БОШЛАНҒИЧ СИНФЛАРДА ЯНГИ АВЛОД ДАРСЛИКЛАРИНИ АМАЛИЁТГА ЖОРИЙ ЭТИШ ЮЗАСИДАН ЎҚУВ СЕМИНАРИ БЎЛИБ ЎТДИ

Ўзбекистон Республикаси Мактабгача ва мактаб таълими вазирлиги томонидан мамлакатимизнинг барча ҳудудларида “Бошланғич синфларда ўқитишнинг замонавий методикаси” мавзусида семинар-тренинглар ўтказилмоқда. Мазкур семинар-тренинглар илғор тажрибалар асосида яратилган ўқув дастури ва дарсликларни амалиётга жорий этишда бошланғич синф ўқитувчиларининг билим ва кўникмаларини шакллантиришга қаратилгани билан ниҳоятда аҳамиятлидир.

7 октябрь куни Қорақалпоғистон Республикаси педагогларни янги методикаларга ўргатиш миллий Маркази ва Амударё тумани Мактабгача ва мактаб таълими бўлими билан ҳамкорликда тумандаги 40-сонли умумий ўрта таълим мактабида ҳам бошланғич синф ўқитувчилари учун ўқув-семинари бўлиб ўтди. Унда тумандаги 85 та мактабнинг ҳар биридан 1-, 2-, 3-, 4-синфларнинг бошланғич синф ўқитувчилари жалб қилинди.

Семинарни туман Мактабгача ва мактаб таълими бўлими мудири Саида Садикова очди ва бу йил бошланғич синфлар учун яратилган янги дарсликларни амалиётга жорий этишда бугунги кун бошланғич синф ўқитувчиларидан катта маҳорат, замонавий ёндашув ва масъулият талаб қилинишини таъкидлади.

Шунингдек, семинарда Қорақалпоғистон Республикаси педагогларни янги методикаларга ўргатиш миллий Маркази мактабгача, бошланғич ва махсус таълим методикалари кафедраси мудири Байрам Ўтемуратов, кафедра профессор ўқитувчилари Зевар Тажекбаева, Пердехан Салиева, Гулчеҳра Юсуповалар иштирок этишиб, “Янги дарсликлар орқали бошланғич синф ўқувчиларида коммуникатив компетенцияни шакллантириш методлари”, “Янги ўқув дастури асосида бошланғич синф математика дарсларини ташкил этиш” каби мавзуларда маъруза қилишди ва бошлангич синф ўқитувчиларини қизиқтирган саволларга жавоб беришиб, касбий маҳоратидан тавсиялар беришди.

Шундан сўнг, туман мактабларининг бошланғич синфларда маъсул тренер ўқитувчиларидан Меҳрибон Бекбергенова, Малоҳат Матмуратова 1-синф ўқитувчиларига, Насиба Бабажанова, Насиба Қурбонбоева 2-синф ўқитувчиларига, Дилдора Каримбоева, Шоҳида Юлдашева 3-синф ўқитувчиларига, Аймира Упаева ва Азиза Тўраевалар эса 4-синф ўқитувчиларига бошланғич синфларда ўқитишнинг замонавий методикаси, танқидий фикрлаш, жамоавий ишлаш, ижодкорлик ва мулоқот қилиш кўникмаларини ривожлантириш моделини ўқувчиларда шакллантиришда методлардан фойдаланиш орқали самарали натижаларга эришиш тўғрисидаги маърузалари билан иштирок қилдилар.

Бундан ташқари, бошланғич таълим ўқитувчилари “Ёзувга ўргатиш методикаси”, “Бинго”, “Вен диаграммаси”, “Декарт”, “Шахмат тахтаси” каби методларни қўллаган ҳолда амалий машғулотларда иштирок қилишди. Бу методлар бугунги кунда ўқувчиларимизни қизиқарли билим олишда, ҳар бир муаммони турли йўллар билан ҳал этишда, уларни қийин вазиятлардан олиб чиқишда, дарсликдан олган билимларини кундалик ҳаётда қўллай олишларида ёрдам беради.

Ушбу ўқув-семинаридан кутилаётган максад мактабда бошлангич таълим сифатини ошириш, ўқувчиларнинг қизиқишларини инобатга олган ҳолда самарали ўқув-тарбия жараёнини ташкил этишдир. Бу каби тадбирлар ўқув йили давомида амалга оширилади. Зеро, бугунги кунда бошланғич синфлар ўқитувчиларининг вазифаси янги дарсликлар орқали ўсиб келаётган ёш авлод онгида XXI аср талаби даражасидаги билим кўникмаларини шакллантиришдан иборатдир.

Райҳон ЯКУБОВА, Амударё тумани ММТБ мактаблар фаолиятини мувофиқлаштириш бўлими методисти.