг улкан матонати, тоғдай сабр-тоқати ҳамда меҳнатсеварлигидан барчамиз фахрлансак арзийди. Боиси, улар дала-дашт ва боғ-у роғда, мактаб, шифохонада меҳнат қилишдан, тадбиркорлик, фермерлик билан шуғулланиш ва аҳолига турли хизматлар кўрсатишдан ташқари фарзандларини Ватанга муҳаббат, юртга садоқат, миллий қадриятларимизга ҳурмат руҳида тарбиялаётгани таҳсинга лойиқдир. Шу боисдан ҳам қишлоқ ҳудудларида яшаб, турли соҳаларда самарали меҳнат қилаётган, фарзандлар тарбияси билан шуғулланаётган аёлларни қўллаб-қувватлаш, уларнинг оғирини енгил қилишга кўмаклашиш, ўз ҳаётларидан рози бўлиб яшашларини таъминлаш доимий ва энг муҳим вазифалардан биридир.

Тадбирда туман Маданият бўлими ва жойлардаги маданият марказлари ходимлари томонидан иштирокчиларга концерт дастури намойиш этилди.

Туман ҳокимлиги Ахборот хизмати